E haamanaˈo anaˈe i te pohe o te horoa i te tiaturiraa o te ora mure ore
1 I te 6 no eperera 1993, i muri aˈe i te toparaa mahana, e faahaamanaˈo tatou i te poheraa o te Mauhaa matamua no te ora (Ohipa 3:15). E mea tano iho â e ia haamanaˈo tatou i te oraraa o Iesu e ia haamanaˈo i to ˈna pohe. Oia mau, maoti te toto i maniihia e Iesu e nehenehe ai tatou e tiaturi e ora e a muri noa ˈtu.
2 Te haapapu nei te oroa Haamanaˈoraa i te faufaaraa o te pohe o te Mesia i roto i te tupuraa o te opuaraa a Iehova. E titauhia i roto i taua opuaraa ra e ia horoahia te hoê tusia taata no te hoo i te huaai a Adamu. E nehenehe te mau miria taata, ma te faatupu te faaroo i roto i taua tusia ra, e fanaˈo i te ora mure ore i roto i te hoê paradaiso i nia i te fenua nei. — Ioane 3:16.
3 Te tiai ru nei te mau taata atoa o te au ra i te parau mau e te ora no te faatupu i te oroa Haamanaˈoraa, ma te faaroo i te faaueraa a Iesu (Luka 22:19). Eaha ta tatou tataitahi e rave no te faaite e te haafaufaa nei tatou i te tusia taraehara o te Mesia? Mai te peu e te taa ra ia tatou te faufaaraa o te oroa Haamanaˈoraa, e faanaho ïa tatou ia tatou iho no taua mahana ra. Eaha te mau faaineineraa ta tatou e rave no taua oroa taa ê ra?
4 E mea titauhia te faaineineraa: Oia mau, e ara tatou e ia tae mai te mau melo atoa o to tatou utuafare. E hinaaro atoa tatou e faaineine ia tatou i te pae feruriraa ma te taio e te feruri i te mau irava o te Bibilia i faahitihia i nia i te tarena 1993 no te area taime o te 1 e tae atu i te 6 no eperera. Na mua noa mai i te 6 no eperera, e mea tano ia hiˈopoa tatou i te faufaaraa o te oroa Haamanaˈoraa i roto i ta tatou haapiiraa tataitahi e te utuafare. E feruri e ia tae na mua ˈˈe e ia faaea maa taime iti i muri aˈe i te hopearaa o te oroa, no te farii i te mau taata o te putuputu mai no te taime matamua i te hoê o ta tatou mau putuputuraa.
5 I te roaraa o te mau hebedoma na mua noa ˈˈe i te oroa Haamanaˈoraa, e titau manihini tatou i te mau taata atoa i ineine maitai o ta tatou i matau. No te reira, ua roaa i te mau amuiraa, i te taime o te matahiti i haponohia ˈi te mau api parau no te titau-manihini-raa. Ia faaohipa anaˈe tatou i te reira, eiaha e haamoe i te haapapu te vahi e te hora o te oroa. E rave i te hoê tabula o te mau taata o ta tatou e hinaaro ra e titau manihini. E pereoo anei to ratou paatoa? Mai te peu e aita, eaha ta tatou e rave no te tauturu atu ia ratou? Mai te peu e parahiraa ta tatou i roto i to tatou pereoo, no te aha e ore e ani i te mau matahiapo e mai te peu aita anei te hoê e hinaaro ia faahorohia o ˈna?
6 E tia i te mau matahiapo ia rave i te mau faaineineraa taa ê no te oroa Haamanaˈoraa, no te mea te hoê oroa faufaa roa ˈˈe te reira o te matahiti, e rave rahi taata o te putuputu mai (Kor. 1, 14:40). Hoê hebedoma na mua noa ˈˈe i te 6 no eperera, e faanaho te mau matahiapo i te hoê putuputuraa e te mau taeae o te hopoi mai i ta ratou tauturu i te taime o te oroa Haamanaˈoraa. E haapapu ratou e ua taa rii i te taatoaraa i te mau faanahoraa i ravehia no te mau vahi parahihia e te tereraa o te pane e te uaina. Teie nei râ, mai te peu e ua faataahia outou ei melo o te pǔpǔ farii taata aore ra ei taata opere, a apee maite i te mau aratairaa a te mau matahiapo. Maoti te tumu parau tarenihia o te api 7, e hiˈopoa te mau matahiapo e ia ravehia te mau faanahoraa atoa no te mau melo o te pǔpǔ farii taata, te mau taata opere e te taeae orero na mua ˈˈe.
7 I teie mahana, mea iti roa te mau taeae o te Mesia e toe ra i nia i te fenua, e, i te tau a muri aˈe e fatata ra, eita e tupu faahou te oroa Haamanaˈoraa (Kor. 1, 11:25, 26). Tera râ, noa ˈtu te maororaa o te oaoa ia faatupu i te reira, e faahaamanaˈo anaˈe tatou ma te tano i te pohe o te horoa mai i te tiaturiraa o te ora mure ore.