E haamaitai anaˈe ia Iehova “i te mau mahana atoa”
1 I roto i te Salamo 145:2, teie te parau ta te arii ra o Davida i tǎpǔ atu ia Iehova: “E haamaitai â vau ia oe i te mau mahana atoa nei; e arue au i to iˈoa e a muri noa ˈtu.” E mau tumu atoa ta tatou no te haamaitai e no te arue i to tatou Metua i te raˈi ra. Tera râ, nafea tatou e nehenehe ai e pee i te hiˈoraa o Davida e e faahanahana i te tiaraa mana arii o Iehova “i te mau mahana atoa”?
2 E faaî anaˈe i to tatou mafatu i te mauruuru no Iehova: E haapuai te haapii-tamau-raa i te Parau a te Atua, i to tatou mauruuru no te mau mea o ta Iehova i rave, o ta ˈna e rave nei e o ta ˈna â e rave no tatou. A rahi noa ˈi tatou i te ite i te mau ohipa faahiahia a Iehova, e putapû-roa-hia tatou i te mauruuru e e faaite haere tatou i to ˈna maitai. (Sal. 145:7) E turaihia tatou ia arue ia Iehova i te mau taime atoa.
3 E arue anaˈe ia Iehova i roto i ta tatou mau aparauraa i te mau mahana atoa: Ia tauaparau tatou e to tatou mau hoa tapiri, mau hoa haapiiraa, mau hoa ohipa e vetahi atu mau taata o ta tatou e farerei nei i te mau mahana atoa, e nehenehe tatou e faaohipa i te mau taime e tano no te tufa ˈtu i to tatou tiaturiraa. Peneiaˈe e faaite mai te hoê hoa tapiri i to ˈna peapea no te mau ohipa iino e tupu ra i to tatou vahi; te haapeapea nei paha te hoê hoa haapiiraa no nia i te raau taero aore ra te mau taatiraa tia ore i te pae tino; e faaite mai paha te hoê hoa ohipa i to ˈna manaˈo no nia i te tahi tumu parau politita. E nehenehe tatou e huti i to ratou ara-maite-raa i nia i te mau faaueraa tumu e te mau parau tǎpǔ e vai ra i roto i te Parau a te Atua, e e faaite atu eaha te haerea maitai e tia ia peehia i teie nei iho, e oia atoa te ravea no te faatitiaifaro i to ratou mau fifi. E riro teie mau parau e faahitihia “i te taime au ra,” ei haamaitairaa.—Mas. 15:23, MN.
4 E paraparau anaˈe no nia ia Iehova ma te taime taatoa: Te taata tei î i te mauruuru no Iehova, e hinaaro ïa oia e faaite i te parau apî maitai i te rahiraa taata o ta ˈna e nehenehe. (Sal. 40:8-10) E aniani anaˈe na ia tatou iho: ‘Te tutava mau ra anei au, ia au i to ˈu huru tupuraa?’ E rave rahi o tei ite mai e, ia taui rii anaˈe ratou i ta ratou tabula ohipa, e nehenehe ratou e riro mai ei mau pionie tamau. Mai te peu e eita e tia ia tatou i teie nei, e nehenehe anei râ tatou e riro ei pionie tauturu? Te fatata mai nei te oroa Haamanaˈoraa, e tera te hoê taime maitai roa no te faarahi i ta tatou taviniraa. E tano maitai te mau avaˈe mati e eperera no te ohipa rahi atu â i roto i te taviniraa ei mau pionie tauturu.
5 E tauturu anaˈe i te feia apî ia apiti mai ia tatou no te haamaitai ia Iehova: I tera matahiti i muri aˈe i te tahi, te faahaamanaˈo nei te oroa Haamanaˈoraa i te poheraa o Iesu ia tatou, i te mau tumu e haamauruuru ai tatou ia Iehova e e arue ai tatou i To ˈna iˈoa. E taime tano roa atoa no te faaitoito i te mau taata e haapii nei i te Bibilia, ia apiti mai ia tatou no te faaite i te mana arii o Iehova i mua i te taata. E faaitoito anaˈe ia ratou ia feruri na roto i te pure, i te mau parau faahitihia i roto i te buka ra Te ite e aratai i te ora mure ore, i te mau api 173-5, mau paratarapha 7-9. Mai te peu e te faaî ra ratou i te mau titauraa, aita ïa e tumu no te tiai faahou, ma te parau paha e aita i noaa ia ratou te aravihi. E nehenehe hoi te feia poro aravihi e faaite ia ratou e mea nafea ia poro anaˈe i te Basileia. Mai te peu e e noaa i te feia apî te itoito no te faaite i te parau apî maitai, e nehenehe ïa ratou e tiaturi e e tauturu mai Iehova ia ratou.—Ohi. 4:31; Tes. 1, 2:2.
6 Mai te peu e e tutava tatou i te haamaitai ia Iehova i te mau mahana atoa, e noaa mai ïa te mau haamaitairaa mure ore no tatou iho e no vetahi ê atoa.