To outou Poiete—A haapii mai te aha to ˈna huru
“E tuu vau i te maitai atoa na ˈu ra na mua ia oe, e faaite au i te iˈoa ra o Iehova na mua ia oe.”—EXODO 33:19.
1. No te aha te Poiete e au ai ia faahanahanahia?
UA PAPAI te aposetolo Ioane, te taata papai i te buka hopea o te Bibilia, i teie mau parau hohonu no nia i te Poiete: “E au te hanahana ia oe, e [“Iehova,” MN], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” (Apokalupo 4:11) Mai ta te tumu parau na mua ˈtu i haapapu, te horoa pinepine ra te mau mea i itehia e te ite aivanaa apî, i te mau tumu hau no te tiaturi i te Poiete o te mau mea atoa.
2, 3. (a) Eaha te tia i te taata ia haapii no nia i te Poiete? (b) No te aha e ore ai e tano ia farerei roa ˈtu tatou i te Poiete?
2 Mea faufaa ia farii e te vai ra te Poiete, mea faufaa atoa ia haapii mai te aha to ˈna huru—te vai mau ra oia, e e huti mai to ˈna huru e to ˈna mau eˈa i te taata ia ˈna ra. Ua na reira aˈena paha outou, e ere anei i te mea faufaa ia ite maitai aˈe ia ˈna? E ere ïa te auraa e e farerei roa ˈtu tatou ia ˈna, mai ta tatou e farerei nei i te tahi atu mau taata.
3 O Iehova te Tumu o te mau fetia, e to tatou mahana, e fetia faito au noa ïa. E manaˈo anei outou e tamata i te tapiri roa i pihai iho i te mahana? Eita roa ˈtu ïa! Te ara nei te rahiraa o te mau taata i te hiˈo atu i te mahana aore ra i te haere maoro i nia i te mahana a ino ai to ratou iri i to ˈna mau hihi puai. To ˈna anuvera i ropu roa, tau 15 000 000 ïa teteri. I te mau tetoni atoa, e faataui teie umu atomi veavea tau mirioni tǎne pa-uira ei ito. Hoê noa tuhaa o te reira e tae ra i nia i te fenua ei veavea e ei maramarama, na te reira râ e turu ra i te mau mea ora atoa i ǒ nei. Te haapapu maira taua mau mea faufaa ra i te puai faahiahia roa o te Poiete. Ua tano mau â Isaia i te papairaa no nia i “to [te Poiete] ra puai rahi e te mana rahi ra.”—Isaia 40:26.
4. Eaha ta Mose i ani, e nafea to Iehova pahonoraa?
4 Ua ite râ outou e tau avaˈe i muri aˈe i to te mau ati Iseraela faarueraa ia Aiphiti i te matahiti 1513 H.T.T., ua taparu Mose i te Poiete e: “E faaite mai oe i to oe huru hanahana ra.” (Exodo 33:18) Ia haamanaˈo outou e o te Atua te Tumu o te mahana, e nehenehe ïa outou e taa no te aha oia i parau ai ia Mose e: “E ore oe e tia ia hiˈo mai i tau mata; e ore roa hoi te hoê taata e ora ia na reira i te hiˈo mai ia ˈu.” Ua faatia te Poiete ia haere Mose i te hoê vahi tapuniraa i nia i te Mouˈa Sinai a “haere” ai Oia “na pihaiiho.” Ua ite ïa Mose i te “tua” o te Atua, ei auraa parau, i te tahi huru faaiteraa o te hanahana aore ra te vairaa mai o te Poiete.—Exodo 33:20-23; Ioane 1:18.
