E tauturu anaˈe ia vetahi ê ia noaa ia ratou i te mau haamaitairaa
1 Te tǎpǔ ra o Iehova e haapii o ˈna ia tatou o ta tatou e tia ia ite. I roto i te Salamo 32:8, te tǎpǔ ra o ˈna ia tatou: “E haapii atu vau ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.” Ua riro teie haapapuraa no tatou ei pu no te mau haamaitairaa rahi. Ma te haapae ia ˈna iho, te hinaaro ra tatou e faaite i to tatou taata-tupu eaha mau na te mau vahi maitai o ta ˈna e noaa ma te pee i te mau aˈoraa paari a te Bibilia (Isa. 48:17). O ta tatou ia ohipa e rave ma te pûpû i teie buka E ora e a muri noa ˈtu i te avaˈe setepa. I roto i ta tatou mau faaiteraa, e nehenehe tatou e faaite na roto e rave rahi mau ravea i te faufaaraa o te Bibilia.
2 No te mea hoi e e rave rahi mau fifi i roto i te faaipoiporaa i to tatou nei tau, e nehenehe tatou e faaite i teie manaˈo na roto i te buka “E ora e a muri noa ˈtu”:
◼ “Te rahiraa o te mau taata o ta ˈu i paraparau, te haapeapea ra ratou no nia i te maraaraa maere mau o te mau fifi i roto i te faaipoiporaa e te numera o te mau faataaraa. Eaha to oe manaˈo no nia i teie huru tupuraa? [E vaiiho tatou i te taata ia pahono mai.] E rave rahi mau taata o te ore e taa ra i te mau tumu hohonu o teie mau fifi. Ahiri e e rave te mau hoa faaipoipo i te mau tutavaraa papu, e faaora mai ratou i to ratou faaipoiporaa, hau atu â râ e ite ratou i te oaoa mau. E nehenehe te faaohiparaa i te mau aˈoraa e vai ra i roto i te Bibilia e tauturu mai ia ite i te hoê faaipoiporaa oaoa.” E taio tatou i te Ephesia 5:28, 29, 33. E tatara tatou i te buka i te api 243, e hiˈopoa tatou i te mau paratarapha 16 e te 17, e e pûpû atu ai i te buka.
3 Te hinaaro nei te mau tamarii e ia horoa mai to ratou mau metua i to ratou taime maitai roa e ia ara i te haapiiraa ia ratou. Ma te pûpû i teie buka “E ora e a muri noa ˈtu,” e nehenehe tatou e parau:
◼ “Te hinaaro nei tatou paatoa i te maitai no ta tatou mau tamarii. I to oe manaˈo, eaha mau na te ravea maitai roa ˈˈe no te mau metua ia faaineine i ta ratou mau tamarii no te hoê oraraa maitai no a muri atu? [E vaiiho tatou i te taata ia pahono mai.] E faaroo anaˈe i te aˈoraa o te horoahia ra na teie maseli a te Bibilia papaihia fatata e 3 000 matahiti i teie nei. [E taio anaˈe i te Maseli 22:6.] Noa ˈtu e e huti ta tatou mau tamarii i te maitai rahi na roto i te haapiiraa o ta ratou e fanaˈo nei i te fare haapiiraa, na te mau metua, i roto i te utuafare, e horoa ia ratou i te faaineineraa maitai roa ˈˈe. E titau te reira i te taime, te ara-maite-raa e te here, tera râ e tia mau â ia tutava.” E tatara anaˈe tatou i te buka i te api 245 e e hiˈopoa tatou i te mau paratarapha 20 e te 21. I muri iho, e faataa tatou mea nafea e nehenehe ai e faaohipa i teie buka no te haapii i te Bibilia e te utuafare.
4 Peneiaˈe e hinaaro tatou e pûpû atu i te buka “E ora e a muri noa ˈtu” ma te faataa e e riro mai te fenua ei paradaiso:
◼ “Te uiui nei oe ma te papu maitai e eaha mau na te huru oraraa o te faaineinehia no tatou no a muri aˈe. I roto i te pure To matou Metua, ua haapii mai o Iesu ia tatou ia pure ia haapaohia te hinaaro o te Atua i te fenua nei, mai to te raˈi atoa ra. Mai teihea te huru o te fenua ia tupu anaˈe teie mau parau? [E vaiiho tatou i te taata ia pahono mai.] Teie te hoê hohoˈa faaiteraa i taua fenua tei riro mai ei paradaiso. [E faaite tatou i te hohoˈa i te mau api 12 e te 13. E taio anaˈe i te Isaia 11:6-9, faaitehia i te paratarapha 12.] E ere anei e mea oaoa e ora i roto i teie huru oraraa? Te faataa ra teie buka e eaha te mau titauraa ia faaî e nehenehe ai to outou utuafare e o outou iho e ora i roto i teie paradaiso.”
5 E mea faufaa ia faaineine i ta tatou faaiteraa mai te peu e e hinaaro tatou e manuïa na te mau fare. Na mua ˈˈe e patoto ai, ia vai ineine noa tatou no te faaite i te hoê manaˈo o te Bibilia papu mau. Ia vai noa i roto i to tatou feruriraa i te hoê tumu parau rii poto no nia i te hoê manaˈo anaanatae o te vea aore ra o te api parau iti o ta tatou e hinaaro ra e pûpû ia ore anaˈe te taata e farii i te buka. I te roaraa o te avaˈe setepa, e faaohipa anaˈe i te mau taime atoa no te ueue i te mau huero no te Basileia (Koh. 11:6). Oia mau, e tauturu tatou i to tatou mau taata-tupu ia noaa ia ratou i te mau haamaitairaa mure ore.