E faaite tatou e te haapao nei tatou ia vetahi ê na roto i te mau hoˈi-faahou-raa e farerei
1 Te faaite nei tatou i to tatou hinaaro e horoa i te ravea no to tatou taata-tupu ia faaroo i te poroi o te Basileia ma te imi na tera e tera fare i te mau taata e anaanatae ra. E ara ïa tatou i te hoˈi faahou e farerei i te mau taata tei farii i te mau buka i te avaˈe tenuare, no te mea e ravea faahiahia roa teie no te faaite e te haapao nei tatou ia vetahi ê.
2 Mai te peu e ua vaiiho tatou i te buka ra “Que ton royaume vienne!,” e nehenehe tatou e parau faahou mai teie e:
◼ “I te taime hopea to tâua farereiraa, ua paraparau tâua no nia i te Basileia o te Atua e te mea ta ˈna e rave no tatou. E fatata taua Basileia ra i te faariro i to tatou fenua ei paradaiso. I te mea hoi aita tatou i ite aˈenei i te paradaiso, mea fifi ia faahohoˈa anaˈe i te reira. A hiˈo na mai teihea mau te reira. [E faaite tatou i te hohoˈa i te mau api 4 e 5.] Teie taua paradaiso ra tei faaitehia i roto i te Bibilia.” E taio tatou i te Salamo 72:7. Mai te peu e e anaanatae te taata, e hohora tatou i te buka i te api 175, paratarapha 3 e 4, e e haapapu tatou eaha te tia ia tatou ia rave no te ora i roto i te Paradaiso i mua nei.
3 Teie te hoê raveraa mai te peu e ua vaiiho tatou i te buka ra “Bonheur”:
◼ “Te hinaaro nei tatou paatoa ia oaoa tatou. Te manaˈo nei e rave rahi e eita e itehia te oaoa mau i roto i teie nei ao. Eaha to oe manaˈo? [E vaiiho tatou i te taata ia pahono.] Te parauhia ra e huru feruriraa noa te oaoa. Mai te peu e e feruriraa here to tatou no vetahi ê, faatura i te Atua e te hoê tiaturiraa papu no te oraraa i mua, e nehenehe ïa tatou e fanaˈo i te oaoa mau noa ˈtu to tatou mau fifi.” E taio tatou i te Salamo 119:1, 2. E faataa tatou e te haapii mai ra te tuatapaparaa o te Bibilia ia tatou ia here i to tatou taata-tupu, ia faatura i te Atua e ia ite i te hoê tiaturiraa mahanahana no nia i te oraraa i mua nei.
4 Mai te peu e ua vaiiho tatou i te buka ra “La paix et la sécurité véritables: comment est-ce possible?,” e nehenehe tatou e haapoto noa i te parau e:
◼ “Aita te mau faatere o te ao nei i nehenehe e afai mai i te hau e te ino ore. Tei te Atua ra o Iehova anaˈe ra te mana. Te faataa ra te Bibilia ia tatou e eaha te tia ia tatou ia rave. [E tauaparau tatou i te mau manaˈo o te mau paratarapha 1 e 2 o te api 175, e e taio i muri iho i te Isaia 26:4.] Te hinaaro nei au e faaite ia oe nafea teie buka e nehenehe ai e tauturu ia oe.”
5 E nehenehe tatou e parau i te taata ta tatou i vaiiho atu i te vea iti ra “Te haapao mau ra anei te Atua ia tatou?” e:
◼ “I te taime i mairi aˈenei, ua vaiiho mai au i te hoê vea iti o te faahiti ra i teie uiraa faufaa roa: ‘Te haapao mau ra anei te Atua ia tatou?’ I muri aˈe i ta oe taioraa, eaha te faaotiraa ta oe i huti mai? [E vaiiho tatou i te taata ia pahono.] Ua faaitoitohia paha oe e i te taioraa i te mau irava o te faaite ra i te hoê ao apî i roto i te paradaiso, i reira tatou e ora ˈi i roto i te hau. [E faaite tatou i te hohoˈa i te mau api 2 e 3, e e faahiti tatou i te tahi mau huru taa ê o taua ao apî ra.] Mea papu e e hinaaro oe e te feia herehia e oe e ora i roto i teie huru ao. A hiˈo na eaha ta te paratarapha 16, i te api 31, e parau ra.” E taio tatou i te paratarapha, e e haapapu e te auraa e imi ia Iehova oia hoi te haapiiraa hau atu â no nia ia ˈna e ta ˈna mau opuaraa e te reira, na roto i te tuatapaparaa i ta ˈna Parau, te Bibilia.
6 O Iehova te hiˈoraa tia roa ei Tiai nǎnǎ haapao maitai o te aupuru nei i ta ˈna mau mamoe (Ezek. 34:11-14). Te haapapu ra ta tatou mau tutavaraa rotahi no te apee i to ˈna hiˈoraa i roto i taua tuhaa ra i to tatou here e te horoa ra i te mau haamaitairaa i to tatou taata-tupu.