E pûpû anaˈe i te buka ra Te ite e aratai i te ora mure ore
1 Auê tatou i te oaoa e i te matararaa mai te buka ra Te ite e aratai i te ora mure ore (farani). Ua neneihia teie buka no te tauturu i te mau taata ia noaa oioi i te hoê ite papu no nia i te parau mau. A tahi ra ïa tatou e pûpû ai i te reira i te avaˈe titema i roto i ta tatou tuhaa fenua. Eaha ta tatou e parau no te faaara i te anaanatae o te mau taata?
2 Teie te hoê faaiteraa o te nehenehe e faaara i te anaanatae o te mau taata tei paruparu te faaroo i te Atua:
◼ “Te ite nei e rave rahi taata o tei tiaturi noa na i te Atua e ere to ratou faaroo i te mea puai roa mai mutaa ihora. I to oe manaˈoraa, eaha te tumu? [E vaiiho tatou i te taata ia pahono.] E puaihia to tatou faaroo ia manaˈonaˈo anaˈe tatou i te mau ohipa maere roa o te reva teitei. [E taio tatou i te Salamo 19:1.] Te horoa atoa mai ra Tei haamau i te mau ture o te faatere ra i te mau taoˈa o te raˈi, i te mau aratairaa faufaa roa. [E taio tatou i te Salamo 19:7-9.] Te faaite ra teie mau irava e mea faufaa ia haapii tatou i te mau mea atoa no nia i te Atua e ta ˈna mau opuaraa. [E huti tatou i te ara-maite-raa i nia i te hohoˈa i te mau api 4 e 5, e e taio i te mau pereota i papaihia.] Mai te peu e e hinaaro oe e fanaˈo i teie ite taa ê mau, e oaoa ïa vau i te pûpû atu i teie buka.”
3 A manaˈo noa ˈi i te tahi fifi apî tei tupu, e nehenehe tatou e parau e:
◼ “Ua faarooroo na paha oe i te [e faahiti tatou i te ohipa tei tupu]. Ua uiui aˈena anei oe e mai te peu e te haapao mau ra te Atua i te parau-tia ore e te mau mauiui ta tatou e ite nei aore ra e farerei nei paha? [E vaiiho tatou i te taata ia pahono.] Te haapapu mai ra te Bibilia ia tatou e te here nei te Atua ia tatou e e tauturu o ˈna ia tatou i roto i te mau taime fifi.” E taio tatou i te tahi mau tuhaa o te Salamo 72:12-17. E hohora tatou i te buka i te api 70, e e parau tatou e te pahono ra teie buka, Te ite e aratai i te ora mure ore, i te hoê uiraa o ta te mau mirioni taata e uiui ra: No te aha te Atua e faatia ˈi i te mauiui? “E ite oe i te pahonoraa mahanahana a te Bibilia i teie uiraa. Te hinaaro nei au e vaiiho mai i teie buka ia nehenehe oe iho e ite atu i te reira.”
4 Ia farerei anaˈe tatou i te hoê metua tane aore ra te hoê metua vahine, e paraparau tatou no nia i te utuafare:
◼ “Te farii nei te rahiraa o te mau metua e mea fifi roa ia faatupu i te hoê oraraa utuafare oaoa. I to oe manaˈoraa, eaha te mau fifi matamua? [E vaiiho tatou i te taata ia pahono.] Te rave nei tatou i te mea maitai aˈe, te hinaaro nei râ tatou paatoa e ite i te mea e nehenehe e tauturu ia tatou ia noaa faahou i te mau faahopearaa maitatai. Te horoa nei te Bibilia i te mau aˈoraa faahiahia roa. [E taio tatou i te tahi mau tuhaa o te Kolosa 3:12, 18-21.] Mea rahi te manaˈo o te Bibilia no nia i teie tumu parau, mai tei haapapuhia i roto i te pene 15 o teie buka, ‘Te faatupuraa i te hoê utuafare o te faahanahana i te Atua.’ Te tahoê nei oia i te mau aˈoraa a te Bibilia e nafea ia faatitiaifaro i te mau fifi i rotopu i te mau hoa faaipoipo e ia tauturu i ta tatou mau tamarii ia faaruru i to ratou mau fifi. Ua papu ia ˈu e e anaanatae oe i te taio i te buka.”
5 Ia hinaaro anaˈe tatou e haapoto noa, e nehenehe tatou e haamata mai teie e:
◼ “Aita anei oe i uiui aˈena e no te aha tatou e ruau ai e e pohe ai? Te faataa ra te pene 6 o teie buka e eaha te tumu o te pohe e nafea te Atua ia faaore i te reira. Te parau ra te Bibilia e ua tǎpǔ te Atua i te ora mure ore no te feia e here ra ia ˈna. [E taio tatou i te Ioane 17:3.] Mai te peu e e hinaaro oe e ite hau atu â, e oaoa oe i teie buka o te haapii rahi mai.”
6 Mai te peu e ua ineine maitai tatou, e nehenehe ïa tatou e faaohipa i teie buka no te ‘tatara i te auraa o te mau parau i papaihia’ i to tatou taata-tupu, o te faaoaoa rahi ia ratou.—Luka 24:32.