“Te mau vea o te hau a te Atua”—Tairururaa mataeinaa 1996
1 Ua faaroohia te mau faaiteraa haamauruururaa mau no te porotarama faaitoito i te pae varua a te rahiraa o na 3 574 taata o tei putuputu mai i te mau tairururaa mataeinaa no te matahiti 1995 “Te feia e arue i te Atua ma te oaoa” i Polinesia. Ua î to tatou mafatu i te oaoa i te iteraa e 67 feia arue a Iehova tei bapetizo ia ratou ei taipe no to ratou pûpûraa ia ratou iho no te Atua. Ua oaoa tatou i te noaaraa mai i te vea apî Te mau Ite no Iehova e te haapiiraa e te buka apî Te ite e aratai i te ora mure ore. E tia i to tatou fanaˈoraa i te hoê porotarama anaanatae mau i te matahiti i mairi aˈenei, ia turai ia tatou ia rave i te mau tutavaraa atoa no te haere i te mau tairururaa mataeinaa 1996 “Te mau vea o te hau a te Atua.” Papu maitai, e hinaaro tatou e titau manihini i te feia e haapii ra i te Bibilia e o tatou. E riro mau iho â teie mau tairururaa ei pu no te faaitoitoraa e te haapuairaa i te pae varua, no tatou paatoa o te hinaaro nei e tamau i te tavini ia Iehova ma te oaoa i teie mau mahana hopea.
2 A faanaho maitai ia outou na mua roa ia nehenehe outou e haere i teie tamaaraa au maitai i te pae varua e toru mahana, mai te himene haamataraa e tae noa ˈtu i te pure faaotiraa. Ia rave outou i te mau faanahoraa no te haere i te tairururaa, a faaite i te here ma te haamanaˈo i te feia e hinaaro ra i te tauturu, te feia iho â râ tei anaanatae i te parau mau aita i maoro aˈenei, ia tae atoa ratou i te mau rururaa atoa. E mea faufaa roa ia hiˈopoa i te mau haamaramaramaraa i roto i teie api hau e te feia e haapii ra i te Bibilia e o outou e o te opua ra e haere i te tairururaa. (Gal. 6:6, 10) I te mahana pae, e haamata te porotarama e te upaupa i te 9 h 30 e e faaoti i te 4 h 30 i te ahiahi. I te mahana maa, e haamata ïa i te 9 h 30 e e faaoti, te himene e te pure atoa, i te 4 h 30 i te ahiahi. E haamata te rururaa o te sabati poipoi i te 9 h 30, e e faaoti te tairururaa i te hora 4 i te ahiahi. E tauturu te mau haamaramaramaraa i muri nei ia outou i roto i ta outou faaineineraa.
3 E mea matauhia e te rahiraa feia poro no te mau motu atea mai, e o te hinaaro ra i te vahi faaearaa i Tahiti nei i te mau taime tairururaa mataeinaa, e na ratou iho e rave nei i te mau faanahoraa ia fariihia ratou e te mau utuafare matauhia e ratou. No reira, te faaitoito nei matou ia ratou ia rave faahou i teie noâ mau faanahoraa taa ê i teie matahiti, no te mea e mea ohie roa ˈˈe. Ua faanahohia te hoê tuhaa haapao i te faaearaa no te feia e hinaaro ra i te tauturu i te pae nohoraa i te taime o te tairururaa.
4 Mau tupuraa taa ê: No te feia poro anaˈe, e ta ratou mau tamarii teie faanahoraa, e roo maitai to ratou e ua fariihia ta ratou aniraa e te tomite no te taviniraa o te amuiraa. E ara ïa te amuiraa i te haapao i teie mau taata e eiaha râ e vaiiho e na te tuhaa haapao i te faaearaa no te tairururaa e haapao i ta ˈna hopoia. E nehenehe te mau matahiapo aore ra te tahi atu mau melo o te amuiraa tei ite i to ratou huru oraraa e faaite i te here ma te horoa i te tauturu titauhia. E pinepine te reira i te titau e ia tapitapi te feia poro i te mau hinaaro o te mau tavini ma te taime taatoa, te feia paari aore ra hapepa, e te vai atu â. Ei hiˈoraa, e nehenehe ratou e tauturuhia ma te afai ia ratou aore ra ma te haapao maitai ia ratou na roto i te mau huru ravea ohie atoa.—Iak. 2:15-17; Ioa. 1, 3:17, 18.
