Te ueue rahi ra anei tatou?
1 Te parauhia nei e “rahi atu â tatou i te horoa ˈtu, rahi atu atoa ïa te noaa mai ia tatou”. E parau mau te reira no nia i te haamoriraa. Hau atu â tatou i te horoa i te taime no te faaineine i te mau putuputuraa, no te poro i te poroi o te Basileia e no te faaite i te here i to tatou mau taeae, hau atu â tatou i te haere i mua i te pae varua. Hoê â huru atoa no te tahi atu pae. Mai te peu e e haamarirau tatou aore ra e ohipa tatou e te hoê aau piti, e noaa anei ia tatou i te mau faahopearaa faahiahia?
2 Ua haapapu maitai te aposetolo Paulo i teie faaueraa tumu i roto i te Korinetia 2, 9:6 e: “Teie râ ta ˈu parau, O te ueue ma te faaherehere ra, e ooti ïa ma te iti; e o te ueue ma te faaherehere ore ra, e ooti ïa ma te rahi.” Te ueue ra anei tatou ma te rahi?
3 Te haapiiraa tataitahi o te Bibilia: No te riro mai ei mau tavini hotu maitai, e haamata tatou i te ueue rahi i roto i te tuhaa o ta tatou haapiiraa tataitahi. E tia ia tatou ia anaanatae rahi i te tamaa i te pae varua (Sal. 119:97, 105; Mat. 5:3). No te mau hopoia atoa ta tatou e amo ra i te mau mahana atoa, e tia ia tatou ia tutava papu no te taa hau atu â i to tatou mau hinaaro pae varua. E titau te reira e ia ‘faaherehere te rahiraa o tatou i te taime au’. (Eph. 5:16.) Te faanaho nei te mau taata poro i te tia oioi i te tahi mau mahana no te haapii. Te faaherehere nei vetahi i te mau po no te reira. I roto i teihea auraa tatou e ooti rahi ai? Te haapaari nei tatou i to tatou faaroo e to tatou tiaturiraa, e e rahi atu â to tatou feruriraa i te oaoa e te maitai mai.—Roma 10:17; 15:4; Petero 1, 1:13.
4 Te mau putuputuraa a te amuiraa: I roto i te Salamo 122:1, te parau ra o Davida e: “Oaoa aˈera vau e te feia atoa i parau mai ia ˈu e, Tatou i nia i te fare o Iehova.” Teie atoa ra anei to outou manaˈo? E ueue rahi tatou ia haere tamau tatou i ta tatou e pae putuputuraa i te hebedoma. Ia rave tatou i te faaotiraa ia ore e haaparuparu no te mahana uâ rii. I roto i te rahiraa o te tupuraa, rahi atu â tatou i te haapaiuma i te mau fifi, e rahi atu â ta tatou haamauruururaa.
5 Ia tae oioi e ia faaea rii tatou ia oti te mau putuputuraa, no te tauaparau ma te faaitoito e to tatou mau taeae. Ia anaanatae tatou e rave rahi mau taata. Ia faaineine maitai tatou i te haapiiraa o Te Pare Tiairaa e te tahi atu mau putuputuraa no te ueue rahi ma te horoa i te mau pahonoraa mai te peu e e nehenehe tatou. Ma te ‘pîpî ia vetahi ê i te pape’ i te mau putuputuraa, e ‘pîpî-atoa-hia mai’ tatou.—Mas. 11:25.
6 I roto i te pororaa: Aita ˈtu â paha tuhaa e nehenehe e ueue rahi i roto iho â ïa i te pororaa. Ia rahi atu â tatou i te horoa i to tatou taime, e rahi â tatou i te farerei i te mau taata anaanatae, e rave i te mau hoˈi-faahou-raa e farerei e e aratai i te mau haapiiraa bibilia hotu mau.
7 Ueue rahi i roto i te pororaa, e rave ïa ma te rahi e ma te maitai. E buka faufaa roa te buka Haaferuriraa o te tauturu ia tatou ia haamaitai i te huru o ta tatou taviniraa. Te vai ra hau atu e 40 omuaraa parau i nia e 18 tumu parau i te mau api 3-8 o te tauturu ia tatou ia faaara i te anaanatae o te mau taata. Ia faaite te hoê taata i te anaanatae, e ara tatou i te tapao maite i te reira ia hoˈi faahou tatou e farerei ia ˈna e ia ooti i te mau maa o te mau mea ta tatou i ueue. O vai i ite eita anei e noaa mai i te hoê haapiiraa bibilia na roto i ta tatou mau tutavaraa, e nafea ia ueue rahi mai te peu e e haapii tatou i te hoê taata ê atu?
8 Mai te peu e te ueue rahi ra tatou, e mea papu e haamaitai-rahi-hia mai tatou e Iehova.—Mal. 3:10.