E imi anaˈe i te feia e haerea fariihia to ratou
1 Hoê o te mau tapao o te ohipa pororaa, o te itearaa mai ïa i te feia e “haerea fariihia to ratou no te ora mure ore.” (Ohi. 13:48, MN) Ua haapapuhia e ua riro te opereraa i te mau vea o Te Pare Tiairaa e te A ara mai na! ei ravea faahiahia roa ia naeahia taua tapao ra, i te mea hoi e te faaite nei ta tatou mau vea i te tiaturiraa o te Basileia. E haafaufaa ïa tatou i te reira i te roaraa o te avaˈe eperera. Te tiaturi nei tatou e haamata i te mau haapiiraa bibilia apî e te mau taata e anaanatae, i nia i te buka ra Te ite e aratai i te ora mure ore. Teie te tahi mau manaˈo tauturu o te riro ei mea aravihi:
2 Ia pûpû tatou i “Te Pare Tiairaa” o te 1 no eperera, e nehenehe tatou e haamatara i te tumu parau ra “E arue anaˈe i te Arii mure ore!,” o te faahiti faahou ra i te oreroraa parau huiraatira o te tairururaa mataeinaa i mairi aˈenei, e e parau atu e:
◼ “Te tiaturi nei e rave rahi mau taata o ta matou e paraparau nei, i te Atua. No vetahi, e mea fifi ïa no te tiaturi ia ˈna. E oe, eaha to oe manaˈo? [A vaiiho i te taata ia pahono.] Te haapapu maitai ra te mau mea atoa e haaati ra ia tatou, e te vai ra iho â te hoê Atua. [A taio i te Salamo 104:24.] Ia ite anaˈe tatou i te hoê pata hohoˈa aore ra te hoê matini roro uira, e farii iho â tatou e na te hoê taata maramarama i hamani. E mea tano anei ia parau e, e mea tupu noa mai te mau mea fifi roa ˈtu â, mai te fenua aore ra te taata?” E haamatara tatou i te hoê paratarapha o te tumu parau o te faaite i te hoê tumu papu e tiaturi i te Atua. Mai te peu e e anaanatae te taata, e pûpû tatou i te mau vea.
3 Te vai ra i roto i “Te Pare Tiairaa” o te 15 no eperera te tumu parau ra “No te aha te haamoriraa mau e haamaitaihia ˈi e te Atua.” Hou a pûpû atu ai, e nehenehe tatou e ani atu e:
◼ “Te vai ra tau hanere haapaoraa i te ao nei; i to oe manaˈoraa, e fariihia anei te taatoaraa e te Atua? [A faaroo i te pahonoraa a te taata.] Ua faaite Iesu e, noa ˈtu e te faahua parau nei e rave rahi e e feia faaroo ratou, eita te feia o te ore e rave i te hinaaro o te Atua e fariihia. [A taio i te Mataio 7:21-23.] Mea faufaa no tatou ia ite i te haapaoraa mau i haapiihia e Iesu.” E faaite tatou i te upoo parau iti “Eaha te mau hotu e tia i te haapaoraa mau ia faatupu?,” i te api 16, e e hiˈopoa anaˈe i te hoê hiˈoraa o te faataa ra i teie manaˈo.
4 Mai te peu e e faaite tatou i te anairaa tumu parau o te “A ara mai na!” o te 8 no eperera, “Ia ore roa te mau tamaˈi,” e nehenehe tatou e parau e:
◼ “E tau hanere tamaˈi tei tupu i to tatou nei senekele, e na tamaˈi rahi e piti atoa. Teie râ, te parau nei fatata te mau faatere atoa o te ao nei, e te hinaaro nei ratou i te hau. E te mau taata atoa ta ˈu i matau, te na reira atoa nei ratou i te parau. Mai te peu e te hinaaro nei te taatoaraa i te hau, no te aha e ore ai e tupu? [A vaiiho i te taata ia pahono.] I to oe manaˈoraa, eaha te tia ia tatou ia rave ia tupu te hau mau i te fenua nei?” I muri aˈe i te faarooraa i te pahonoraa a te taata, e huri anaˈe te vea i te mau api 8 e 9, e e taio i te mau irava mai te Salamo 46:8, 9. Ma te faaohipa i te mau hohoˈa e te mau irava faahitihia ei faahororaa, e faaite tatou e mea nafea te Basileia o te Atua ia faatupu i te hoê hau ati aˈe te ao nei o te ore roa e faahuehuehia. E e ani tatou i muri iho i te taata e e hinaaro anei o ˈna e taio i te vea, e e faanaho tatou i te hoê taime farereiraa.
5 Mai te peu e e parau mai e rave rahi taata e ohipa ta ratou, e nehenehe tatou e tamata i teie faaiteraa:
◼ “Te tutava nei matou i te tauturu i te mau taata, e oraraa ohipa roa to ratou e mea iti to ratou taime no te feruri i nia i te huru pae varua o te oraraa. Te fa o ta matou mau vea Te Pare Tiairaa e te A ara mai na!, o te horoaraa ïa i te mau haamaramaramaraa poto no nia i te mau uiraa faufaa no outou, oe e to oe utuafare. Te hinaaro nei au e vaiiho mai i teie mau vea ia taio oe.”
6 E faaite tatou i te tino moni i te feia e rave i te mau vea. E faufaa-mau-hia ratou i te taioraa i Te Pare Tiairaa e te A ara mai na! o te horoa mai “i te parau oaoa e te maitai.”—Isa. 52:7.