E haamau anaˈe i te hoê tapao i roto i ta tatou mau hoˈi-faahou-raa e farerei
1 Ia hoˈi faahou tatou e farerei i te hoê taata, e tutava anaˈe i te faaohipa i te hoê irava o te faarahi i te ite e vai ra i te taata no nia i te tumu parau bibilia o ta tatou i tauaparau na.
2 Hoê o te mau tumu o te mau hoˈi-faahou-raa e farerei i to tatou vaiihoraa i te mau vea o te haamauraa ïa i te hoê eˈa opereraa vea. Mea aravihi te hoê faaiteraa ohie mai teie:
◼ “Mea maitai e ua au oe i te taioraa i te tumu parau [a faahiti i te upoo parau], i roto i Te Pare Tiairaa o ta ˈu i vaiiho atu na oe. I teie nei mahana ua afai mai au i te hoê tumu parau o te A ara mai na! no nia i te ...” I muri aˈe i te taioraa i te hoê irava bibilia, e nehenehe tatou e parau faahou e: “Mai te peu e e farii outou i teie vea, e faaitoitohia oe e te tiaturiraa papu ta te Parau a te Atua e pûpû ra.” E parau tatou i muri iho e e afai mai tatou i te mau vea apî e e tauaparau paha faahou tatou no nia i ta te Atua i tǎpǔ no te mau taata faaroo. E haamanaˈo anaˈe e i te mau taime atoa e afai ai tatou i te mau vea i te hoê taata, e nehenehe tatou e taio i te hoê hoˈi-faahou-raa e farerei.
3 Mai te peu e ua vaiiho tatou i te vea i raro aˈe i te upoo parau “Afea te mǎtaˈu e hope ai?” e nehenehe tatou e parau e:
◼ “Eaha te huru o te oraraa mai te peu e e mou roa te mǎtaˈu? [A vaiiho i te taata ia pahono.] A hiˈo na e eaha ta te Atua e opua ra i te rave.” A taio i te Salamo 37:10, 11, e a faataa i te mau huru tupuraa o te haamauhia i nia i te fenua ia faatupu-anaˈe-hia te hinaaro o te Atua. A faahaamanaˈo i te taata no nia i te mau mea o ta Iesu i haapii i ta ˈna mau pǐpǐ ia pure, ia au i te Mataio 6:9, 10. A haaferuri ia ˈna no nia i te auraa o te mau parau a Iesu. Mai te peu e te faaite mau ra te taata i te anaanatae, e nehenehe tatou e pûpû atu i te tamatahitiraa i Te Pare Tiairaa aore ra te A ara mai na! e e rave i te mau faanahoraa no te hoˈi faahou mai e tauaparau ia ˈna.
4 Mai te peu e e hoˈi faahou mai tatou no te tauaparau no nia i te tumu parau “Te haapiiraa tumu ore tei faahitimahuta i te ao nei—Eaha ta ˈna i vaiiho mai?” e nehenehe tatou e haamata i te parau mai teie:
◼ “I te taime i mairi aˈenei, ua tauaparau tatou no nia i taua haapiiraa ra o tei faahitimahuta i te ao nei. Mai ta oe paha i ite i roto i te mau tumu parau o te A ara mai na! mea maramarama maitai te Parau a te Atua no nia i te tumu o te ora. Eaha to oe manaˈo? [A vaiiho i te taata ia pahono.] Te faaite atoa ra te Bibilia e te opua ra te Atua i te hoê mea faahiahia roa ˈˈe no te taata.” A taio i te Ioane 17:3, e a parau atu e e nehenehe te ite e aratai i te ora mure ore. I taua faito ra, e pûpû anaˈe i te hoê haapiiraa bibilia aore ra e rave anaˈe i te hoê farereiraa no te tahi atu tauaparauraa bibilia.
5 E tapao faufaa roa te haamataraa i te hoê haapiiraa bibilia no ta tatou taviniraa. Peneiaˈe ua hoˈi tatou e farerei e rave rahi taime i te hoê taata o te farii ra i te mau vea. No te aha eita tatou e parau mai teie ia farerei faahou tatou i taua taata ra:
◼ “Ua rau te manaˈo o te mau taata no nia i te haapaoraa e to ˈna faufaaraa i roto i te oraraa o teie nei tau. Aita te mau tiaturiraa no nia i te mau tumu e farii noa ˈi te Atua i te ino aore ra te tumu o te ruhiruhiaraa e te pohe e tuea ra. Te hinaaro atoa ra vetahi e ite e eaha te tia ia rave ia faaroo te Atua i ta ratou mau pure.” A tatara i te hoê o te mau buka tei faaineinehia no te haapiiraa o te Bibilia i roto i te hoê tuhaa e tuatapapa ra i te hoê tumu parau, e au ra e, o te faaanaanatae i te taata, a faaite poto noa e mea nafea tatou ia faatere anaˈe i te hoê haapiiraa.
6 Te haamau nei Iehova i te tahi mau tapao. E apee anaˈe ia ˈna i te avaˈe atopa ma te haamau i te hoê tapao i roto i ta tatou mau hoˈi-faahou-raa e farerei.