5. Nafea to te Poiete pahonoraa i te aniraa a Mose, e eaha ta te reira e haapapu ra?
5 Ua mâha te hinaaro o Mose e ite maitai aˈe i te Poiete. Papu maitai e na roto i te arai o te hoê melahi, ua haere te Atua na pihai iho ia Mose e ua parau oia e: “O Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara, e te ino; e e ore e parau i te taata ino e e taata ino ore.” (Exodo 34:6, 7) Te faaite ra te reira e te ite-maitai-aˈe-raa i to tatou Poiete, e titauhia ïa te taa-hau-atu-â-raa mai te aha to ˈna huru, to ˈna ihotaata e to ˈna mau huru maitatai, eiaha râ te ite-mata-raa ˈtu ia ˈna.
6. Nafea te ravea parururaa o to tatou tino e riro ai ei ohipa maere?
6 Hoê ravea e nehenehe ai tatou e na reira, o te hiˈo-maite-raa ïa i te mau huru maitatai o te Atua na roto i te mau mea ta ˈna i poiete. A hiˈo na i te ravea parururaa o to outou tino. I roto i te hoê tumu parau no nia i te parururaa, ua parau te hoê vea (Scientific American) e: “Mai na mua ˈˈe i te fanauraa e tae noa ˈtu i te pohe, e ohipa noa te ravea parururaa o te tino. E paruru te mau huˈa taoˈa e te mau taoˈa tahi ora e rave rau . . . ia tatou i te mau manumanu iino e te mau manumanu faatupu i te maˈi. Mai te peu e aita taua mau ravea parururaa ra, eita ïa te taata e nehenehe e ora mai.” Nohea mai taua ravea parururaa ra? Te na ô ra te hoê tumu parau i roto i taua noâ vea ra e: “No ǒ mai te rahiraa taoˈa tahi ora e ohipa ra ma te aravihi no te paruru i te tino i te mau manumanu maˈi e te mau tirotiro, i te tahi mau taoˈa tahi ora matamua i fa matamua mai e iva hebedoma i muri aˈe i te tôraa.” E horoa te hoê vahine hapû i te tahi ravea parururaa i te aiû i roto i to ˈna opu. I muri iho, na roto i to ˈna û, e horoa atoa oia i te mau taoˈa tahi ora paruru e te tahi mau raau maitatai no ta ˈna aiû.
7. Eaha ta tatou e ite no nia i te ravea parururaa o to tatou tino, e eaha ta te reira e haapapu ra?
7 E tumu papu maitai ta outou no te parau e ua hau ê te ravea parururaa o to outou tino i ta te raau no teie tau e nehenehe e horoa. No reira, a uiui e, ‘Eaha ta te reira e faaite ra no nia i Tei hamani e i horoa mai i te reira?’ Eita e ore e te faaite ra teie ravea, “i fa matamua mai e iva hebedoma i muri aˈe i te tôraa” e i ineine i te paruru i te hoê aiû apî, i te paari e te feruri-atea-raa. E nehenehe anei râ tatou e ite i te tahi atu â mau mea no nia i te Poiete na roto i teie ravea parururaa? Eaha ta te rahiraa o tatou e parau no nia ia Albert Schweitzer e vetahi atu â i pûpû i to ratou ora no te rapaau i te feia riirii? E faahiti iho â ïa tatou i te mau huru maitatai no nia i teie mau taata tauturu aroha. E to tatou Poiete ïa, eaha ta tatou e nehenehe e parau no nia ia ˈna, i horoa mai i te hoê ravea parururaa i te tino no te taata ona e te taata veve? Papu maitai, e Atua here oia, te paetahi ore, te aroha, e te parau-tia. Aita anei te reira e tuea ra i te faataaraa o te Poiete ta Mose i faaroo?
Te faaite ra oia mai te aha to ˈna huru
8. Te faaite maira Iehova o vai o ˈna na roto i teihea ravea taa ê?
8 Te vai ra râ te tahi atu ravea no te ite maitai aˈe i to tatou Poiete—te Bibilia. E faufaaraa taa ê to te reira no te mea te vai ra te tahi mau mea no nia ia ˈna e ore roa ˈtu e itehia i roto i te ite aivanaa e te ao materia, e te tahi atu â mau mea, mea maramarama aˈe ïa i roto i te Bibilia. O te iˈoa iho o te Atua te tahi hiˈoraa. O te Bibilia anaˈe te faaite ra i te iˈoa o te Poiete e to ˈna auraa. I roto i te mau papai Hebera o te Bibilia, e itehia to ˈna iˈoa tau 7 000 taime na roto e maha leta o te nehenehe e papaihia mai teie YHWH aore ra JHVH, e parau-pinepine-hia Iehova na roto i te reo Tahiti.—Exodo 3:15; 6:3.
