‘Te faaararaa i te hinaaro e ite i roto i te mafatu e te feruriraa’

“Aita e parau no te faataa i te oaoa e te anaanatae e rahi noa ra a taio ai au ma te hiaai rahi i te buka ra Y a-t-il un Créateur qui se soucie de vous? E tupu mai i roto i te hoê taata te hoê hinaaro—eita, te hoê titauraa—e ite hau atu â. Mauruuru no to outou faaararaa i te hinaaro e ite i roto i to ˈu mafatu e to ˈu feruriraa.”

TEIE te manaˈo o te hoê Ite no Iehova no Caroline Apatoerau, i te mau Hau Amui no Marite, no nia i te buka a te Taiete Watch Tower i matara mai i te mau Tairururaa Mataeinaa “E aratai te eˈa o te Atua i te ora” 1998/1999. Noa ˈtu e aita ta outou teie buka, a tapao i te tahi atu mau manaˈo.

Tau mahana i muri aˈe i te noaaraa mai ta ˈna buka i te hoê tairururaa i tupu i San Diego, i Kalifonia, i te mau Hau Amui no Marite, ua papai te hoê taata e: “Ua riro teie buka ei ravea no te haapaari mau i te faaroo. Ua î to ˈu mafatu i te mauruuru rahi no te mau ohipa ta Iehova i hamani. Tei te api 98 vau, e te taiâ nei au i te mahana e tae ai au i te api hopea! Mea oaoa roa.”

Ua papai te hoê vahine no te pae Hitia o te râ e: “Ua faahiti te taeae orero i te tairururaa i te mau parau ra ‘e buka otahi,’ e ua tano maitai taua mau parau ra i tei papaihia i roto i te buka. Hoê tuhaa faahiahia, oia ïa aita te buka e faahepo ra i te taata taio ia farii i te vai-mau-raa o te Atua, te faaite noa ra râ oia i te mau tupuraa.”

Te vai atoa ra te mau mea faahiahia i itehia i te pae ite aivanaa no nia i to tatou nei ao materia, te ora, e tatou. E rave rahi tei maere. “Aita mau â e parau no te faataa i to ˈu putapû rahi i teie buka iti,” ta te hoê vahine no Kalifonia ïa i papai. “Eita ta ˈu e nehenehe e faaea i te taio i te buka a faataa ˈi te api taitahi i te tahi atu â mau mea i itehia no nia i to tatou ao materia e te ora atoa. Mea rahi mau â ta ˈu i haapii! E poihere au i teie buka iti e e pûpû vau i te reira i te taata e rave rahi.”

Hoê tuhaa i auhia e e rave rahi, oia ïa te horoa ra te buka i te hoê haapotoraa o te Bibilia, ma te haamatara i te huru o te Poiete. “Te manaˈo rahi no nia i te Bibilia, e vai ra i te pae hopea o te buka, o te hoê ïa o te mau haapotoraa maitai roa ˈˈe ta ˈu i taio,” e manaˈo matauhia teie. I muri iti noa ˈˈe i te hoê tairururaa matamua i tupu i New York, i te mau Hau Amui no Marite, ua papai te hoê vahine e: “Ua riro te buka apî ei buka anaanatae roa ˈˈe ta outou i nenei. Ua au roa vau i te mau haapapuraa aivanaa e te vai ra te hoê Poiete. E navai noa te haapotoraa papu o te Bibilia no te faataa i te mau manaˈo e horoahia ra e no te faaara i te hiaai e taio faahou.”

Te ite aivanaa taa maitai

E au ra paha e mea fifi ia taa i te mau haamaramaramaraa aivanaa i roto i te mau pene matamua, teie râ te tahi mau manaˈo matauhia.

Ua papai te hoê taata no Kanada e: “Mea taa ê roa oia i te mau buka aivanaa, e tamata te feia papai i te faahoruhoru ia tatou na roto i ta ratou mau parau rahi. Mea aravihi mau outou i te hohoraraa i te mau tumu parau o te ihipuai o te taoˈa, te ihitaoˈa, te ADN, te mau chromosome, e te vai atu â, e ia nehenehe matou e taa maitai. Ahiri paˈi e na outou i papai i te mau buka haapiiraa tuatoru ta ˈu i tuatapapa tau matahiti aˈenei!”

Ua papai te hoê orometua haapii i te ihipuai o te taoˈa i te haapiiraa tuatoru e: “Te hohora ra [te buka] i te mau tumu parau ma te ore e haafifihia e te mau manaˈo aravihi. E haaferuri te buka i te taata taio e e faahiti oia i te mau parau a te mau aivanaa rahi e rave rahi. E buka teie ‘e tia ia taiohia’ e te taata e anaanatae i te tumu o te ao materia e te ora, e aivanaa anei aore ra e taata au noa.”

