E tamau anaˈe i te parau: “E haere mai.”
1 E ere anei te tusia taraehara a Iesu i te hoê faanahoraa faahiahia mau a Iehova? Te taatoaraa o te mea o ta te mau taata e hinaaro no te ite i te oaoa no nia ïa i taua tusia ra (Ioane 3:16). Tera râ, te itehia ra e mea iti roa o tei ite i taua parau mau ra e o tei farii atu. Area râ, no te anaanatae aroha mau o ta ˈna e faaite maira i te huitaata, ua rave o Iehova te mau faanahoraa ia porohia te parau apî na te mau vahi atoa. Na roto i te arai o ta ˈna Tamaiti, Iesu Mesia, te horoa nei o ˈna na te taatoaraa te ravea ia oaoa e ia roaa te tiaturiraa o te ora mure. — Ioane 17:3.
2 I te roaraa e tausani matahiti, aita i itehia e o vai te hoo i te huitaata i te hara e te pohe. O te hoê hoi “parau aro i hunahia” ia tae roa i te taime e tae mai ai o Iesu Mesia e ‘faaite papu mai i te ora mure ore e te tahuti ore na roto i te evanelia nei ra’. (Roma 16:25; Tim. 2, 1:10.) I te senekele matamua, ua faaite maite te mau pǐpǐ a Iesu i te parau apî maitai. Area o tatou nei, tei ia tatou ra i teie mahana te haamaitairaa faahiahia ia faaite i taua noa iho â parau apî maitai. Ia poro anaˈe tatou i te poroi o te Basileia, te rave amui nei tatou i te ohipa e o Iehova, Iesu Mesia, e te mau taeae o te Mesia o te titau manihini i te mau taata no te mau huru i te pae totiale atoa na roto i teie mau parau: ‘E haere mai. (...) A rave noa mai oia i te pape ora ma te tamoni ore.’ — Apo. 22:17.
3 Oia mau, e ore te taatoaraa e faaroo mai i te parau apî maitai. E mea iti o te tâuˈa mai. Te tiahi nei vetahi i te mau tavini o te Atua o te titau manihini ra ia fanaˈo i te mau pape ora o te parau mau. Noa ˈtu te reira, maoti te puai no ô mai ia Iehova ra, te tamau nei tatou i te faatupu i taua ohipa ra. Ua ite tatou te faaoaoa nei to tatou itoito ia faaite i te parau mau e ia tauturu i te feia e faaroo maira ia Iehova e roaa ia tatou ta ˈna haamaitairaa.
4 I te avaˈe mati, e tauturu tatou i te mau taata o te imi ra i te parau mau ia taio i te buka Apokalupo: tatararaa hopea e ia oaoa i te tiaturiraa ta ˈna e hopoi maira. I te na reiraraa, e roaa ia ratou te mau haamaitairaa e rave rahi. Te paraparau ra iho â te buka a te Apokalupo i te ora no a muri aˈe, to ratou mai to tatou. Ua anaanatae vetahi o tei riro mai i teie nei mahana ei mau tavini no Iehova i te parau mau i muri aˈe i to ratou taioraa i te hoê buka a te Taiete o te faataa i te buka a te Apokalupo. Mai ta tatou i haapii aita i maoro aˈenei i te buka Apokalupo: tatararaa hopea, te taa ra ïa ia tatou to ˈna faufaaraa atoa no te mau taata haapao maitai o tei putapû i te parau mau. Ia farerei anaˈe tatou i roto i te pororaa, e tamata tatou i te faaite atu ia ratou te faufaaraa atoa o teie buka ma te huti i to ratou ara-maite-raa i nia i te hoê aore ra e piti manaˈo anaanatae. Hau atu, e nehenehe atoa tatou, e faaite e te faataa ra o ˈna ma te maramarama te mau parau tohu o te tupu nei i te XXraa o te senekele; ei hiˈoraa, te hororaa maere mau o te mau taata faahoro puaahorofenua taipe, faataahia i roto i te onoraa o te pene o te Apokalupo.
5 I te taime a faaineine ai tatou i te oroa o te Haamanaˈoraa i te poheraa o te Mesia, i te 6 no eperera, e mea tano atu â ia paraparau no nia i te mau faanahoraa î i te aroha o ta Iehova i rave no te huitaata. Ia maiti te mau taata i te faaroo aore ra aita, a tamau anaˈe na tatou i te amo i te hopoia ta te Atua i horoa mai, oia hoi te piiraa i teie titauraa manihini o te faaitoito i te mau taata atoa e hinaaro: ‘E haere mai. (...) A rave noa mai oia i te pape ora ma te tamoni ore.’