E hoˈi tatou e hiˈo i te mau taata tei faaite i te anaanatae
1 E rave rahi i rotopu ia tatou tei opere i te mau vea e te mau vea iti. E mea faufaa ia hoˈi e hiˈo i te mau taata tei farii i te mau vea no te atuatu i to ratou anaanatae. Tei te huru o te faaineineraa i taua mau hoˈi-faahou-raa ra te mau faahopearaa.
2 Eiaha e moehia ia outou e hoê â haapeapearaa to te rahiraa o te mau taurearea e to te feia paari. Te faahiti nei te mau tumu parau o te A ara mai na! no te avaˈe febuare i te mau fifi i teie mahana ma te haapao i te manaˈo o te mau taurearea. Te horoa nei taua mau tumu parau ra i te mau aˈoraa o te tauturu ia ratou, e to ratou mau metua atoa, ia taa i te mau faufaa mau o te oraraa.
3 Mai te peu e ua vaiiho outou i te vea no te 8 no febuare o te “A ara mai na!”, te hinaaro ra paha outou e pûpû i te vea no te 8 no mati. E nehenehe ïa outou e parau e:
◼ “Te faahiti ra te vea hopea ta ˈu i vaiiho atu ia oe ra i te tumu parau: “Te haafifiraa no te haapao i te mau metua ruhiruhia.” Ua faaite te vea e nafea ia rave i taua hopoia ra ma te manuïa. Te faataa ra taua mau tumu parau ra, i roto i te A ara mai na! hopea, i te mau herepata e nehenehe te mau taata e topa i roto no nia i te tapaparaa i te moni. Ia manaˈo vau e mauruuru oe i te taioraa.”
4 E nehenehe atoa outou e faaô mai i te hoê vea iti:
◼ “Ua oaoa vau i ta tâua tauaparauraa poto i mairi aˈenei no nia i te oraraa no a muri aˈe i nia i te fenua. A feruri na eaha te huru o te oraraa ia faaore te Atua i te ino e te mauiui! [A faaite i te hohoˈa i te api 31 o te vea iti Eaha te tumu o te oraraa? Nafea outou e ite ai i te reira?] A hiˈo na, te faataa ra te mau irava bibilia faahitihia i te mau api 29 e 30 i te mau haamaitairaa ta te Basileia o te Atua e afai mai. [A maiti i te hoê irava, e a taio atu i roto i te vea iti.] Te hinaaro nei au e vaiiho ia oe i teie vea iti.”
5 Ia hoˈi outou, e faaroo paha outou e mau buka faaroo ta te taata o te faaanaanatae ra ia ˈna. E nehenehe ïa outou e parau ia ˈna e:
◼ “Noa ˈtu eaha ta tatou haapaoraa, e hoê â ta tatou mau haapeapearaa: te taparahiraa taata, te maˈi rahi aore ra te mǎtaˈuraa e ia ino te mau mea e haaati ra ia tatou, e ere anei? [A vaiiho i te taata ia pahono.] Ia manaˈo oe, te vai ra anei te hoê ravea maitai i taua mau fifi ra? [A taio Petero 2, 3:13.] Te faataahia ra te tumu o ta matou mau vea i te api 2 o Te Pare Tiairaa. [A taio hoê aore ra e piti pereota.] E rave rahi mau taata e ere i te mau Ite no Iehova o te au nei i te taio i ta matou mau vea no te mea te horoa ra te poroi i te tiaturiraa, niuhia i nia i te Bibilia.” Mai te peu e e farii te taata, a faataa e nafea tatou ia haapii i te Bibilia.
6 E nehenehe outou e tamata i teie omuaraa parau:
◼ “Te taime hopea to ˈu haereraa mai, ua aparau tâua no nia i te oraraa no a muri aˈe o te ao. Eaha to oe manaˈo no nia i taua mau tupuraa ra? [A faahiti i te tahi mau fifi.] Na roto i te faarooraa i taua mau parau apî ra, te uiui nei vetahi e te haere ra te ao ihea, e ere anei? Te tiaturi nei matou e te faaite ra taua mau ohipa ra e te ora nei tatou i roto i te ‘mahana hopea’ faahitihia e te Bibilia i roto i te Timoteo 2, 3:1-5.” I muri aˈe i te taioraa i te mau manaˈo matamua, e nehenehe outou e ani i te taata, e mai te peu e te tuea ra anei te huru o te mau taata i teie faataaraa. A apee i te aparauraa ma te faahiti i te hoê o te mau tatuhaaraa o te mau api 89-98 o te buka Haaferuriraa (farani).
7 Mai te peu e e faaineine maitai tatou ia tatou e te hinaaro mau ra tatou e tauturu i te mau taata, ia papu ia tatou e e faaroo mai te feia aau rotahi.—Ioane 10:27, 28.