E pûpû tatou i te mau vea no te faaite i te parau mau
1 I roto i te totaiete i teie mahana, e pinepine te mau parau apî mau, papu, i te haafaufaa-ore-hia no te mau faaiteiteraa uˈana, te mau parau tǎpǔ politita haavare e te mau parau haavarevare e haapararehia nei na te ao nei. E mau vea otahi Te Pare Tiairaa e te A ara mai na!, no te mea o raua anaˈe o te faaite ra i te parau mau no nia i te Basileia o te Atua e o te faataa nei i te ravea no te fanaˈo i te mau haamaitairaa mure ore ta ˈna e hopoi mai.
2 I roto i te hoê fenua, ua farii te hoê taata toroa teitei i roto i te taatiraa o te Parau apî, o tei haafaahiahia i taua na vea e piti ra, no te horoa i te parau faatia ia operehia te reira. Ua parau oia e: “Ia manaˈo vau, o Te Pare Tiairaa te hoê o te mau vea maitatai roa ˈˈe e vai ra; te oaoa rahi nei au i te turu i te reira.” Te oaoa ra tatou i te tauturu i to tatou taata-tupu na roto i te pûpûraa i taua mau vea ra o te horoa i te ite e aratai i te ora (Ioane 17:3). Nafea outou ia pûpû i taua mau vea faufaa roa ra i te avaˈe me? E tauturu paha teie mau manaˈo i muri nei ia outou.
3 Mai te peu e e pûpû outou te mau tumu parau matamua o “Te Pare Tiairaa” no te 15 no febuare, e nehenehe outou e parau e:
◼ “Te tauaparau nei matou e te mau taata ta matou e farerei nei no nia i te ohipa a te mau Ite no Iehova. Ua ite anei oe i te reira? [A vaiiho i te taata ia pahono.] E pǔpǔ faaroo amaha anei aore ra e mau tavini te mau Ite no Iehova na te Atua? E pahono te mau tumu parau o teie vea i te mau uiraa: Eaha te mau pǔpǔ faaroo amaha? E pǔpǔ faaroo amaha anei te mau Ite no Iehova?” A haapapu i te tahi mau manaˈo tano i roto i te hoê o te mau tumu parau.
4 Aore ra, i muri aˈe i te hoê omuaraa parau poto, e nehenehe outou e parau faahou e:
◼ “Hau atu te hoê i nia i te maha o te feia paari o te huiraatira aita i ite i te taio e te papai. No te aha e mea rahi te ite-ore-raa i te taio e te papai, e nafea ia faatitiaifaro i taua fifi nei?” E mea faufaa te mau tumu parau o te vea A ara mai na! ra no te 8 no febuare no te tauturu i te mau taata ia taio e ia faaite i te mea ta te mau Ite no Iehova e rave nei i roto i taua tuhaa ra. E faahiahia te mau metua atoa i te tumu parau “Nafea ia tauturu i ta outou mau tamarii ia hinaaro rahi atu i te taio?”
5 I rotopu i te mau taata ta outou e haere nei e farerei, ua faaite rii paha vetahi i te anaanatae i te taime matamua, e aita râ i tâuˈa faahou. I te mea hoi e mea iti roa to ratou anaanatae, aita outou e manaˈo ra e e hoˈi tamau e farerei ia ratou. E nehenehe râ paha outou e faaô atoa ia ratou i roto i ta outou eˈa opereraa vea. Ia taio anaˈe outou i te hoê tumu parau o te nehenehe paha e haaputapû i te hoê o taua mau taata ra, a tutava i te haere e farerei ia ˈna no te pûpû atu ia ˈna.
6 Te pororaa faanaho-ore-hia: O te hoê ïa ravea faahiahia roa no te faaara i te anaanatae no te mau vea. Na roto noa paha i te faaite-rii-raa ˈtu i te mau api matamua haviti mau no te haamata i te hoê aparauraa. Ua vaiiho te hoê tuahine i te tahi mau numera i nia i ta ˈna iri papairaa ia ite mai to ˈna mau hoa; ua nehenehe oia e pûpû e rave rahi vea. A afai atoa i te tahi na muri iho ia outou i teie avaˈe, no te pûpû atu ia haere anaˈe outou e hoohoo, ia rave outou i te pereoo mataeinaa e i te mau taime atoa e farerei outou i te tahi atu mau taata.
7 Ua ite tatou i te mau pahonoraa i te mau uiraa faufaa roa no nia ia Iehova e ta ˈna haamoriraa na roto i Te Pare Tiairaa e te A ara mai na! To tatou hinaaro oia hoi ia faaohipa i taua mau vea ra i te mau taime atoa no te tauturu ia vetahi ê ia ite e o vai ra o ‘Iehova, te Atua parau mau’.—Sal. 31:5.