Ua parau te hoê vahine apî e haapii ra i te toroa tuati e: “Ua maere roa vau i to ˈu hiˈoraa i te pene 4 e to ˈu taioraa i te hoê faahitiraa no roto mai i te buka ta matou e faaohipa ra i roto i te haapiiraa! Ua horoa vau i te buka i ta matou orometua haapii e ua parau atu vau e e ite oia i te mau haamaramaramaraa anaanatae. Ua faaite au ia ˈna i te api 54 no nia i te roro. Ua taio oia e ua na ô ihora e, ‘Mea anaanatae roa! E tuatapapa vau i teie buka.’”

Ua papai te hoê melo o te apooraa i Beletita e: “Te mea i apo e i huti mai i to ˈu ara-maite-raa, o te haapotoraa aivanaa ïa e haapapu ra e aita te ite aivanaa no teie tau e patoi ra i te manaˈo e hoê noa Atua o te Bibilia, te tuea ra râ i te reira. E manaˈo faahiahia roa teie.”

Te ite-maitai-aˈe-raa i te Poiete

Ua tauturu te buka i te taata i roto e rave rahi fenua ia ite maitai aˈe i te Atua e ia haafatata roa ˈtu â ratou ia ˈna. Ua parau te hoê vahine taio no te oire Fukuoka, i Tapone, e: “Mai te mea ra e te tuu-maitai-hia ra te tapao i nia ia Iehova no te taime matamua. Mea papu maitai te mau manaˈo o te buka. Ua nehenehe au e ite ia Iehova ia au i te hoê hiˈoraa aita roa ˈtu vau i na reira aˈenei e tae mai i teie nei.” Ua papai te hoê tane no Salvador e: “Ua faataa maitai outou e e Atua aroha noa oia, e te hamani maitai rahi, e te faaoromai rahi, e te maitai rahi. Te reira mau â ta matou e hinaaro no te haafatata roa ˈtu â ia ˈna e i ta ˈna Tamaiti. O te buka matamua teie e faataa ra i te mau manaˈo o Iehova e te mau manaˈo o ta ˈna Tamaiti, o Iesu.” E teie ta te hoê taata taio no Zambie i parau: “E auraa apî roa to Iehova no ˈu nei.”

Papu maitai, te oaoa nei te mau Ite no Iehova i te faaite ia vetahi ê i te buka ra Y a-t-il un Créateur qui se soucie de vous? Ua parau te hoê vahine e: “I to ˈu faaotiraa i te taio i te pene 10 [“Mai te peu e te tapitapi ra te Poiete, no te aha i rahi ai te mauiui?”], ua parau vau e, ‘Teie mau â te buka ta matou e hinaaro i Tapone!’ Te hinaaro nei au e haamanaˈo maitai i te tumu parau i roto i teie pene e e faaohipa rahi noa ˈtu â i te reira i roto i te taviniraa.” Te haapii ra te tahi atu tuahine i te Bibilia e te hoê tamahine i paari i roto i te hoê fare pure o to ˈna papa te perepitero. “Mea fifi no ˈna ia farii i te manaˈo o te Poiete. Aita hoê aˈe mea etaeta i roto i te mau faataaraa a teie buka, te vai nei râ te mau tupuraa, no reira, manaˈo ihora vau e e nehenehe te feia faaroo Buddha e taio i te reira ma te feaa ore. E ite hau atu â atoa tatou i te here o Iehova.”

Teie te tahi manaˈo no Beretane mai: “No faaoti noa ˈtura vau i te taio i te buka Créateur e te haamata ra vau i te taio faahou. E buka faahiahia mau teie! E nehenehe te hoê taata e here ia Iehova ia taio oia i teie buka. Ua horoa vau i te tahi na te hoê vahine tapiri, e ua parau oia i muri aˈe i to ˈna taioraa e piti noa pene e, ‘Aita vau i faaea i te taio, mea anaanatae roa.’ Ua papu ia ˈu e e tauturu teie buka i te taata ia ite e ia here i to tatou Poiete Rahi.”

Ua parau te hoê tane no Maryland, i te mau Hau Amui no Marite, e: “Ua haaputapû mau â te buka i to ˈu huru i te pae varua! Ua faaoti au e horoa i te tahi na te mau taata atoa ta ˈu e farerei i ta ˈu ohipa. I te tahi mau taime, mea fifi ia haamata i te poro i te mau taata ite e te ohipa roa. Maoti teie buka, e ite ïa vau i te ravea aravihi e te au.”

Papu maitai, e faatupu te buka ra Y a-t-il un Créateur qui se soucie de vous? i te faahopearaa maitai i nia i te taata e ati aˈe te fenua.

[Faaiteraa i te fatu o te hohoˈa i te api 25]

Hohoˈa o te api matamua i nia, Eagle Nebula: J. Hester and P. Scowen (AZ State Univ.), NASA