“Ma te haapii atu (...) i te mau mea atoa ta ˈu i parau atu ia outou na”
1 I roto i te ohipa faariroraa i te taata ei pǐpǐ, te vai atoa ra te haapiiraa. Hou te hoê taata e riro mai ai ei pǐpǐ na te Mesia, e tia ia haapii atu ia ˈna ia “haapao i te mau mea atoa” ta Iesu i faaue mai (Mat. 28:19, 20). Ua riro te haapiiraa bibilia i te fare o te taata ei ravea maitai roa ˈˈe no te na reira.
2 E ere noa i te mea ohie ia haamata i te mau haapiiraa bibilia. Mai te peu e te farerei nei outou i te mau fifi i roto i teie tuhaa, eiaha e haaparuparu. Mea na roto i te tutava-noa-raa e te faatupuraa i te hinaaro haavare ore e tufa i te parau mau tatou e manuïa ˈi. — Gal. 6:9.
3 A atuatu i te anaanatae: Peneiaˈe mea iti roa te anaanatae o te hoê taata i te tauaparauraa matamua. Ia au i te mau huru tupuraa, ua vaiiho atu paha outou i te hoê api parau iti, te hoê vea iti aore ra te tahi mau vea. E nehenehe outou e haamata i te hoê haapiiraa bibilia maoti te hoê o teie mau mauhaa. Mai te peu e e faaite te taata i te anaanatae rahi aˈe no te poroi, e nehenehe ïa, i te tere i muri iho, e huti i to ˈna ara-maite-raa i nia i te tahi atu buka e tano.
4 Ua riro te faaineineraa ei taviri no te manuïaraa. No te aha outou e ore ai e faaohipa i te hoê irava faahitihia i roto i te api parau iti, te vea iti aore ra te vea o ta outou e opua ra e faaohipa i te hoˈi-faahou-raa e farerei? E nehenehe ïa outou e faatupu i te hoê tuatiraa i rotopu i te papai e te aparauraa, e peneiaˈe e taio roa ˈtu hoê aore ra e piti paratarapha.
5 E nehenehe outou e parau e:
◼ “Te faaite nei matou i te hoê parau tohu faufaa mau e tupu ra i to tatou nei tau.” A taio i te Mataio 24:3, e a faatuati i teie irava i te mau hohoˈa e te mau tatararaa e vauvauhia ra i te api 24 o te vea ra “Inaha”. E nehenehe e faaohipa i te hoê â ravea ia faaite anaˈe tatou i te api parau iti E ora anei teie nei ao?
6 Ia ite outou i te tahi anaanatae mau i roto i te taata, a faariro ei hopoia na outou te atuatu-oioi-raa i teie anaanatae. A tamata i te hoˈi mai i taua iho hebedoma ra. Te vai noa râ ïa te aparauraa i roto i te feruriraa o te taata. I te mau tere atoa, a tuatapapa i te tahi mau paratarapha o te papai o ta outou i vaiiho. I muri iho, i te mea e ua faaarahia te anaanatae, a pûpû atu i te buka E ora e a muri noa ˈtu e a haere atu â i mua na roto i te peeraa i te hoê â huru raveraa.
7 Mea rahi â te ohipa e toe ra i roto i te auhune rahi i tohuhia mai e Iesu (Mat. 9:37, 38). A haapii noa ˈi tatou i te feia aau tae, e huti mai tatou i te puai i te mea e ‘tei pihai iho o Iesu ia tatou e tae roa ˈtu i te hopea o te faanahoraa o te mau mea’.