Ia faaara tatou i te anaanatae no te buka ra E ora e a muri noa ˈtu
1 Ia haere anaˈe tatou e farerei ia ratou, te ite ra tatou, i roto i te rahiraa o te tupuraa, e te tapitapi rahi nei te mau taata no te ‘mau haapeapearaa o teie faanahoraa o te mau mea’. (Mareko 4:19.) E tia ia tatou ia faaruru i te hoê ohipa fifi mau: faaara i to ratou anaanatae na roto i te hoê faaiteraa o te haaferuri. I te haamataraa, aita te rahiraa o te mau taata e haapao rahi roa nei i ta tatou poroi. Ma te paraparau i te hoê mea no nia i to ratou oraraa, e nehenehe tatou e faaara i to ratou anaanatae no te poroi o te Basileia. No te haamata i te mau aparauraa, te hoê ravea faahiahia roa oia hoi te maitiraa i te mau manaˈo anaanatae o te buka ra E ora e a muri noa ˈtu. Eaha ta tatou e nehenehe e parau?
2 E nehenehe tatou e haamata mai teie e:
◼ “Mai te peu e te vai ra ia oe te ravea, teihea fifi riaria mau i to tatou nei tau ta oe e hinaaro e faatitiaifaro? [A vaiiho i te taata ia pahono e, mai te peu e e mea tano, faaite e te reira atoa te manaˈo o te rahiraa.] Tae mai ai i teie nei, e au e te pûpû noa mai ra te mau raatira o te faatereraa i te mau ravea taotiahia i te mau fifi e rave rau e te rahi i teie mahana. Te vai nei râ te hoê Taata e mana to ˈna e to ˈna hinaaro o te faaore-roa-raa ïa i te mau maˈi atoa o te huitaata nei. A hiˈo na i ta te Salamo 145:16 e parau ra. [A taio i te irava e a faaite i te mau hohoˈa i te mau api 11-13.] Te tuatapapahia ra i roto i te paratarapha 14 o te api 14 i te mau manaˈo o ta tâua e aparau mai nei e te faaoti nei na roto i teie uiraa: ‘Tera râ, afea ïa te reira e tupu ai?’” E faataa tatou e e pahono te buka i taua uiraa ra e e pûpû atu tatou mai te peu e te anaanatae ra te taata.
3 Aore ra e nehenehe tatou e parau ei hiˈoraa e:
◼ “Ua ite paha oe i te hoê moemoe i muri aˈe i te poheraa o te hoê taata herehia. Papu maitai e ua peapea oe e aita e tiaturiraa faahou e ua feruri hohonu paha oe i nia i teie mau uiraa e: [A taio i te mau uiraa o te paratarapha 1, api 76.] E ere anei i te mea mahanahana ia ite i te mau pahonoraa o teie mau uiraa? E faaitoitohia paha oe ia ite e te pûpû mai ra te Bibilia i te hoê tiaturiraa papu no te feia atoa tei pohe. [A taio i te Ioane 5:28, 29.] E nehenehe tatou e taa na roto i teie buka eaha te huru o te feia pohe e eaha te tiaturiraa ta te oraraa no a muri aˈe e faanaho ra no tatou.” E tauaparau oioi noa tatou i te mau pene 8 e te 20. Mai te peu e te anaanatae ra te taata, e ani tatou ia ˈna ia tuatapapa i te buka.
4 E taime paha to tatou no te faaite ma te faanaho-ore-hia e te amuiraa. I taua taime ra, e nehenehe tatou e parau na roto i ta tatou iho mau parau e ei hiˈoraa:
◼ “I to tatou nei tau, te topa roa ra te ao i roto i te mau fifi, e te vai atoa ra to oe. Tera noa râ, o te feia hapa ore o te mauiui rahi nei. Ia manaˈo oe, e faaore roa anei te Atua i te hoê mahana i te mau haamauiuiraa atoa? [A vaiiho ia pahono.] Te hinaaro nei au e faaite ia oe eaha ta te Atua e tâpû ra i te faatupu no te feia atoa e tavini ra ia ˈna. [A taio i te Salamo 37:40, e e hohora i te buka ra E ora e a muri noa ˈtu i te api 99.] Te faataa ra teie buka no te aha te Atua e faatia noa ˈi i te ino e e nafea oia ia faaore roa i te reira.”
5 Mai te peu e e taata poro apî outou, e nehenehe outou e faaite i te buka ma te faaohipa i te mau hohoˈa i te mau api 156-8. E nehenehe outou e ui na mua i tei uiraa:
◼ “E hinaaro anei oe e ora i roto i te hoê ao mai teie te huru? [A vaiiho ia pahono.] Te niuhia ra taua mau hohoˈa atoa ra nehenehe mau i nia i te hoê parau tǎpǔ i roto i te Parau a te Atua, te Bibilia. [A faaite i te mau irava bibilia.] E ite hau atu â oe na roto i teie buka no nia i te parau tǎpǔ a te Atua e faariro i te taatoaraa o te fenua nei ei paradaiso. E mau haamaramaramaraa faufaa roa to roto e e tia ia horoa ˈtu i te taime no te reira.”—Ioane 17:3.
6 Ia pûpû anaˈe tatou i te buka, eiaha e haamoe i ta tatou fa oia hoi ia haaputapû hohonu i te mau taata i te tiaturiraa faahiahia roa o ta te Bibilia e afai mai ra no ratou. Ia faaite tatou i te aau tae, e eiaha tatou e mairi i te hoê noa ˈˈe taime i te roaraa o teie avaˈe taa ê o te pûpûraa.