E faaite anaˈe ia vetahi ê i te tiaturiraa o te ora mure ore
1 Noa ˈtu e te imi nei te taata, mai mutaa iho mai, i te mau ravea no te faataere i te tereraa o te ruauraa e no te faaroa ˈtu â i to ˈna oraraa, eita noa iho â e nehenehe e ape i te ruauraa e te pohe. Te mauruuru nei tatou e te faataa maira te Bibilia e no te aha te taata e ruau ai e e pohe ai, oia atoa râ, nafea ia faaafarohia te mau faainoraa o te ruauraa e ia faaorehia te pohe! Te vai nei teie mau parau mau ma te papu maitai i roto i te buka ra Te ite e aratai i te ora mure ore. Te pahono ra teie buka ma te maramarama i te mau uiraa fifi roa no nia i te ora e i te pohe; te aratai ra oia i te taata taio i te tau e haamau-faahou-hia ˈi te Paradaiso.
2 I te avaˈe Mati, e pûpû tatou i te buka ra Te ite ma te tapao e haamata i te mau haapiiraa Bibilia i te fare o te taata. (Mat. 28:19, 20) I muri iho, e hoˈi tatou e hiˈo i te feia atoa e anaanatae i te poroi o te Basileia. Ia na reira tatou, e faaite ïa tatou ia vetahi ê i te tiaturiraa o te ora mure ore. (Tito 1:2) No te na reira, e riro paha te mau manaˈo tauturu i muri nei ei mea faufaa no outou.
3 I te farereiraa matamua, e nehenehe tatou e ui i teie uiraa e:
◼ “Ua uiui aˈena anei oe e no te aha te taata e hinaaro ai e ora maoro atu â? [A vaiiho i te taata ia pahono.] Te feia faaroo Buddha, te mau Kerisetiano, te feia faaroo Hindu, te mau Mahometa e vetahi atu, te tiaturi nei ratou paatoa e ora i muri aˈe i te pohe.” A iriti i te buka ra Te ite i te pene 6, “No te aha tatou e ruau ai e e pohe ai?” e a taio i te par. 3. A haaferuri ia au i te mau irava i faahitihia. A faahiti faahou i na uiraa e piti i te pae hopea o teie paratarapha, e a ani i te taata e e hinaaro anei o ˈna e ite i te mau pahonoraa. Mai te peu e oia, a tuatapapa ïa i te mau paratarapha i muri iho. Ua haamata ïa te hoê haapiiraa! Mai te peu e eita o ˈna e hinaaro, a vaiiho atu ïa i te buka ia taio oia, e a rave i te mau faanahoraa no te hoˈi mai, mea maitai aˈe hoê aore ra e piti mahana i muri iho, no te hiˈopoa i te mau pahonoraa.
4 E nehenehe tatou e parau atu i te hoê taata o tei farii i te buka ra “Te ite” e:
◼ “Ua hoˈi mai au no te hiˈopoa i na uiraa e piti no nia i te pohe o ta tâua i vaiiho ma te ore e pahono.” A faahaamanaˈo i taua nau uiraa ra i te taata. A tauaparau i muri iho, i te pene 6, i nia i te upoo parau iti ra “Te hoê opuaraa ino mau.” Ia au i te mau huru tupuraa, a faahaere i te haapiiraa i mua aore ra a haamau i te niu o te farereiraa i mua nei na roto i te faahitiraa i te uiraa i te pae hopea roa o te par. 7. A faanaho i te hoê taime farereiraa papu. A titau manihini atu i te taata ma te mahanahana ia haere mai i te Piha no te Basileia, na roto i te faataa-poto-noa-raa ˈtu ia ˈna i te tereraa o te mau putuputuraa a te amuiraa.
5 Na te mau uputa aore ra i roto i te pororaa faanaho-ore-hia, e nehenehe tatou e haamata i te parau e:
◼ “Ua uiui aˈena anei oe e eaha te tau i mua nei no tatou e no te fenua? [A vaiiho i te taata ia pahono.] Te faataa poto ra te Bibilia i te tau i mua nei na roto i te hoê noa taˈo: Paradaiso! Te faataa ra oia e ua faariro te Atua i te omuaraa i te hoê tuhaa o te fenua ei paradaiso nehenehe, i reira to ˈna tuuraa ˈtu i na taata faaipoipo matamua o ta ˈna i poiete. Ua titauhia i taua nau taata faaipoipo ra ia faaî i te fenua taatoa e ia faariro mǎrû noa ia ˈna ei paradaiso. A hiˈo na i te faataaraa o te huru paradaiso ahiri i tupu.” A iriti i te buka ra Te ite i te api 8, e a taio i te par. 9 i raro aˈe i te upoo parau iti ra “Te oraraa i roto i te Paradaiso.” A tauaparau i muri iho i nia i te mau manaˈo o te par. 10, e a taio i te irava i faahitihia, te Isaia 55:10, 11. A ani e e tauaparau orua i nia i te huru oraraa i roto i te Paradaiso o te haamau-faahou-hia e e tuatapapa i te mau par. 11-16. Aore ra a faaitoito i te taata ia taio i taua mau paratarapha ra e a faanaho i te taime farereiraa no te paraparau faahou.
6 Mai te peu e aita i haamatahia te hoê haapiiraa i te farereiraa matamua, e nehenehe ïa tatou e tamata i te hoˈi-faahou-raa e farerei, ma te parau e:
◼ “Mai ta tâua i parau i roto i ta tâua aparauraa i mairi aˈenei, te opuaraa a te Atua, o te faariroraa ïa i te fenua taatoa ei paradaiso. E uiraa ïa te hiti maira: Mai te aha te huru o te Paradaiso?” A iriti i te buka ra Te ite i te pene 1 e a tuatapapa i te mau par. 11-16 i raro aˈe i te upoo parau iti ra “Te oraraa i roto i te Paradaiso o te haamau-faahou-hia.” A faaite i muri iho i te hohoˈa i te mau api 4-5 e a ani i te taata e e hinaaro anei o ˈna e ora i roto i te hoê vahi nehenehe roa. A taio i muri iho i te pereota matamua o te par. 17, api 10. Ia au i te mau huru tupuraa, a faahaere i te haapiiraa i mua aore ra a parau atu ia ˈna e ia hoˈi mai tatou, e faataa tatou ia ˈna e eaha te mau titauraa e faaî no te ora i roto i te Paradaiso o te haamau-faahou-hia. A titau manihini i te taata ma te mahanahana ia haere mai i te Piha no te Basileia e a faataa ia ˈna i te porotarama o te mau putuputuraa.
7 E mauhaa maitai roa te buka ra Te ite no te faaite i “te ora mure ore” i tǎpǔhia e te Atua. Na roto i te faatereraa i te mau haapiiraa Bibilia i te fare o te taata, e nehenehe tatou e faaite i taua tiaturiraa faahiahia roa ra i faauruahia mai e te Atua o “te ore e tia ia haavare.”