E mana puai to te haapiiraa no ǒ mai i te Atua ra
1 Auê ïa oaoa ia noaa mai te haapiiraa a te Atua, to tatou Poiete, te Atua ra o Iehova (Sal. 50:1; Isa. 30:20b)! I teie nei mahana, te horo nei te mau taata no te mau nunaa i to ˈna ra mouˈa, te haamoriraa viivii ore, ia haapii o ˈna ia ratou (Mika 4:2). Te tapao ra te mau mirioni taata ia ratou i te mau haapiiraa o te faahanahana ra i te manaˈo taata e te paari o teie nei ao. Teie râ, e mea maamaa te paari o te ore e haapao ra ia Iehova e i ta ˈna Parau papaihia i mua i te mata o te Atua, e maamaa-atoa-hia te feia o ta ˈna e aratai ra. — Sal. 14:1; Kor. 1, 1:25.
2 I te roaraa o ta tatou tairururaa mataeinaa, ua hiˈopoa tatou, na roto i te hoê ravea otahi, i te mana o te haapiiraa no ǒ mai i te Atua ra. Ua tuatapapahia te upoo parau “Te haapiiraa no ǒ mai i te Atua ra” i roto i te taatoaraa o te porotarama. Ua haapii tatou e te faariro nei te Parau a te Atua e to ˈna varua ia tatou ei utuafare o te mau taeae na te mau fenua atoa, te taui nei i to tatou huru taata, te paruru nei ia tatou i te mau haapiiraa a te mau demoni e te faaineine ra ia tatou ia riro mai tatou ei mau tavini maitai roa ˈˈe. I roto i teihea faito to outou fanaˈoraa i te haapiiraa no ǒ mai i te Atua ra?
3 Te faahopearaa i nia i te oraraa kerisetiano: Te tarai ra te haapiiraa no ǒ mai i te Atua ra i to tatou haava manaˈo. E fanauhia mai te ao taatoa nei e te hoê haava manaˈo, ia aratai râ oia ia tatou i roto i te eˈa o te parau-tia e i roto i te taviniraa e faaoaoa ra ia Iehova, e tia ia haapiihia oia (Sal. 19:7, 8; Roma 2:15). Aita te mau taata no teie nei ao i faaau i to ratou mau manaˈo i te Parau a te Atua; no reira tei roto ratou i te arepurepuraa e te feaaraa no nia i te mea maitai e te mea ino. Te tupu ra te mau aimârôraa i nia i te tahi mau uiraa aore ra mau faufaa i te pae morare no te mea te onoono ra te taata tataitahi i te rave i te mea ta ˈna e manaˈo ra e mea tano. Te hinaaro nei te rahiraa o te mau taata e faaoti ma te tiamâ i to ratou huru oraraa. Te patoi ra ratou i te haapao i te tumu otahi o te paari mau (Sal. 111:10; Ier. 8:9; Dan. 2:21). Tera râ, te faaafaro ra te haapiiraa no ǒ mai i te Atua ra i taua mau uiraa ra e, ei utuafare no te Atua, te tahoê nei tatou no te mea te haapii maira o ˈna ia tatou. Te hiˈo nei tatou i te ora i mua ma te tiaturi, e te hoê haava manaˈo maitai e o te vai ohipa noa ra i roto i te taviniraa.
4 Te tauturu ra te haapiiraa no ǒ mai i te Atua ra ia tatou ia patoi “i te mataˈi ra, i tera parau, i tera parau”. (Eph. 4:14.) Aita tatou e turaihia ra e te haapiiraa o te philosopho o te faariro i te mau taata ei feia faaino e te manaˈo feaa, o te faaitoito ra i te mau faaotiraa ia au i to ratou iho manaˈo, e o te aratai ra i te toparaa o te mau faufaa morare. Te fanaˈo nei tatou e te haapiihia ra tatou e Iehova, e i reira, e ore tatou e ite i te oto e te mauiui ta te rahiraa e farerei ra. Ua riro te mau ture e te mau faahaamanaˈoraa a Iehova mai ‘te hoê reo i muri mai ia tatou’, o te parau ra e: “Teie te eˈa: e na reira i te haere.” — Isa. 30:21.
5 Ta tatou mau putuputuraa e ta tatou taviniraa: Te faariro nei tatou i te Hebera 10:23-25 mai te hoê faaueraa a te Atua. I te mau putuputuraa a te amuiraa, te haapii maira Iehova ia tatou. Ua matau anei tatou i te haere tamau, aore ra te faariro nei tatou i te haereraa i te mau putuputuraa mai te hoê ohipa iti aˈe i te faufaa? E haamanaˈo tatou e e tuhaa atoa te haaputuputuraa ia tatou iho no ta tatou haamoriraa. Eita e tia ia tatou ia faariro i te reira ei ohipa ta tatou e maiti e rave aore ra eita. Eita ta tatou e nehenehe e mairi i te hoê noa ˈˈe mea o te porotarama pae varua ta Iehova e faaineine ra no tatou.
6 Ua pure o Mose i te Atua na roto i teie mau parau: “E haapii mai ia matou i te taio i to matou pue mahana, ia riro to matou aau i te haapao maitai.” (Sal. 90:12). O ta tatou atoa ra anei pure? Te faariro ra anei tatou i te mahana tataitahi ei mea faufaa? Mai te peu e te reira mau, e ‘riro to tatou aau i te haapao maitai’ ma te faaohipa na roto i te hoê huru tano, i te hanahana o to tatou Taata haapii rahi, te Atua ra o Iehova. E tauturu te haapiiraa no ǒ mai i te Atua ra ia tatou ia na reira.