9. Eaha te auraa o te iˈoa o te Poiete, e eaha ta tatou e nehenehe e faaoti no nia i te reira?
9 Ia ite maitai aˈe tatou i te Poiete, e tia ia tatou ia taa e e ere oia i te hoê “Tumu Matamua” fifi ia faataa aore ra te hoê “Te vai nei au” papu ore. Te faaite ra to ˈna iˈoa i te reira. No roto mai te reira i te hoê ihoparau Hebera teie te auraa “riro.”a (A faaau e te Genese 27:29; Koheleta 11:3.) Te auraa o te iˈoa o te Atua, oia ïa “Na ˈna e faariro” e te haapapu ra te reira e e opua e e ohipa atoa oia. Na roto i te iteraa e te faaohiparaa i to ˈna iˈoa, e nehenehe tatou e taa maitai aˈe e te faatupu ra oia i ta ˈna mau parau tǎpǔ e te rohi ra oia i te faatupu i ta ˈna opuaraa.
10. Teihea ite aravihi faufaa e noaa ia tatou i roto i te buka Genese?
10 Ua riro te Bibilia ei pu no te ite i te mau opuaraa a te Atua e to ˈna huru. Te faaite ra te buka Genese e i te hoê taime ua vai na te taata i roto i te hau e te Atua e ua nehenehe ratou e fanaˈo i te hoê oraraa roa e auraa to te reira. (Genese 1:28; 2:7-9) Ia au i te auraa o to ˈna iˈoa, e nehenehe tatou e tiaturi papu e e faaore Iehova i te mauiui e te inoino ta te taata i faaruru maoro na. Te taio nei tatou no nia i te tupuraa o ta ˈna opuaraa: “Tei raro aˈe te ao pae tino i te inoino, e ere na ˈna iho i hinaaro, na te Poiete râ i na reira, ua horoa oia i te hoê tiaturiraa e ia tae i te hoê mahana . . . e fanaˈo oia i te tiamâraa hanahana o te mau tamarii a te Atua.”—Roma 8:20, 21, The New Testament Letters, a J. W. C. Wand.
11. No te aha tatou e hiˈopoa ˈi i te mau aamu Bibilia, e eaha te mau tupuraa o te hoê o te mau aamu?
11 E nehenehe atoa te Bibilia e tauturu ia tatou ia ite maitai aˈe i to tatou Poiete, inaha te faaite ra oia i ta ˈna mau ohipa e to ˈna huru i nia ia Iseraela i tahito ra. A rave na i te hiˈoraa o Elisaia e o Naamana, te raatira faehau o te mau enemi no Arama. A taio ai outou i teie aamu i roto i Te mau arii 2 pene 5, e ite outou e ua parau te hoê tamahine ati Iseraela i tapea-tîtî-hia e e nehenehe o Elisaia i Iseraela e faaora i te lepera o Naamana. Ua haere o Naamana i reira ma te manaˈo e e rave Elisaia i te hoê peu faaoraraa miterio ma te tairiiri i to ˈna rima. Aita Elisaia i na reira, ua faaue oia ia Naamana ia haere e hopu i te pape i Ioridana. Ua tia râ i te mau tavini o Naamana ia turai ia ˈna ia faaroo i te parau a Elisaia, i to ˈna na reiraraa, ua ora mai oia. Ua pûpû atura Naamana i te tahi mau ô faahiahia, aita râ Elisaia i farii. I muri iho, haere omoe atura te hoê tavini a Naamana ra e noaa maira ia ˈna te tahi mau taoˈa na roto i te hoê haavare. No to ˈna haerea haavare, ua roohia oia i te lepera. E aamu anaanatae roa teie e te putapû—e nehenehe tatou e huti mai i te haapiiraa.
