Ia faaohipa maitai tatou i te mau buka tahito
1 Te horoa rahi nei Iehova na tatou i te maa i te pae varua maitatai. I te roaraa o te mau matahiti, ua matara mai te tuhaa rahi o taua maa ra na roto i te mau buka e 192 api. I te avaˈe tenuare, e pûpû tatou i te mau huru buka atoa e 192 api neneihia hou te matahiti 1982. Te vai ra anei ta tatou te mea mâ noâ? Te vai ra anei ta te amuiraa? Mai te peu e e, mea maitai ia hiˈo faahou i te mea i roto e ia maiti i te mau manaˈo e nehenehe e faaohipa i roto i ta tatou mau faaiteraa.
2 Mai te peu e e pûpû tatou i te buka ra “Que ton royaume vienne!,” e nehenehe tatou e haamata i te aparauraa na roto i teie mau parau e:
◼ “Fatata e 2 000 matahiti i teie nei to te mau kerisetiano pure-noa-raa no te haereraa mai o te Basileia o te Atua. I to oe manaˈoraa, eaha ta taua Basileia ra e rave no te mau taata? [E vaiiho tatou i te taata ia pahono. E hohora tatou i te buka i te api 25 e e faaite tatou i te tumu parau tarenihia o te haamatara ra i te tahi mau haamaitairaa o te tupu i raro aˈe i te faatereraa o te Basileia.] Te parauhia ra i roto i teie buka eaha ta te Basileia e faatupu, e te faataa ra e nafea oe e to oe utuafare e fanaˈo ai i te reira. Mai te peu e e hinaaro oe e taio, e oaoa vau i te vaiiho atu na oe te hoê buka.”
3 Mai te peu e e pûpû tatou i te buka ra “Le bonheur—Comment le trouver?” e nehenehe tatou e parau e:
◼ “Ua rahi te mau peapea i roto i teie nei ao e te fifi nei te rahiraa o te mau taata ia ite i te oaoa. I to oe manaˈoraa, e nehenehe anei e ite i te oaoa noa ˈtu eaha te huru oraraa i teie mahana? [E vaiiho tatou i te taata ia pahono. E hohora tatou i te buka i te api 40, e e paraparau tatou no nia i te tahi mau fifi o te nehenehe e haapeapea ia tatou.] Te faaite mai nei te Bibilia ia tatou nafea ia faaruru i taua mau huru tupuraa ra e ia ite i te pae hopea i te oaoa mure ore i roto i te hoê ao apî o te hau. [E hohora tatou i te buka i te api 191, e e taio i te Isaia 32:17, 18.] Te horoa ra te Bibilia i te mau aˈoraa papu o te tauturu ia oaoa atu â tatou i roto i te oraraa. Te faaite ra teie buka i te tahi o taua mau aˈoraa ra e te faataa ra nafea ia faaohipa ˈtu.”
4 Mai te peu e e faaohipa tatou i te buka ra “La paix et la sécurité véritables: comment est-ce possible?,” e hinaaro paha tatou e tamata i teie omuaraa parau:
◼ “Te hinaaro nei te taatoaraa e ora i roto i te hoê ao i reira e vai ai te hau e te ino ore mau. Tera noa râ, aita roa ˈtu tatou i ora aˈenei i roto i taua huru tupuraa ra. I to oe manaˈoraa, eaha te tia ia rave ia tupu iho â te hau e te ino ore mau? [E vaiiho tatou i te taata ia pahono.] E puai tano to te Atua no te haamau i te hau i nia i te fenua nei, e ua tǎpǔ oia i te na reira.” E faaite tatou i te hohoˈa i te api 98, e e taio i muri iho i te Mika 4:3, 4. Mai te peu e e anaanatae te taata, e horoa ïa tatou hau atu â i te mau faataaraa no nia i te tiaturiraa o te Basileia. E pûpû tatou i te buka, e e rave i te mau faanahoraa no te hoê hoˈi-faahou-raa e farerei.
5 E maiti paha tatou i te faaohipa i te vea iti “Te haapao mau ra anei te Atua ia tatou?” E nehenehe ïa tatou e parau e:
◼ “Te aniani nei e rave rahi no te aha te Atua e faatia noa ˈi i te mauiui. I te mea e Atua mana hope o ˈna, no te aha aita o ˈna e faaore i to tatou hepohepo? Eaha to oe manaˈo? [E vaiiho tatou i te taata ia pahono.] Te haapapu maira te Bibilia ia tatou e aita te Atua i faarue ia tatou.” E hohora tatou i te vea iti i te api 27, paratarapha 22, e e taio tatou i te Salamo 37:11, 29. E huti tatou i te ara-maite-raa i nia i te hohoˈa nehenehe o te faataa ra i te mea ta tatou e nehenehe e tiai i mua nei. Mai te peu e e farii te taata i te vea iti, e pûpû tatou i te hoˈi faahou mai no te faaite e nafea ia faaohipa i te vea iti no te haapii i te Bibilia.
6 Ua aratai ta tatou mau buka tau tausani taata ia tuatapapa hohonu i te Bibilia. Ua horoa mai te mea ta ratou i haapii i te tiaturiraa o te hoê oraraa oaoa no a muri aˈe (Sal. 146:5). E haamaitairaa taa ê ta tatou no te tauturu ia ratou.