E tauturu tatou ia ratou ia faaau atu i te poroi
1 Na roto i te pororaa, te horoa ra tatou i te mau taata te ravea ia ‘faaroo i te mau parau tohu o te Apokalupo’. (Apo. 1:3.) Tera râ, e tia ia ratou ia faaau atu i te reira, mai te peu e te hinaaro ra ratou e ora ˈtu i te “ati rahi ra”. (Apo. 7:14.) Te fifi nei te mau taata! No reira, e ara tatou i te haere e farerei i te feia tei faaite i te anaanatae no te hoê o te mau faaiteraa ta tatou i faaohipa i teie avaˈe.
2 Mai te peu e ua vaiiho tatou i te buka “Te Apokalupo: to ˈna tatararaa hopea”, e nehenehe tatou e parau e:
◼ “Te oaoa nei au i te farerei-faahou-raa ia oe. I te taime i mairi aˈenei, ua tauaparau tâua i nia i te hoê o te mau parau tohu o te buka o te Apokalupo, e ua vaiiho mai au ia oe ra te hoê buka o te faataa ra i te reira. Ua ite paha oe e mea hohonu roa te buka o te Apokalupo, e nehenehe râ tatou e taa i te maramarama o te mau tupuraa i teie nei mahana ma te faaau atu i te mau parau mau bibilia faufaa e rave rahi. Te hinaaro nei au i roto tau minuti noa e faaite ia oe i te tahi mau ohipa ta te Bibilia e parau ra no to tatou nei tau.” I muri iho, e huti tatou i te ara-maite-raa i nia i te hoê buka o ta tatou e nehenehe e faaohipa no te haamata i te hoê haapiiraa bibilia.
3 Mai te peu e ua vaiiho tatou i te api parau iti “E ora anei teie nei ao?” i to tatou tere matamua, e nehenehe tatou e parau e:
◼ “Te oaoa nei au i te farereiraa ia oe i teie nei mahana. I te taime hopea o to ˈu haereraa mai, ua tauaparau tâua i nia i te mau ohipa no roto i te hoê tapao o te tupu na mua noa ˈˈe i te hopea o te ao nei. [A faahaamanaˈo i te mau tuhaa tano o te tapao i roto i te Mataio 24:3-14.] Ua ite anei oe i te hoê ohipa apî tei tupu i roto i te ao nei aore ra i teie vahi o te faatupu ra i te hoê tuhaa o te tapao?” Ma te faaohipa i te mau hohoˈa o te pene 16 o te buka Te Apokalupo: to ˈna tatararaa hopea, e faataa tatou i te tupuraa o te tahi mau parau tohu bibilia. I te pae hopea o te farereiraa, e faahiti tatou i te tumu parau o te oreroraa parau huiraatira o te hebedoma e e titau manihini tatou i te taata ia haere mai i te Piha no te Basileia.
4 Mai te peu e ua titau manihini tatou i te taata i te oroa Haamanaˈoraa, e parau tatou e:
◼ “I te taime hopea to ˈu haereraa mai e farerei ia oe, ua tauaparau tâua i nia i te faufaaraa o te pohe o Iesu no te mau taata. Ua titau manihini atoa vau ia oe i te oroa Haamanaˈoraa o to ˈna poheraa, o ta te mau kerisetiano atoa e faatupu i te 26 no mati. Te haere mai nei au i teie mahana no te faahaamanaˈo ia oe e ua titau-manihini-hia oe i taua oroa faufaa ra. [A haapapu i te hora e te vahi o te oroa Haamanaˈoraa.] E taa maitai ia oe te auraa o te reira ma te hiˈo faahou i te tahi mau haamaitairaa ta tatou e fanaˈo ra maoti te mea ta Iesu i rave no te huitaata nei, e to a muri aˈe.” E tutava tatou i te hiˈopoa i muri iho i te mau manaˈo tano o te mau vea apî aore ra o te pene 41 o te buka Te Apokalupo: to ˈna tatararaa hopea. E nehenehe atoa tatou e haafaufaa i te mau hohoˈa o te mau api 294, 299 e 308. Mai te peu e e nehenehe, e rave tatou i te mau faanahoraa no te tauturu i te taata ia haere mai i te oroa Haamanaˈoraa.
5 Mai te peu e e taata faaroo noa oia, e mea aravihi paha teie mau parau e:
◼ “Ua au roa vau i ta tâua aparauraa hopea nei i nia i te Bibilia. Te hoˈi mai nei au no te mea te hinaaro nei au e ia fanaˈo atoa oe i te mea ta te Atua i tǎpǔ i te feia e hinaaro ra e ite hau atu â no nia ia ˈna.” E taio tatou i te Ioane 17:3, e i muri iho e pûpû tatou i te api parau iti Te hoê oraraa hau i roto i te hoê ao apî.
6 Ia turai to tatou here o te ora e to tatou aau mehara no te hoo ia rave i te mau hoˈi-faahou-raa e farerei i te feia farii maitai! E tauturu tatou ia ratou ia faaau atu i te poroi faahiahia mau o te Apokalupo. Eiaha ia moehia ia tatou e “ua fatata te tau e tupu ai”!—Apo. 1:3.