Te mau haamaitairaa o te Haapiiraa o te taviniraa teotaratia no 1996—Tuhaa 3
1 Ua hinaaro te aposetolo Paulo e ia pure to ˈna mau taeae no ˈna, ia noaa mai ia ˈna te aravihi no te faaite i te parau apî maitai ma te itoito. (Eph. 6:18-20) To tatou hinaaro, ia noaa atoa mai ïa taua aravihi ra. No reira tatou e oaoa ˈi i te tauturu e fanaˈohia na roto i te Haapiiraa o te taviniraa teotaratia. Te faaitoitohia nei te feia e haere maira i te mau putuputuraa e o te faaî nei i te mau titauraa, ia haere atu e tapao i to ratou iˈoa.
2 E horoahia na te mau taata haapii, te mau aˈoraa e tano no ratou iho ei tautururaa ia ratou ia haamaitai i to ratou aravihi no te paraparau e no te haapii i te taata. (Mas. 9:9) E nehenehe atoa tatou e huti mai i te faufaa o te haapiiraa, na roto i te faarooraa i te mau aˈoraa e horoahia na te tahi atu mau taata haapii, e na roto i te faaohiparaa no tatou iho i te mau mea o ta tatou e haapii ra. Ia faaineine anaˈe tatou i te hoê tumu parau, e tia ia tatou ia tuatapapa maitai i te mau tuhaa i faataahia, ia papu ia tatou e te vauvau ra tatou i te tumu parau ma te hape ore. E tia i te mau manaˈo faufaa roa ˈˈe e te mau irava o ta tatou e faaohipa, ia tuea e te vauvauraa o te tumu parau. Mai te peu e e apiti mai te tahi atu taata i roto i ta tatou tuhaa, e tia ia faaineine maitai e o ˈna hou tatou e vauvau ai na mua mai i roto i te haapiiraa. A haere noa ˈi tatou i mua, e tia ia tatou ia tutava ia matara ohie noa ta tatou parau, ma te faaohipa i te mau nota, eiaha râ i te hoê papie papai-pauroa-hia te mau parau.
3 Te feia e tuhaa ta ratou i roto i te haapiiraa, e tia ia ratou ia tae oioi mai, ia horoa i ta ratou api Aˈoraa no te oreroraa i te tiaau no te haapiiraa e ia parahi i mua o te piha. E tia i te mau tuahine ia faaara i te tiaau no te haapiiraa na mua ˈˈe, e eaha te huru tupuraa o ta ratou tumu parau, e mai te peu e e parahi ratou aore ra e tia noa anei ratou ia vauvau ratou i ta ratou oreroraa. Ia haapao tatou i teie mau tuhaa atoa, e turu ïa tatou i te tere-maitai-raa o te porotarama e e tauturu tatou i te feia haapao i te tahua ia ineine maitai te mau ohipa na mua ˈˈe.
4 Te faaineineraa i te oreroraa parau n °2: Hoê tapao o te taioraa bibilia, o te tautururaa ïa i te taata haapii ia haamaitai i ta ˈna huru taioraa. Nafea e manuïa ˈi? Te ravea maitai roa ˈˈe, o te taio-noa-raa ïa na nia iho te tuhaa irava ma te reo puai. Mai te peu e aita o ˈna i ite i te auraa aore ra nafea ia parau anaˈe i te tahi mau taˈo matau-ore-hia, e nehenehe te taata haapii e imi i roto i te titionare aore ra e ani i te tahi taeae aore ra tuahine ia tauturu mai ia ˈna.
5 E nehenehe te mau metua e tauturu i ta ratou mau tamarii apî ia faaineine i teie taioraa. E nehenehe ratou e faaroo i ta ratou mau tamarii ia faaineine anaˈe ratou e e horoa ˈtu i te mau aˈoraa o te tauturu ia ratou ia haamaitai atu â. I roto i te taime i faataahia, e nehenehe e faahiti i te tahi omuaraa parau e te hoê parau faaotiraa e tano, i reira te taata haapii e faaohipa ˈi i te mau manaˈo matamua. E nehenehe ïa oia e faarahi i to ˈna aravihi ia matara ohie noa mai ta ˈna parau, ma te ore e hiˈo i ta ˈna papie.
6 Teie te aniraa ta te papai salamo i faatae atu ia Iehova: “E vevete na oe, e Iehova, i tau vaha, e na tau vaha e arue ia oe.” (Sal. 51:15) Ia tauturu to tatou apitiraa ˈtu i roto i te Haapiiraa o te taviniraa teotaratia ia tatou ia faatupu i taua atoa ra hinaaro e tia ˈi!