Te hoê buka o tei faaoaoa ia tatou paatoa:
Te tuu nei te buka apî i te tapao i nia i te ite o te Atua
1 Ua au roa tatou i te taatoaraa o te mau oreroraa parau i ta tatou tairururaa mataeinaa i mairi aˈenei! I te mahana maa avatea, ua oaoa roa tatou i te faahitiraahia e ua matara mai te buka apî oia hoi Te ite e aratai i te ora mure ore (farani) e i muri iho ua horoahia te tahi mau haamaramaramaraa no nia i teie buka. Te hinaaro nei e tau miria taata i te ite o ta te Atua anaˈe e nehenehe e afai: te ite o te Atua e o ta ˈna Tamaiti, o Iesu Mesia.—Mas. 2:1-6; Ioane 17:3.
2 Ua faaite te taata orero i te tahi mau tuhaa ma te oraora maitai. E anaanatae vetahi ia taio i te tahi mau tuhaa: te mau tumu parau faufaa roa o te mau pene, te mau faahohoˈaraa ohie, te faaiteraa i te parau mau ma te manaˈo maitai, te mau uiraa ohie e, i te hopearaa o te mau pene tataitahi, te vai ra te hoê tumu parau tarenihia “A hiˈopoa na i to oe ite.” Tera râ e mea faufaa iho â no te mau taata haapii, o te nehenehe e ite oioi i te mau haapiiraa faufaa roa o te Bibilia.
3 I te roaraa o te mau oreroraa parau hopea o te mahana maa e te sabati, ua faaitoitohia tatou ia faaohipa i teie buka apî i roto i ta tatou haapiiraa utuafare. I teie nei, ua haamatau mau â tatou i te mau mea i roto i te buka. Hau atu â, ua tauaparau iho â tatou i nia i te mau manaˈo o ta tatou e tia ia haamanaˈo e ia pûpû anaˈe i roto i te pororaa.
4 Te tahi mau faahaamanaˈoraa: Peneiaˈe te haamanaˈo ra tatou e, i roto i te oreroraa parau “No te aha te huitaata e hinaaro ai i te ite no nia i te Atua,” ua faataa te taeae orero i te tahi mau manaˈo: 1) Ia faaohipa tatou i teie buka no te faatere i te mau haapiiraa, aita i faataahia ia rave i te mau faaiteraa i rapaeau i te buka, no te mea e nehenehe te reira e faafariu ê i to tatou tiaturiraa i te mau tumu parau faufaa roa e huna i te mau manaˈo matamua; e tutava anaˈe râ ia taa i te mau manaˈo o te pene tataitahi. 2) E ere te mau pene i te mea roroa roa, o ta tatou ïa e tia ia rave ia nehenehe hoi tatou e haapii i te hoê pene taatoa i te haapiiraa hoê. 3) I te pae hopea o te pene tataitahi, e nehenehe te mau uiraa o te tumu parau tarenihia “A hiˈopoa na i to oe ite” e faatupu i te hoê hiˈo-faahou-raa poto.
5 E faaohipa anaˈe i roto i te mau haapiiraa bibilia: Ua ani e rave rahi feia poro e e tia anei ia ratou ia taui i te buka e ia hiˈopoa i te buka apî e ta ratou mau taata haapii. Mai te peu e tei mua roa te haapiiraa i nia i te buka o ta outou e faaohipa ra i teie nei, e mea maitai aˈe ia faaoti roa i te haapii i te reira. Mai te peu râ e aitâ, te faaitoito nei matou ia outou ia rave i te buka ra Te ite. Mai te peu e ua haamata outou i te hoê haapiiraa bibilia ia au i te hoê vea iti aore ra te hoê api parau iti, a faaite i te buka apî i te taime tano e a faaohipa ˈtu i roto i te hoê haapiiraa bibilia. I te mau avaˈe i mua nei, e faaite hau atu Te taviniraa o te Basileia i te mau haamaramaramaraa no nia i te faaohiparaa i te buka Te ite.
6 Ua tuu mai o Iehova i teie buka na tatou nei no te tauturu ia tatou ia haapii i to tatou taata-tupu no nia i te ite e aratai i te ora mure ore. I teie nei, e tia ia tatou ia faaineine maitai e ia rohi taatoa i roto i te ohipa e toe ra.