A haamanaˈo i te faaohipa i te mau vea i roto i ta outou taviniraa
1, 2. Eaha te mana o Te Pare Tiairaa e te Réveillez-vous! i nia i te tahi mau taata?
1 “Mea anaanatae, mea tano, e mea faaitoito.” “Te mau vea faaitoito roa ˈˈe ta ˈu i taio aˈenei.” Te faaite maitai ra tera mau paraparau i te huru aau o te feia taio i Te Pare Tiairaa e te Réveillez-vous! na te ao atoa nei. Oia mau, ua riro ta tatou mau vea ei mauhaa faufaa roa ino no te afai i te parau apî maitai i “te taata atoa.”—Tim. 1, 2:4.
2 Ua farii te hoê taata tei tapi hua i to ˈna toroa i te hoê Réveillez-vous! ta ˈna i anaanatae. I muri aˈe, ua taio o ˈna i Te Pare Tiairaa tei noaa ia ˈna i te hoê â taime. Ua turai te hoê tumu parau ia ˈna ia feruri i te Toru tahi, te hoê haapiiraa ta ˈna i tiaturi noa na. Ua faaarahia to ˈna anaanatae. E ono avaˈe i muri aˈe, ua bapetizohia oia. E pinepine te tahi atu taata i te rave i te mau vea, aita râ o ˈna i taio noa ˈˈe. Na ta ˈna râ vahine o tei ape na i te mau Ite no Iehova, i taio. Ua putapû o ˈna i te parau fafau bibilia o te hoê paradaiso fenua î i te taata parau-tia. I muri aˈe, ua riro mai o ˈna, ta ˈna tamaiti e to ˈna tuahine ei tavini na Iehova.
3. Eaha te vahi maitai ia pûpû i na vea e piti atoa?
3 A pûpû i na vea e piti atoa: Mai ta te mau hiˈoraa i faahitihia aˈenei e faaite ra, eita tatou e nehenehe e ite maitai o vai te taio i ta tatou mau vea e eaha te faaara i te anaanatae o te taata taio. (Koh. 11:6) No reira, e mea au aˈe ia pûpû i Te Pare Tiairaa e te Réveillez-vous! atoa, noa ˈtu e hoê noa ta tatou e haamahitihiti i roto i ta tatou faaiteraa. I te tahi taime, e mea tano ia pûpû hau atu e piti vea i te hoê taata.
4. Afea tatou e nehenehe ai e pûpû i te mau vea?
4 E mea maitai ia faataa i te hoê mahana i te hebedoma no te opereraa vea. I nia i te Calendrier des Témoins de Jéhovah 2005, e parauhia te mau Mahana maa atoa “journée des périodiques.” Oia mau, no te taa-ê-raa o te tupuraa o te hoê taata e te tahi atu aore ra o te hoê vahi e te tahi atu, e mea au aˈe na vetahi e faataa i te hoê mahana ê atu no te pûpû i ta tatou mau vea. To roto anei te reira i ta outou porotarama tahebedoma?
5. Eaha te mau taime maitatai no te opere i te mau vea e mea tia ia imi tatou, e na te aha e tauturu mai?
5 A haamau i ta outou iho fa: E nehenehe te haamauraa i te hoê rahiraa vea e pûpû e tauturu ia manaˈo i te pûpû atu. E opereraa vea anei ta outou? Te pûpû ra anei outou i te mau vea i te feia ta outou e farerei i roto i te taviniraa? E nehenehe anei outou e pûpû atoa i roto i te aroâ, i te mau fare toa e i te vahi taata? E afai anei outou i te reira ia reva outou, ia haere outou i te fare toa aore ra i te hoê titau-manihini-raa? I te mau taime tano atoa, a horoa i Te Pare Tiairaa e te Réveillez-vous! na te hoê taata.
6. E nafea ia faaohipa maitai i te mau vea tahito?
6 E nehenehe atoa tatou e haamau i te fa e pûpû i te mau vea tahito e toe ra. Mai te peu e aita i itea mai te taata no te rave i te mau vea i roto i te avaˈe aore ra i na avaˈe e piti i muri aˈe i te taio mahana a matara ˈi te reira, e mea faufaa noâ te poroi i roto. A horoa ˈtu i te feia e anaanatae ra. No te mau mirioni taata, ua riro Te Pare Tiairaa e te Réveillez-vous! ei ‘parau i parauhia i te taime mau ra.’ (Mas. 25:11) E faaohipa anaˈe i te reira no te tauturu i te mau mirioni taata ê atu ia haapii i te ite ia Iehova e i te tavini ia ˈna.