Te mau faaiteraa ohie e te aravihi
1 Ua faaite haere o Iesu i te Basileia o te Atua ma te ohie e te papu. Ua ite oia e e farii maitai te mau “mamoe” i te parau mau. Ua ite atoa oia e e ere hoê â manaˈo, hoê â anaanatae, e hoê â aravihi no te feruriraa to te mau taata atoa. No reira oia i faaohipa ˈi i te mau omuaraa parau huru rau, te mau uiraa e te mau faahohoˈaraa ohie no te huti i te ara-maite-raa o te feia e faaroo maira ia ˈna e no te haaputapû i to ratou mafatu. E nehenehe tatou e pee i to ˈna hiˈoraa na roto i te faaohipa-maitai-raa i te mau faaiteraa ohie e te aravihi.
2 E faaohipa anaˈe i te buka Haaferuriraa ma te aravihi: Ua tano maitai te omuaraa parau matamua i raro aˈe i te upoo parau iti “Ohipa/Nohoraa”, i te api 5 o te vea iti Aparauraa bibilia, e mea ohie atoa ia faaite.
E nehenehe tatou e parau e:
◼ “Ua tauaparau matou e te feia e faaea ra na pihai iho ia oe no nia i te ravea e roaa ˈi te hoê ohipa e te hoê vahi nohoraa no te taatoaraa. I to oe manaˈo, mea tano anei ia tiai e na te mau faatereraa taata e horoa mai i te reira? (...) Te vai ra râ te tahi taata o tei ite e nafea ia faaafaro i taua fifi ra. Te hinaaro nei matou e parau no nia i te Poiete o te taata.” E taio atu tatou i te Isaia 65:21-23. E nehenehe tatou e ani i muri iho i te manaˈo o te taata.
3 E huti mau â te omuaraa parau e faahitihia ra i raro aˈe i te upoo parau iti “Tia-ore-raa/Mauiuiraa” i te api 7 i te anaanatae o te mau taata e rave rahi.
E nehenehe tatou e parau e:
◼ “Aita anei oe i aniani aˈena e: Te tâuˈa ra anei te Atua i te tia-ore-raa e te mau mauiui e faateimaha nei i te mau taata?” I muri aˈe i to tatou vaiihoraa i te taata ia pahono, e taio atu tatou i te Koheleta 4:1 e te Salamo 72:12-14. E pûpû atu tatou i te buka E ora e a muri noa ˈtu, e tatara ˈtu tatou i te mau api 150-153 e e faataa poto noa ˈtu tatou na roto i te mau hohoˈa e te faatupu nei te mau huru tupuraa o te ao nei i te mau parau tohu bibilia. I muri iho, e faaohipa tatou i te mau api 161 e 162 no te faaite i te mau haamaitairaa ta te Atua e tǎpǔ nei i te mau taata. E ani atu tatou i te taata e eaha te haamaitairaa o ta ˈna e hinaaro rahi aˈe.
4 Mai te peu e aita te taata e anaanatae ra, mea tano aˈe paha ia huti i to ˈna ara-maite-raa i nia i te tumu parau o te hoê vea, i nia i te hoê vea iti aore ra i nia i te hoê api parau iti, maoti hoi i nia i te buka E ora e a muri noa ˈtu.
Ei hiˈoraa, i muri aˈe i te faaohiparaa i te omuaraa parau e faahitihia ra i te paratarapha 2 o teie tumu parau, e nehenehe tatou e parau e:
◼ “Te faataa maramarama maitai ra teie vea iti Te haapao mau ra anei te Atua ia tatou?, e eaha ta te Atua i tǎpǔ i te rave no te haamâha i to tatou mau hinaaro i te mau mahana atoa, e te faaite ra oia e nafea tatou e fanaˈo ai i teie mau parau tǎpǔ.” E tatara tatou i te vea iti i te mau api 26 e te 27, e e huti tatou i te ara-maite-raa i nia i te paratarapha 21.
5 Aore ra, i muri aˈe i te faaohiparaa i te omuaraa parau i faahitihia i te paratarapha 3, e nehenehe tatou e haamatara i te api parau iti E ora anei teie nei ao?
E nehenehe tatou e parau e:
◼ “Mea rahi roa te mauiui e te mau fifi i roto i teie ao i to tatou nei tau. Te faaite ra teie vea e ua tohuhia mai te tamaˈi, te mau oˈe, e te mau maˈi i roto i te Bibilia. Tera râ, ua tǎpǔ atoa te Atua e e tamǎrû oia i te huitaata nei na roto i te hoê tauiraa faahiahia.” E taio tatou i te paratarapha hopea o te api 5 o te api parau iti.
6 Mai te peu e e anaanatae tatou i te taata ma te haavare ore e e faaohipa tatou i te hoê faaiteraa ohie e te aravihi o te haaputapû i to ratou mafatu, ma te papu maitai, e farii maitai mai te feia ta Iesu i faaau i te mamoe i ta tatou poroi. — Ioane 10:16.