Te haamataraa haapiiraa
1 I te avaˈe setepa, e haamata to tatou mau taata apî i te hoê matahiti haapiiraa apî. E mau ohipa maitatai to mua mai, te haapeapea rii atoa ra te tahi mau uiraa. E taui hoi te mau orometua haapii a te mau taurearea e rave rahi, e tapaohia ratou i te mau haapiiraa apî e e tia ia ratou ia amuimui atu e te mau tamarii haere haapiiraa aita ratou i matau. Te hinaaro nei to tatou mau taata apî e rave amui e te mau mana faatere haapiiraa e e faaite i te huru maitai i to ratou mau hoa haapiiraa, e tia râ ia ratou ia haamanaˈo e ia vai ara noa ratou i te mau mea atoa o te nehenehe e faaino i to ratou maitai i te pae varua.—Kor. 1, 15:33.
2 Te tapitapiraa matamua a te mau tamarii a te mau Ite o te aperaa ïa i te mana o te ao nei, o te ô ra i teie mahana i roto i te mau faanahoraa i te pae haapiiraa i roto e rave rahi mau fenua. E tia i te mau taurearea kerisetiano e te feia paari aˈe ia faaitoito e ia faarue i te mau faaueraa e te mau manaˈo o te ao o te haafaufaahia ra i teie mahana no nia i te mau tupuraa i te pae morare, e e tia ia ratou ia ‘vai ara noa’ ma te tuatapapa i te Parau a te Atua e ma te vaiiho ia arataihia ratou e te reira (Sal. 119:9). E mea faufaa ia ite te mau metua o te tapitapi ra no ta ratou mau tamarii i ta ratou porotarama haapiiraa no te horoa na ratou i te mau aˈoraa tano. E tia ia faarue i te haapiiraa atoa o te patoi ra i te tiaraa moˈa e te tura titauhia i te mau tavini o Iehova.—Petero 1, 1:15, 16.
3 Te faatupu pinepine ra te mau oroa here aiˈa, te mau arearearaa, te mau ohipa taaro e te tahi atu mau putuputuraa faaanaanataeraa i te mau fifi i te fare haapiiraa. Te tauturu nei te vea iti ra Te haapiiraa e te mau Ite no Iehova (farani) i te mau taurearea kerisetiano i roto i taua mau tuhaa ra. E nehenehe te mau metua e haapaiuma i te mau huru tupuraa fifi aore ra e faaiti mai i te mau faahopearaa mai te peu e e opua ratou i te pûpû i te mau orometua haapii i taua vea iti ra. E faataa ratou e e tauturu te reira ia ratou ia taa e no te aha eita te mau Ite no Iehova e apiti i roto i te tahi mau ohipa. E nehenehe te horoaraa ˈtu i teie vea iti i te orometua haapii e faatupu i te hoê huru feruriraa turu.
4 Hau atu, e mea maitai ia rave te mau taurearea kerisetiano i te vea iti Te haapiiraa e ta ratou mau tauihaa haapiiraa. E pinepine te mau taime i te tupu mai no te poro i te tahi atu mau tamarii haere haapiiraa o te uiui ra ia hutihia to ratou ara-maite-raa i nia i ta tatou mau tiaturiraa. E tia atoa i te mau tamarii a te mau Ite ia rave noa na muri iho ia ratou i ta ratou parau Mau faaueraa i te pae rapaauraa/Iritiraa i te hopoia aore ra ta ratou Parau tiaraa faaapîhia, haapapu-maitai-hia e te mau ite e tarimahia. E riro te feia o te faaohipa ra i teie aˈoraa mai te “taata haapao i te ino, e ua ape ihora”.—Mas. 22:3.