E faanaho tatou i te taime no te poro maoti i te mau vea
1 Te hinaaro ra o Iehova ia noaa i te feia e apee nei i to ˈna mau eˈa te ‘hau, te hoê oraraa no a muri aˈe e te hoê tiaturiraa’. (Ier. 29:11.) Te horoa ra te mau vea Te Pare Tiairaa e te A ara mai na! i te mau haamaramaramaraa i te taime tano no nia i taua tiaturiraa ra. E mea faufaa roa ratou no te feia e rave rau, o te faaruru ra e rave rahi mau tupuraa taa ê (Tim. 1, 2:4). Te faanaho tamau ra anei tatou i te taime no te poro, tatou e to tatou utuafare, maoti i te mau vea?
2 Mai te peu e te iti noa ˈtura te mau vea ta tatou e vaiiho ra, eaha te ravea no te faatitiaifaro i teie tupuraa? E mea faufaa ia ite papu i to ratou faufaa. Ua papai te hoê taata i teie parau: “E mea faahiahia roa ia taio i ta outou mau vea. E ere i te mau ‘tamahanahanaraa’ faufaa ore. E mau aˈoraa to roto o te horoa mai i te hoê tumu i to ˈna oraraa.” Te hotu o te mau tuatapaparaa maite, te horoahia ra te mau vea Te Pare Tiairaa e A ara mai na! e te “tavini haapao maitai e te paari”. (Mat. 24:45.) E mau mauhaa aravihi no te haaputapû i te mafatu o te mau taata.
3 Ia ite maitai tatou i te mau vea ta tatou e pûpû ra. E imi tatou i te mau manaˈo no nia i te mau fifi e farerei-pinepine-hia ra e te mau taata o te tuhaa fenua. E mea maitai ia faaineine i te aparau i te hoê tane, i te hoê vahine aore ra i te hoê taurearea o ta tatou e nehenehe e farerei i te hoê uputa. Ia ineine tatou i te faaite e no te mau taata atoa te mau vea, e no te mau utuafare atoa.
4 Ia noaa ia tatou te “huru taue vea”: E tia ia tatou ia faanaho i te hoê tuhaa faufaa o ta tatou porotarama pororaa i te faaiteraa maoti i te mau vea. Eaha te taime tano maitai no te faaite ia ratou? Ua tamata aˈena anei tatou i te poro e hoê hora i te tera e tera fare i te hopea avatea aore ra i te ahiahi, hou te haapiiraa buka? I roto i te tahi mau tuhaa fenua, te faatupu ra te pororaa i te ahiahi i te mau faahopearaa faahiahia roa. Inaha, te mahana maa o te hoê ïa mahana e tano maitai i te ohipa e te mau vea, e mea tano atoa râ te tahi mau mahana. E tia ia rave-tamau-hia te pororaa i tera e tera fare e i tera e tera fare toa i te roaraa o te mahana o te mau vea.
5 E hopoia ta te taata tataitahi ia ani i te hoê numera papu o te mau vea. Mai te peu e te vai ra ta tatou mau numera tahito, e faaohipa tatou no te faaite i te mau taata i te mau tumu parau huru rau tuatapapahia i roto i ta tatou mau vea. E nehenehe atoa, mai te peu e e faatiahia tatou, e vaiiho i te tahi mau numera tahito i roto i te mau fare ruau, i te mau fare maˈi. E nehenehe tatou e tapao i te rahiraa buka pûpûhia i nia i ta tatou tabula ohipa.
6 Mai te peu e e faaohipa tatou i te tahi noa mau manaˈo o ta tatou i hiˈopoa mai nei, e mea papu e vaiiho rahi tatou i te mau vea. E haafaufaa te feia farii maitai o te mauiui ra no te faanahoraa ino i teie nei mahana i te mau manaˈo faaitoito i roto i Te Pare Tiairaa e te A ara mai na! Te horoa mau nei teie nei vea i te maa varua faufaa no te feia e imi ra i te haamaitairaa a Iehova. No reira, ia noaa mai ia tatou te “huru taue vea” e ia tutava tatou i te opere hau atu i roto i ta tatou tuhaa fenua.