E pûpû tatou i te mau vea faahiahia roa ˈˈe
1 Te tumu faaitehia o Te Pare Tiairaa oia hoi “te arueraa i te Atua ra o Iehova, te Arii Maha hope e ati aˈe te ao nei”. Te A ara mai na! “no te maitai o te utuafare taatoa. (...) Te horoa mai nei teie vea i te mau tumu papu maitai e nehenehe ai tatou e tiaturi i te Poiete tei tǎpǔ mai e e haamau oia i te hoê faanahonahoraa apî hau e te ino ore mau”. No roto mai teie mau parau i te mau vea iho. Te faariro nei te tapaparaa i taua nau tapao ra i taua nau vea ra ei pu no te tamahanahanaraa no te mau mirioni feia taio.
2 E haafaufaa tatou i taua mau vea ra i roto i ta tatou taviniraa i te mau avaˈe eperera e me. No te riro ei taata aravihi, e tia ia ite maitai i te mea e vai ra i roto. A taio i te mau numera atoa e a tapao i te mau manaˈo ta outou e faaohipa ia pûpû atu outou. A feruri i te mea e faaanaanatae ra te mau taata. Eaha te mau tumu parau i te pae totiale, o te utuafare aore ra o te manaˈo hohonu e haapeapea nei i te rahiraa o to outou feia tapiri? A tutava i te feruri i te mea o ta outou e parau no te haaputapû ia ratou e ia hinaaro ratou e ite hau atu â.
3 Pûpûraa i Te Pare Tiairaa no te 15 no tenuare: Te titau nei te rahiraa o te mau taata i te hoê ao maitai aˈe, aita e tamaˈi.
I muri aˈe i te faaiteraa e o vai outou, e nehenehe outou e parau e:
◼ “Te hinaaro nei au e faaite ia oe i te hoê manaˈo anaanatae i roto i teie tumu parau ‘Fatata roa—Te hoê ao aita e tamaˈi faahou!’ Te na ô ra te taioraa e: “Hou te tamaˈi e faaorehia ˈi, e tia ia tauihia te mau haerea. Te faataa ra te faatureraa a te Faanahonahoraa a te mau Nunaa amui i te pae haapiiraa, ite aivanaa, e ihotumu e: “I te mea e e haamata te tamaˈi i roto i te feruriraa o te taata, i roto atoa ïa i te feruriraa o te taata e titauhia ˈi ia patu i te parururaa o te tamaˈi.” Tera râ, te haere noa ra te totaiete o teie nei tau, i reira ua parare roa te tiaturi ore e te riri, i te inoraa, eiaha râ i te hau. Noa ˈtu râ, ua tǎpǔ te Atua iho e i te hoê mahana, e nanaˈohia te hau i roto i te feruriraa o te mau taata farii i te parau-tia. Na roto i ta ˈna peropheta ra o Isaia, ua parau oia e: “Na ˈna [te Atua] e haava i roto i te mau [nunaa], e e faataa i te parau i te taata atoa e rave rahi; e tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.”” I muri aˈe i te taioraa i te Isaia 2:4, a ani i te manaˈo o te taata e faaroo maira no taua parau tǎpǔ ra. Mai te peu e e anaanatae oia, a faaite i taua noâ tumu parau ra i te api 6 i raro aˈe i te upoo parau iti “Mea nafea te Atua ia faatupu i te hau?” E nehenehe outou e parau faahou e: “Ua papu ia ˈu e oaoa oe i teie tumu parau e te taioraa i te mau irava faahitihia i roto i ta oe iho Bibilia. E oaoa roa vau i te vaiiho mai ia oe ra i teie vea e apitihia e te A ara mai na! no te tino moni e 28 tara na toopiti numera.
4 Pûpûraa i Te Pare Tiairaa no te 1 no febuare: Te tumu parau o te vea i te api 4 oia hoi: “Te mau tavini o te ino.”
I muri aˈe i te faaiteraa e o vai outou, e nehenehe outou e parau e:
◼ “I teie mahana, te farerei ra to tatou nei ao e rave rahi mau fifi, mai te [a faahiti te hoê fifi i roto i te tuhaa fenua aore ra te hoê parau apî]. E aratai te reira ia tatou ia aniani e nehenehe anei te hoê taata e horoa i te hoê ravea i taua huru tupuraa fifi mau ra. Auaˈe hoi, te haapapu maira te Timoteo 2, 3:16, 17 e te aratai ra te Bibilia ia tatou ia ora ma te oaoa e te hau.” I muri aˈe i te taioraa i taua mau irava ra, a faaite e e tauturu Te Pare Tiairaa ia tatou ia taa e no te aha ua riro te Bibilia ei pu no te mau aˈoraa o te nehenehe e tiaturihia.
5 Mai te peu e e mea au aˈe na outou e pûpû i te A ara mai na!, e nehenehe outou e faaohipa i te numera no te 22 no tenuare (farani) e te tumu parau “Te hoê oraraa utuafare oaoa i reira na hoa e piti e riro ai ei hoê”. Papu maitai, e farerei outou i te mau hoa faaipoipo o te tapitapi ra i to raua mau hinaaro e o te hinaaro ra e ite i te tia ia rave no te tauturu ia raua.
6 Mai te peu e e faariro tatou ma te aau tae i ta tatou mau vea ei mau vea faahiahia roa ˈˈe, e hinaaro tatou e vaiiho atu i te tahi atu mau taata ia farii atoa ratou i te tiaturiraa o te Basileia e ia arue ratou ia Iehova, te Fatu Mana Hope o te ao nei.—Sal. 83:18.