E faatupu anaˈe i te maitai i nia i to tatou taata-tupu ma te atuatu i te anaanatae
1 I nia i teihea tumu e faaoti ai tatou e vaiiho i te hoê buka i te hoê taata? I nia ïa i te hoê tumu faufaa mau oia hoi: to ˈna anaanatae. Tei nia i te hoê â tumu tatou e hoˈi ai e hiˈo i te mau taata. Ia hiˈo anaˈe tatou e te anaanatae ra te hoê taata, noa ˈtu e maa vahi iti noa, i te poroi no te Basileia, te faatupu nei tatou ma te taatoa i ta tatou e nehenehe no te rave i te maitai i nia ia ˈna. No reira ïa tatou e hoˈi faahou ai e farerei ia ˈna, ma te hinaaro e atuatu i to ˈna anaanatae e e haamata i te hoê haapiiraa bibilia. Tera ïa ta tatou tapao noa ˈtu e eita tatou e vaiiho i te buka. Nafea ïa tatou?
2 Mai te peu e ua paraparau na tatou no nia i te maraaraa o te mau fifi i roto i te faaipoiporaa e ua vaiiho na tatou i te buka “E ora e a muri noa ˈtu,” e nehenehe tatou e haamata faahou i te aparauraa:
◼ “I te farereiraa i mairi aˈenei, ua paraparau tâua no nia i te faaipoiporaa e i te mau aˈoraa ohie a te Bibilia o te nehenehe e faaoaoa ia tatou. Aita anei oe e manaˈo ra e te farerei atoa nei te mau utuafare maitai roa ˈˈe i te mau fifi i te tahi mau taime? [E vaiiho tatou i te taata ia pahono mai.] Te horoa nei te Bibilia i te mau aˈoraa maitai roa e nafea ia faatitiaifaro i te mau fifi o te utuafare. E mea maitai ïa ia haapii i te Bibilia e te utuafare.” E tatara tatou i te buka i te api 246 e e faataa anaˈe i te paratarapha 23. E taio tatou i te Ioane 17:3, e e tauturu tatou i te utuafare ma te haapii i te Bibilia i ǒ ratou.
3 Mai te peu e ua paraparau tatou no nia i te mau tamarii e no nia i te faufaaraa e horoa no ratou i te hoê haapiiraa maitai, e nehenehe tatou e parau faahou mai teie:
◼ “I te taime i mairi aˈenei, ua faataa tâua e e tia i te mau tamarii ia noaa i te hoê haapiiraa i te pae varua e e mea nafea atoa to ratou mau metua e nehenehe ai e horoa ˈtu te reira. Te vai ra te tahi mau metua o ta ˈu i farerei o te haapeapea ra no te mea e rave rahi mau taurearea e haerea ino to ratou. E oe, eaha to oe manaˈo no nia i te...? [E faahiti tatou i te hoê hiˈoraa o te ohipa ino a te mau taurearea e ite-pinepine-hia i roto i te vahi faaearaa e e vaiiho tatou i te taata ia pahono mai.] A vaiiho na ia ˈu ia faaite atu ia oe i te tahi mau aˈoraa ohie i roto i te Bibilia.” E tatara anaˈe i te buka E ora e a muri noa ˈtu i te api 246, e te paratarapha 22, e aparau tatou i te manaˈo matamua e e taio atu ai i te Ephesia 6:4. E faaite tatou e te hinaaro nei te mau tamarii i te aˈoraa e i te aratairaa e, ia haapao anaˈe te mau metua i te horoa ˈtu na ratou, e mea oaoa aˈe te mau taurearea e te faatura. E faataa tatou e mea nafea tatou ia haapii i te Bibilia e ta tatou mau tamarii.
4 Mai te peu e ua paraparauhia no nia i te Paradaiso i nia i te fenua nei, e faaara faahou tatou i te anaanatae ma te parau:
◼ “Ua hiˈo na tâua i te tahi mau hohoˈa o teie buka o tei haaferuri ia tâua mai teihea te huru te fenua ia faarirohia oia na te Atua ei paradaiso. Eita râ tatou e oaoa taatoa mai te peu e e fanaˈo tatou i teie paradaiso e aita te mau taata herehia e tatou i pihai iho mai. E ere anei to oe manaˈo atoa teie?” E vaiiho tatou i te taata ia pahono mai. I muri aˈe e hohora tatou i te buka E ora e a muri noa ˈtu i te api 162. E taio tatou i te Apokalupo 21:3, 4, e e faataa tatou e mea nafea te mau taata o ta tatou e here nei e nehenehe ai e vai noa i pihai iho ia tatou. Mai te peu e e faaroo te taata, e taio tatou i te Ioane 5:28, 29 no te faaite e hoˈi mai iho â te mau taata pohe i te ora. Ma te tohu i nia i te api matamua o te buka, e parau tatou: “E mea papu mau teie: e nehenehe e ora e a muri noa ˈtu i nia i te hoê fenua o te riro mai ei paradaiso!” E faanaho tatou i te hoê taime farereiraa no te hoˈi faahou e hiˈo i te taata e no te faaite ia ˈna i te mea e manaˈo ai tatou e te piri maira te Paradaiso.
5 Te tumu matamua o te hoê hoˈi-faahou-raa e farerei oia hoi te faaiteraa i te poroi o te Basileia i te mau taata atoa o te anaanatae ra. E mea varavara te mau taata e ore e hinaaro i te hoê faaitoitoraa no te hiaai i te mau ohipa i te pae varua. E huti tatou i te ara-maite-raa i nia iho i te mau manaˈo papu e te ohie e vai ra i roto i te mau buka, ma te faaite i te faufaaraa ia taa maitai i te Bibilia. Ia na reira anaˈe tatou i roto i ta tatou mau hoˈi-faahou-raa e farerei, te faatupu ra ïa tatou i te maitai i nia ia vetahi ê na roto i te hoê raveraa maitai roa ˈˈe.