E hoˈi faahou anaˈe e farerei i te mau taata tei anaanatae
1 I te matararaa mai te buka ra Te ite e aratai i te ora mure ore, ua faataa te taeae orero ia “hope anaˈe teie buka, ua navai maitai te ite o te mau taata aau rotahi ia nehenehe ratou e tia ˈtu no Iehova e e bapetizo ia ratou.” Ua neneihia teie buka no te haapii oioi i te parau mau. Te horoa ra oia i te mau haamaramaramaraa papu o te turai i te mau taata ia haere i mua i te pae varua. Te hohora ra oia i te parau mau ma te manaˈo maitai, ma te ore e haamâuˈa i te taime i nia i te mau haapiiraa tumu hape. Te titau ra te faaohiparaa aravihi i teie buka ia hoˈi faahou e farerei i te feia tei anaanatae.
2 Mai te peu e ua paraparau tatou i te hoê taata aita o ˈna e tiaturi i te Atua e mea anaanatae râ o ˈna, e nehenehe tatou e haamata i te aparauraa ma te faaite atu i te hohoˈa i te mau api 4 e 5 o te buka e parau atu ai e:
◼ “I to ˈu haereraa mai i te taime i mairi aˈenei, ua mataitai na tâua i teie hohoˈa nehenehe o te faaite ra i te mau huru tupuraa oaoa o te oraraa. Teie ïa te uiraa i papaihia: ‘Eaha te tia ia oe ia rave no te fanaˈo i te reira?’ Eaha to oe manaˈo? [E vaiiho tatou i te taata ia pahono.] Te faataa maitai ra te Bibilia i te hoê titauraa faufaa roa. [E taio tatou i te Ioane 17:3.] E mea faufaa roa te ite ia faatupu tatou i te faaroo i te Atua. Te ravea faahiahia roa no te haapii i te mea e titauhia ra ia tatou o te hoê haapiiraa hohonu o te Bibilia ïa.” E hohora tatou i te buka i te pene matamua e e haamatara tatou i te tahi mau manaˈo faaitoito i roto i te mau paratarapha 1 tae atu i te 5. E faataa tatou e nafea tatou ia faatere i te hoê haapiiraa bibilia, e e ani tatou e e hoˈi faahou mai tatou no te faahaere â i te aparauraa.
3 Ia hoˈi faahou mai tatou ma te hinaaro e faahaere â i ta tatou aparauraa no nia i te faatiaraa te Atua i te ino, e nehenehe tatou e parau e:
◼ “I to ˈu haereraa mai, ua paraparau tâua no nia i te [e faahaamanaˈo tatou i te fifi ta tatou i faahiti na]. No reira ïa tâua i uiui ai e no te aha te Atua i faatia ˈi i te mau mauiui i roto i te ao nei. Eaha ˈtura ta oe faaotiraa? [E vaiiho tatou i te taata ia pahono.] E manaˈo faaitoito te iteraa e e ere o te Atua te tumu o teie mau huru tupuraa mauiui.” E hohora tatou i te buka Te ite e aratai i te ora mure ore i te mau api 71-2 e e paraparau tatou no nia i te mau manaˈo bibilia i roto i te mau paratarapha 3 tae atu i te 5. E ani tatou e e hoˈi faahou mai tatou no te faataa, e no te aha tatou e tiaturi ai e fatata roa te taime e ore roa te Atua e faatia faahou i te mau mauiui.
4 Mai te peu e e metua te taata ta tatou e hoˈi faahou ra e farerei e te anaanatae ra o ˈna i te oraraa utuafare, e nehenehe tatou e parau e:
◼ “I te mea hoi e e metua tane oe (aore ra e metua vahine), te hinaaro nei iho â oe i te mea maitai aˈe no ta oe mau tamarii. No te mea râ eita oe e nehenehe e paruru ia ratou i te mea ino, e tia ïa ia oe ia haapii ia ratou e nafea ia faaruru i te mau fifi o te oraraa. I to oe manaˈoraa nafea ïa oe? [E vaiiho tatou i te taata ia pahono.] Te hoê ohipa faufaa roa ˈˈe ta te mau metua e nehenehe e horoa na ta ratou mau tamarii, o te hoê ïa haapiiraa maitai.” E hohora tatou i te buka Te ite i te mau api 145-6 e e huti tatou i te ara-maite-raa i nia i te mau aˈoraa ohie a te Bibilia; e haapapu tatou i to ratou faufaaraa e te mau haamaitairaa e fanaˈohia ia faaohipahia te reira. E ani tatou e e hoˈi faahou mai tatou no te faaite e nafea ia faaohipa i te buka ia nehenehe tatou e ora i te hoê oraraa utuafare oaoa.
5 Ia hoˈi faahou anaˈe tatou e farerei i te hoê taata o ta tatou i faaite poto noa te poroi, e nehenehe tatou e parau e:
◼ “Aita roa ˈtu te Atua i opua noa ˈˈe e ia ruau e ia pohe tatou. Ua hinaaro o ˈna e ia ora tatou e a muri noa ˈtu i roto i te hoê paradaiso i nia i te fenua nei.” E faataa tatou i te hohoˈa i te mau api 188-9. E taio tatou i te paratarapha 11 i te api 184. E faanaho tatou i te hoê taime no te tahi atu farereiraa.
6 Ua riro mau â teie buka ei ravea hau ta Iehova e faaohipa ra no te ‘faaoioi’ i te ohipa haaputuputuraa e ravehia ra i teie mau mahana hopea (Isa. 60:22, MN). Mai te peu e e faaohipa tatou i te buka ma te aravihi, e horoa ïa tatou i te hoê ite e nehenehe ai te hoê taata e fanaˈo i te ora mure ore.