E haaputapû tatou i te mafatu o te feia e haapii ra e o tatou
1 Te hinaaro ra anei tatou e ia faaohipa te taata e haapii ra e o tatou i te mea o ta ˈna e haapii nei? E tia ia ˈna ia ohipa no te haafaufaa i te ite o ta ˈna e haapii nei. No te turai i te taata haapii ia ohipa, e tia ia tatou ia haaputapû i to ˈna mafatu. I te Penetekose o te matahiti 33, ua ‘haaputapû’ te oreroraa parau faaitoito a te aposetolo Petero i ‘te mafatu’ o na 3 000 taata o tei “farii maite i ta ˈna ra parau” e ua bapetizohia ratou i taua mahana ra (Ohipa 2:37, 41). Nafea ia haaputapû i te mafatu o te hoê taata e haapii ra?
2 E faaineine maitai ia tatou: Eiaha tatou e tamata i te hiˈopoa e rave rahi tumu parau, e tae atu i te faito e aita i rahi faahou te taime no te haaferuri i nia i te tumu parau e te taata haapii. Ia faaoti tatou na mua aˈe i te mau manaˈo ta tatou e haapapu, e ia haapao maitai e te taa ra ia tatou e te faaohipa maitai ra tatou i te mau irava bibilia. E faaineine i te mau uiraa o te ô mai i roto i te feruriraa o te taata haapii no to ˈna huru oraraa taa ê. Mai te peu e e mea matau maitai ia tatou te taata, e faaineine tatou i te mau manaˈo e tano no ˈna iho.
3 E apee tatou i te huru haapiiraa a Iesu: Ua faaohipa Iesu i te mau faahohoˈaraa no te faaite ma te ohie i te mau manaˈo fifi e no te tauturu i te feia ta ˈna e haapii ra ia ite i te auraa e te mau tuhaa putapû o te hoê tupuraa (Luka 10:29-37). Oia atoa, e nehenehe tatou e nanaˈo i te mau haapiiraa faahiahia roa i roto i te mafatu o te taata haapii ma te faaohipa i te mau faahohoˈaraa ohie, no roto mai i te oraraa o te mau mahana atoa, e ma te faatano i nia i to ˈna huru oraraa.
4 E mea faufaa roa te mau uiraa no te haaputapû i te mafatu o te feia haapii, mai ta Iesu i faaite pinepine (Luka 10:36). Eiaha râ tatou e mauruuru noa i te mau pahonoraa taio-noa-hia i roto i te buka. E faaohipa tatou i te mau uiraa arataihia no te turai i te taata i te hoê faaotiraa tei ore i manaˈohia e ana. Te haamaitai ra teie huru raveraa i to ˈna aravihi ia feruri. E ani tatou i te mau uiraa manaˈo no te ite i to ˈna manaˈo no nia i te hoê tumu parau. E ite paha tatou i te mau tuhaa o te titau ra e ia aparauhia e te tahi faahiˈoraa.
5 Mai te peu e aita te hoê taata haapii e haere ra i mua, e tia ia tatou ia ite i te mau tumu, ma te haere paha e farerei ia ˈna i te tahi atu taime. No te aha oia e haamarirau ai i te ohipa? Te vai ra anei te hoê manaˈo o te mau Papai aita o ˈna e taa ra? Te feaa ra anei oia no te rave i te tahi mau tauiraa i roto i to ˈna oraraa? Mai te peu e e te tamata ra te hoê taata haapii ia ‘feaa piti i nia e piti manaˈo taa ê’, e tauturu tatou ia ˈna ia ite i te atâtaraa o teie haerea. — Te mau arii 1, 18:21.
6 Ua taa i te aposetolo Paulo e te haapiiraa i te mau parau mau bibilia i te feia farii maitai no te faaoraraa ïa ia ratou; ua ani atura oia i te mau kerisetiano atoa ‘ia ara i ta ratou haapiiraa’. (Tim. 1, 4:16.) E tia i te feia o te haapii ra e o tatou ia titau hau atu â i te hoê noa tuatapaparaa i te Bibilia e i te mau ohipa e tupu ra na te ao nei. Te hinaaro ra ratou i te ite mau no nia ia Iehova e ia Iesu, e te hoê tauturu no te faatupu i te mau taairaa piri e te mahanahana e o ratou. Mea na reira anaˈe ratou e turaihia ˈi ia faaite i to ratou faaroo na roto i te mau ohipa (Iak. 2:17, 21, 22). Ia putapû to ˈna mafatu, e hinaaro te taata haapii e rave i te hoê haerea o te faahanahana ia Iehova e o te faaora ia ˈna. — Mas. 2:20-22.