E poro anaˈe ma te ite
1 E titauhia ia taa tatou i te feia o ta tatou e poro ra, ia noaa mai ia tatou i te ite. No te aha? No te mea e nehenehe noa tatou e haaputapû i to ratou mafatu na roto i to tatou faaiteraa ˈtu i te poroi ma te anaanatae. I te avaˈe tenuare, e pûpû tatou e rave rau mau buka haapiiraa bibilia e vai ra i te amuiraa. Aita anaˈe, e faaohipa tatou i te buka Te hau e te ino ore mau—No hea mai ïa? E nehenehe te mau manaˈo i muri nei e tauturu ia tatou.
2 Mai te peu e e maiti tatou i te pûpû i te buka “Te hau e te ino ore mau—No hea mai ïa?” e nehenehe tatou e faaite i te hohoˈa o te api 4 e e parau e:
◼ “E hohoˈa teie o te faataa ra i te mau huru tupuraa, ia au i te Bibilia, o ta te Atua e opua ra no te fenua nei. I to oe manaˈo, eaha te tia ia oe ia rave, o oe e to oe utuafare, no te ora i roto i te paradaiso i nia i te fenua nei? [A vaiiho i te taata ia pahono.] Te faaite ra te Bibilia e fatata roa te hau e te ino ore i te tupu i nia i te fenua e e haamau-faahou-hia te paradaiso. [A taio i te Salamo 37:10, 11.] Te faataa ra teie buka e eaha te tia ia oe ia rave no te fanaˈo i te mau mea ta te Atua i opua. Te hinaaro nei au e vaiiho i teie buka na oe.”
3 Mai te peu e e pûpû tatou i te buka “Nafea ia faatupu i te hoê oraraa utuafare oaoa,” e nehenehe tatou e haamata mai teie:
◼ “Te farii ra anei oe e te faaruru nei te mau utuafare o teie tau i te mau fifi aita i itehia e te mau ui na mua ˈtu? [A vaiiho i te taata ia pahono.] I to oe manaˈo, no te aha te reira e tupu ai? [A haamauruuru i te taata no ta ˈna pahonoraa. A hohora i te Bibilia i roto i te Timoteo 2, 3:1-3 e a taio.] Te tano maitai ra te mau parau ra “faaroo ore i te metua” e “aroha ore” i te rahiraa o te mau taata o to tatou nei tau. Tera râ, ua horoa atoa te Atua o tei faaite i taua mau fifi ra i te mau aˈoraa maitatai mau e nafea ia haapaari i te mau taairaa fetii.” A taio i te nota a te feia nenei i te api 2. A pûpû atu i te buka.
4 Te tahi atu ravea no te faaohipa i te buka “Te hau e te ino ore mau—No hea mai ïa?” oia hoi a ani atu i teie uiraa:
◼ “Te tiaturi nei te rahiraa e aita te Atua e anaanatae mau ra i te mau taata e eita oia e rave i te hoê noa ˈˈe ohipa no nia i te mau fifi e vai ra i nia i te fenua nei. Tera atoa ra anei to oe manaˈo? [A vaiiho i te taata ia pahono.] Mai te peu e e tia ia oe, e taio atu vau i te hoê tuhaa o teie buka haapiiraa bibilia; a hiˈo na eaha ta te Atua e opua ra i te rave no te mau taata e no te fenua. [I te api 47, a taio i te paratarapha 1 e te pereota matamua o te paratarapha 2.] E nehenehe au e haapapu atu ia oe e e tumu maitai e faatia noa ˈi te Atua i te mau fifi e vai ra i nia i te fenua. Mai te peu e e hinaaro oe e ite eaha taua tumu ra, a taio ïa i teie buka, teie to ˈna upoo parau ‘Te hau e te ino ore mau—No hea mai ïa?’” Mai te peu e e parau mai te taata e e taio o ˈna i te buka, e nehenehe ïa tatou e vaiiho atu.
5 Mai te peu e te hinaaro ra tatou e rave i te hoê faaiteraa poto e te buka “Te ino ore no te ao atoa nei i raro aˈe i te Faatereraa a te ‘Tamaiti hui arii no te hau,’” e nehenehe tatou e tatara i te buka i te api 4 e e ui atu e:
◼ “Eaha te huru o to tatou palaneta a muri aˈe? Te aniani ra e rave rahi mau taata i teie nei uiraa. Te manaˈo ra anei oe e e nehenehe oia e riro mai i te hoê mahana ei paradaiso?” A haamauruuru i te taata o ta tatou e aparau ra no ta ˈna pahonoraa, e a taio atu i te mau parau omuaraa i te api 2. A pûpû atu i te buka.
6 E tauturu te ite ia tatou ia taa i te mau hinaaro e te anaanatae o te mau taata o ta tatou e farerei ra. O te tiaturiraa ïa ta te Maseli 16:23 e horoa ra ia tatou, o te na ô ra e: “Na te aau o te taata paari i faaite i te vaha i te haapao, e na te reira e faaite i te vaha i te ite.”