E aratai te ite no nia i te Atua mau i te ora
1 “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioa. 17:3) Auê ïa taoˈa hamani maitai e! Na roto i te faaohiparaa i te buka ra Te ite e aratai i te ora mure ore, e nehenehe tatou e tauturu i to tatou mau taata-tupu ia haapii i te mea e tia ia ratou ia rave no te ora e a muri noa ˈtu. Eaha ta tatou e nehenehe e parau no te faaara i to ratou anaanatae e no te faaitoito ia ratou ia taio i teie buka?
2 E nehenehe tatou e faaohipa i te hoê faaiteraa o te haamatara i te mau aˈoraa ohie ia faaohipahia e vai ra i roto i te Bibilia, ei hiˈoraa:
◼ “Te tauaparau nei matou e to matou mau hoa tapiri no te ite e, ihea roa e noaa mai ai te mau aˈoraa ohie ia faaohipa no te faaruru i te mau fifi o te oraraa. I mutaa ihora, e hiˈo na mua na te taata e rave rahi i roto i te Bibilia. I teie nei râ tau, ua moe te reira peu; e rave rahi taata o te ore e tiaturi faahou nei i te Bibilia e o te manaˈo nei e e buka noa teie i papaihia e te taata. Eaha to oe manaˈo? [A vaiiho i te taata ia pahono.] Te vai ra te hoê tumu maitai roa e nehenehe ai e parau e, mea faufaa roa te Bibilia i to tatou nei tau. [A taio i te Timoteo 2, 3:16, 17.] Te mau faaueraa tumu bibilia i horoahia i te tau i faaurua ˈi te Atua i te papairaa o te Bibilia, e tano atoa ïa no teie nei mahana.” A huri i te api 16 o te buka Te ite, e a tatara poto noa ˈtu i te mau aˈoraa ohie ia faaohipa i faahitihia e Iesu i roto i ta ˈna Aˈoraa i nia i te mouˈa. A taio i te mau faahitiraa parau i te paratarapha 11 aore ra to te paratarapha 13. A pûpû atu i te buka, e a faaau i te hoê taime farereiraa no te pahono i teie uiraa: nafea tatou tataitahi e faufaahia ˈi i te ite e vai ra i roto i te Bibilia?
3 I te mea e e rave rahi taata e anaanatae nei i te parau no te pure, e nehenehe tatou e haamata i te aparauraa ma te ani atu e:
◼ “I te mea e e tia ia tatou ia faaruru e rave rahi fifi i roto i te oraraa no teie nei tau, i to oe manaˈoraa, e nehenehe anei te pure e tauturu mai ia tatou? [A tiai i te pahonoraa.] E rave rahi taata o te manaˈo nei e, na roto i te pure, ua fatata ˈtu ratou i te Atua e ua noaa mai ia ratou te hoê puai no roto roa mai; te reira mau ta te Bibilia e tǎpǔ maira. [A huri i te api 156 o te buka Te ite, e a taio i te Philipi 4:6, 7.] Teie râ, e riro paha te hoê taata i te manaˈo e, aita ta ˈna mau pure e faaroohia ra. Teie te upoo parau o teie pene, ‘Nafea oe ia haafatata ˈtu i te Atua.’ [A pûpû atu i te buka.] Te faataa atoa ra teie pene e mea nafea tatou iho ia faaroo atu i te Atua, inaha eita e tia e na ˈna anaˈe e faaroo mai. E nehenehe tâua e tauaparau i nia i teie tumu parau i te taime i mua nei.”
4 E hinaaro anei tatou e tamata i te ani roa ˈtu i te taata ia haamata i te hoê haapiiraa? Teie te hoê hiˈoraa:
◼ “Te pûpû nei matou i te hoê haapiiraa bibilia tamoni ore i te utuafare. Ua haapii aˈena anei oe i te Bibilia? [A vaiiho i te taata ia pahono.] Mai te peu e e farii oe, e faaite atu vau ia oe te buka o ta matou e faaohipa nei.” A rave mai i te buka Te ite, a huri i te api 3 no te faaite atu i te tabula o te mau tumu parau, e a ani i te taata e: “Ua aniani aˈena anei oe e eaha ta te Bibilia e parau ra no nia i teie mau tumu parau?” I reira, a huri i te mau api i te pene o ta te taata e anaanatae rahi aˈe, e a taio i te mau upoo parau iti. A faataa ˈtu e te hinaaro ra tatou e faaite poto noa ˈtu ia ˈna e mea nafea tatou ia tuatapapa i teie mau tumu parau i roto i ta tatou haapiiraa. Ia haamatahia te hoê haapiiraa aore ra eita, a vaiiho atu i te buka na te taata mai te peu e e parau mai oia e e taio oia.
5 I teie nei, e rave rahi taata o te farii popou nei i te ite papu no nia i te Atua mau. (Isa. 2:2-4) Tei ia tatou te hopoia taa ê e tauturu i te feia atoa e naeahia ia tatou, ia ite e o vai o Iehova, a noaa ˈtu ai te ora.—Tim. 1, 2:4.