E pûpû tatou i te buka Te uiui nei te mau taurearea
1 Oia mau, e pûpû tatou i te buka Te Apokalupo: to ˈna tatararaa hopea i teie avaˈe, tera râ, e opua paha tatou i te pûpû i te buka Te uiui nei te mau taurearea mai te peu e e tauaparau tatou i te hoê metua tane, te hoê metua vahine aore ra te hoê taurearea o te tapitapi nei i te mau fifi e haapeapea nei i te mau taurearea.
2 E manaˈo paha tatou e mea tano ia parau e:
◼ “E ere i te mea ohie ia paari i roto i teie tau arepurepu. Te faaruru nei te mau taurearea i te mau huru tupuraa apî o te aratai ia ratou ia rave i te mau faaotiraa faufaa. ‘E tia anei ia ˈu ia inu? Ia rave i te raau taero? Eaha te haerea e farii i nia i te hoê taurearea tane aore ra te hoê taurearea vahine?’ Ia uiui te mau taurearea i teie mau aniraa faufaa, te haapeapea-pinepine-hia nei ratou i te mau pahonoraa tuea ore. Ia manaˈo oe, ihea e rave rahi e ite ai i te mau aˈoraa? [A vaiiho ia pahono.] Te horoa ra te buka Te uiui nei te mau taurearea—Mau pahonoraa ohie (farani) i te mau haamaramaramaraa faufaa. [A huti i te ara-maite-raa i nia i te tabula tumu parau, ma te faaite i te mau tumu parau e rave rau e tuatapapahia ra.] Te hinaaro nei te mau taurearea i te mau pahonoraa huna ore e mea mau. Ua niuhia te mau pahonoraa ta teie buka e horoa ra i nia i te mea ta te Bibilia e parau ra.”
3 Teie te tahi atu faaiteraa ta tatou e nehenehe e faaohipa:
◼ “Te farerei nei te mau taurearea e rave rahi mau fifi i teie nei mahana. Te hinaaro nei ratou i te tauturu no te haapaiuma i te reira. Ma te rave i te mea maitai aˈe ta tatou e nehenehe no te tauturu ia ratou, aita râ anei tatou e imi nei i te hoê aratai ohie? [A vaiiho i te taata ia pahono.] Te tahi o te mau fifi rahi roa ˈˈe e farereihia ra e te mau taurearea no ǒ mai ïa i to ratou mau hoa haapiiraa. A hiˈo na i te mau hohoˈa i te mau api 76 e 77 o teie buka. [A huti i te ara-maite-raa i nia i te tatararaa o te mau hohoˈa e i nia i te paratarapha papai faaopahia o te api 77.] Te horoa ra te mau api i muri mai o teie pene i te mau pahonoraa haavare ore e te ohie.”
4 Te ora nei tatou i te mau tau “ati rahi” no te mau taurearea iho â râ (Tim. 2, 3:1). E nehenehe mau te buka Te uiui nei te mau taurearea e tauturu i te mau taurearea ia haapaiuma i te mau fifi i teie nei mahana. Te vai ra te mau hohoˈa i roto i na 39 pene, e mea mau e te ohie te mau tumu parau. No reira, noa ˈtu te huru tupuraa, ia vai ineine noa tatou i te faaohipa i teie buka faahiahia roa.