E pûpû anaˈe ma te aravihi i te buka ra E ora e a muri noa ˈtu
1 E taata aravihi roa o Iesu i roto i te faaohiparaa i te mau omuaraa parau. Ua ite o ˈna eaha te parau no te faaara i te anaanatae o te mau taata. I te hoê mahana, ua haamata o ˈna i te hoê aparauraa e te hoê vahine no Samaria na roto noa i te aniraa ˈtu i te pape no te inu. Ua huti oioi te reira i to ˈna ara-maite-raa, no te mea ‘aita te mau ati Iuda e au maitai i to Samaria.’ Ua tauturu te aparauraa i faatupuhia i te pae hopea i taua vahine ra e te tahi atu mau taata ia riro mai ei feia faaroo (Ioane 4:7-9, 41). E nehenehe tatou e huti mai i te hoê haapiiraa na roto i te hiˈoraa o Iesu.
2 Ia faaineine anaˈe tatou ia tatou no te pûpû i te buka ra E ora e a muri noa ˈtu, e ui tatou e: ‘Eaha te mau tapitapiraa matamua o te mau taata o ta tatou tuhaa fenua? Eaha te tumu parau e faaanaanatae i te hoê taurearea, te hoê ruhiruhia, te hoê tane aore ra te hoê vahine faaipoipo?’ E nehenehe tatou e faaineine e rave rahi omuaraa parau e e faanaho ia faaohipa i te omuaraa e tano maitai i te huru tupuraa.
3 I te mea e rave rahi taata o te haapeapeahia ra e te ino-roa-raa o te oraraa utuafare, e nehenehe tatou e parau e:
◼ “Ua riro te mau haapeapearaa o te oraraa i te mau mahana atoa ei tamataraa fifi mau no te mau utuafare. Ihea ratou e ite ai i te tauturu? [A vaiiho i te taata ia pahono.] E nehenehe mau te Bibilia e tauturu ia tatou. [A taio Timoteo 2, 3:16, 17.] Te horoa ra te mau Papai i te mau aˈoraa faufaa ia nehenehe te mau utuafare e faaruru i te mau haapeapearaa. A hiˈo na eaha ta teie buka, E nehenehe oe e ora e a muri noa ˈtu i roto i te paradaiso i nia i te fenua nei e parau ra i te paratarapha 3 api 238.” E taio tatou i te paratarapha 3 e e pûpû atu ai i te buka.
4 Mai te peu e e faahiti tatou i te hoê parau apî, e nehenehe tatou e parau e:
◼ “Ua faaroo anei oe i te parau apî no nia [a faahiti i te hoê tupuraa e faaanaanatae i te mau taata o te tuhaa fenua]? Eaha to oe manaˈo? [A vaiiho ia pahono.] Te uiui nei tatou e te haere nei te ao ihea ia ite anaˈe tatou i te reira, e ere anei? Ua faaite te Bibilia e e riro teie mau huru tupuraa ei haapapuraa e te ora nei tatou i te mau mahana hopea.” E nehenehe tatou e faaite i muri iho eaha ta te buka ra E ora e a muri noa ˈtu e parau ra i te mau api 150-3.
5 E rave rahi taata o te haapeapea nei no te maraaraa o te taparahiraa taata. E nehenehe tatou e faaohipa i te omuaraa parau matamua i raro aˈe i te upoo parau iti “Taparahiraa taata/Oraraa ma te ino ore,” i te api 11 o te buka ra “Comment raisonner”:
◼ “Te tauaparau nei matou e te mau taata ta matou e farerei nei no nia i te inoraa te oraraa. Te tupu nei e rave rahi taparahiraa taata na pihai iho ia tatou, o te ohipa ra i nia i to tatou oraraa. Ia manaˈo anaˈe oe e nehenehe anei tatou e haere e ori i te po i roto i te aroâ ma te ino ore ia tae i te hoê mahana?” E nehenehe tatou e taio i te Salamo 37:10, 11 e e haapapu i te mau haamaitairaa afaihia mai e te Basileia o te Atua ma te faaohipa i te mau api 156-8 o te buka E ora e a muri noa ˈtu.
6 Mai te peu e e hinaaro tatou i te hoê omuaraa parau ohie roa ˈˈe, e nehenehe tatou e faaohipa i te piti o te upoo parau iti “Oraraa no a muri aˈe/Oraraa ma te ino ore,” i te api 10 o te buka “Comment raisonner”:
◼ “Te faaitoito nei matou i to matou mau taata tapiri ia hiˈo i te oraraa faahiahia roa no a muri aˈe ta te Bibilia e tǎpǔ ra ia tatou. [A taio Apokalupo 21:3, 4.] Te faaoaoa ra anei teie huru tiaturiraa ia oe? [A vaiiho ia pahono.] Te faaite ra te pene 19 o teie buka i te tahi atu â mau haamaitairaa o ta te feia faaroo e fanaˈo i raro aˈe i te faatereraa a te Basileia o te Atua.” Mai te peu e e anaanatae te taata, e pûpû tatou i te buka E ora e a muri noa ˈtu.
7 E farerei ïa tatou i te feia e hiaai rahi ra i te parau-tia na roto i te faaineineraa i te hoê omuaraa parau aravihi.—Mat. 5:6.