5 Parau mau, e tutava te tuhaa haapao i te faaearaa ia imi i te nohoraa no te feia poro e mau hinaaro taa ê to ratou e eita te mau melo o ta ratou amuiraa e nehenehe e tauturu ia ratou. E faaite ïa teie mau taata poro i te taeae papai parau i te mau fifi o ta ratou e farerei nei. Na te taeae papai parau e aparau atu i te mau melo o te tomite no te taviniraa no te ite e nehenehe anei te amuiraa e tauturu i taua mau taata ra ia farii mai ia ratou i te fare i te roaraa o te tairururaa. Mai te peu e eita, e horoa ˈtu ïa oia ia ratou ra i te hoê aniraa “Demande de chambre pour cas particuliers.” Teie api parau no te feia anaˈe e mau hinaaro taa ê to ratou. Na te taata ani e faaî i te reira e e horoa ˈtu oia i te taeae papai parau, o te hiˈopoa e ua papai-pauroa-hia anei te mau haamaramaramaraa e mea tano anei, e te hinaaro mau ra anei te taata ani i te hoê vahi faaearaa; e tia ia FAATAA-MAITAI-HIA te mau tumu i roto i te area tei vaiihohia no taua tuhaa ra i nia i te api parau. Ia ravehia teie ohipa na mua aˈe i te tairururaa. I muri aˈe i te hiˈopoaraa a te tomite no te taviniraa, e hapono te taeae papai parau i te api parau i te piha o te tuhaa haapao i te faaearaa, o te farerei roa ˈtu i te taata ani.
6 EIAHA te feia e mau hinaaro taa ê to ratou e ani i te hoê piha ia tae ratou i te tairururaa, no te mea e tia i te tuhaa haapao i te faaearaa ia ite i te manaˈo o te tomite no te taviniraa o te amuiraa.
7 Ua faanahohia te faaearaa i te taime noa o te tairururaa eiaha râ no te tahi mau mahana hau e te tau faafaaearaa. Hau atu â, e ere i te mea tano ia faaohipa te feia ani ma te miimii i te farii maitai o te mau taeae ma te titau ia fariihia ratou na mua ˈˈe aore ra i muri iho i te tairururaa. E pûpûhia te faaearaa i TE TAIME NOA o te tairururaa. E tia i te feia e fanaˈo ra i teie huru faaearaa ia haapao maitai i te mau tauihaa a te fatu fare, eiaha e faaino, eiaha e haere i te mau vahi aita ratou i titauhia, e ia ara e ia na reira atoa ta ratou mau tamarii. Ia farerei noa ˈtu te mau fatu fare i te tahi fifi i roto i taua tuhaa ra, e tia ia ratou ia faaara oioi noa i te tuhaa haapao i te faaearaa.
8 Te feia o te haere i te tahi atu tairururaa: Te ravehia nei te mau faanahoraa no nia i te rahiraa parahiraa, te mau buka e te mau vea, te maa, te vahi faaearaa, e te vai atu â, ia au i te rahiraa taata poro o te haere i te tairururaa i reira ratou i te titau-manihini-raahia. No reira, te ani atu nei matou i ta outou turu amui no te faatura i te tatuhaaraa o te mau amuiraa i te mau tairururaa mataeinaa e rave rahi o te tupu i teie matahiti.
Na te tino matahiapo: Eiaha e taio i te rata no te 15 no titema 1995 a te Taiete, o te faaite ra i teihea tairururaa e titauhia te amuiraa, na mua ˈˈe i te putuputuraa no te taviniraa i te hebedoma no te 1 no tenuare. I muri aˈe i taua putuputuraa ra, a pine atu te rata i nia i te tabula. EITA e tia i te mau matahiapo ia faanuu i te mahana o te putuputuraa no te taviniraa no te faatupu oioi i te reira i taua hebedoma ra, taa ê noa ˈtu e te raterehia ra te amuiraa e te tiaau haaati. Mai te peu e e nehenehe, e hohora te taeae papai parau o te amuiraa i te mau tumu parau atoa e te mau parau faaara no nia iho i te tairururaa i roto i te mau putuputuraa no te taviniraa i mua, taa ê noa ˈtu i te tahi atu faaiteraa aore ra eita o ˈna e nehenehe e rave.