E haapii faahou tatou i te buka Apokalupo: tatararaa hopea
1 Te faahiti ra te api o te tumu parau o te buka Apokalupo: tatararaa hopea i te Apokalupo 1:3: “E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra: ua fatata te tau e tupu ai.” Te oaoa rahi nei te mau tavini o Iehova i teie mahana no te tupuraa o te mau parau tohu o te buka bibilia ra te Apokalupo i to tatou nei tau. Tei roto to tatou maramarama no nia i te mau mea e tupu ra i to tatou nei tau, te “mahana o te Fatu ra”, i te buka Te Apokalupo: Ua fatata roa to ˈna tatararaa rahi hopea nei! (Apo. 1:10.) Ma te haapii i taua buka ra, ua taa maitai aˈe ia tatou i te auraa o te mau tupuraa faufaa na te ao nei, no nia iho â râ i te hau emepera o te haapaoraa hape na te ao nei, te haereraa te mau nunaa i Aramagedo e te mau huru raveraa a Iehova i nia i to ˈna nunaa.
2 Eita te haapiiraa o teie buka e faahaamanaˈo noa i te rahiraa o tatou i te mau manaˈo haapii-aˈena-hia, e haamaitai atoa râ i to tatou ite i te pae varua no nia i te tereraa o te mau tupuraa o te aratai i te mahana e upootia ˈi Iehova i nia i to ˈna mau enemi atoa. E huti mau â nau tausani taata tei apiti mai e o tatou nei i te roaraa o teie na matahiti e piti aore ra e toru i mairi aˈenei, i te haapiiraa i te toruraa o te tuatapaparaa o te buka Apokalupo: tatararaa hopea i roto i te mau haapiiraa buka.
3 Mai te 3 no atopa 1994, ia faaineine maitai tatou ia tatou, ia haere e ia pahono ma te faaitoito i te haapiiraa buka i te mau hebedoma atoa. E haamauruuru-rahi-hia e e haamaitaihia tatou mai te peu e, ma te faaau atu i te mau parau tohu o te buka te Apokalupo, te rahi noa ˈtura to tatou maramarama no nia i te auraa o te mau tupuraa na te ao nei i to tatou nei tau. E tia mau â ia tatou ia tuatapapa maitai i taua buka ra, no te mea no teie mahana hoi te reira. Taio anaˈe i te mau parau tohu faahiahia o te Apokalupo, faaroo anaˈe i te reira e e feruri hohonu anaˈe i nia, e ia horoa mai te reira i te oaoa i tǎpǔhia!