12. Eaha te mau faaotiraa ta tatou e nehenehe e huti mai no nia i te Poiete i roto i te aamu o Elisaia e Naamana?
12 Ma te au maitai, te faaite ra teie aamu e e ere te Poiete Rahi o te ao materia i te mea teitei roa no te farii maitai i te hoê tamahine iti, mea taa ê roa te reira i tei matauhia i roto i te mau hiroa tumu e rave rahi i teie mahana. Te haapapu atoa ra te aamu e eita te Poiete e farii maitai i te hoê noa nunaa. (Ohipa 10:34, 35) Te mea anaanatae, aita oia i faaue i te taata ia faaohipa i te haavarevare—e peu matauhia e te tahi “feia faaora maˈi” i tahito ra e i teie nei—ua faaite te Poiete i te paari faahiahia roa. Ua ite oia nafea ia rapaau i te lepera. Ua faaite atoa oia i te ite aravihi e te parau-tia na roto i te tapearaa eiaha te haavare ia manuïa. Aita atoa anei te reira e tuea ra i te huru o Iehova ta Mose i faaroo? Noa ˈtu e mea poto taua aamu Bibilia ra, e nehenehe tatou e ite mai te aha te huru o to tatou Poiete!—Salamo 33:5; 37:28.
13. A faataa nafea tatou e huti ai i te mau haapiiraa faufaa i roto i te mau aamu Bibilia.
13 Te haapapu ra te tahi atu mau aamu o te mau ohipa mauruuru ore a Iseraela e ta te Atua i rave e te haapao mau ra Iehova ia tatou. Te faaite ra te Bibilia e ua na nia iho noa te mau ati Iseraela i te faaooo ia ˈna, e ua mauiui e ua oto oia. (Salamo 78:40, 41) No reira, e mau manaˈo hohonu to te Poiete, e te tapitapi nei oia i ta te taata e rave ra. Mea rahi atoa te haapiiraa e huti mai i roto i te mau aamu o te mau taata matau-maitai-hia. I to Davida maitiraahia ei arii no Iseraela, ua parau te Atua ia Samuela e: “E hiˈo hoi te taata i te huru i rapae au aˈe, area o Iehova, e hiˈo ïa i te aau.” (Samuela 1, 16:7) Oia mau, e hiˈo te Poiete eaha to tatou huru i roto, eiaha i te huru rapaeau. E manaˈo au mau teie!
14. A taio ai tatou i te mau Papai Hebera, eaha ta tatou e nehenehe e rave?
14 E 39 buka Bibilia tei papaihia na mua ˈˈe i te tau o Iesu, e e tia ia tatou ia taio i te reira. Eiaha no te ite noa i te mau aamu Bibilia. Ia hinaaro mau tatou e ite mai te aha te huru o to tatou Poiete, e tia ïa ia tatou ia feruri maite i taua mau aamu ra, ma te feruri paha, ‘Eaha ta teie aamu e faaite ra no nia i to ˈna huru? Eaha to ˈna mau huru maitatai e ite-maitai-hia ra i ǒ nei?’b E nehenehe te na reiraraa e tauturu i te feia feaa ia ite e no ǒ mai te Bibilia i te Atua ra, a riro atu ai te reira ei niu e ite maitai aˈe ai ratou i to ˈna Fatu î i te here.
Te tauturu maira te hoê Orometua Rahi ia ite tatou i te Poiete
15. No te aha te mau ohipa e te mau haapiiraa a Iesu e riro ai i te haapii mai ia tatou?
15 Parau mau e te feia e feaa ra i te vai-mau-raa o te Atua aore ra e ere mea papu to ratou manaˈo i te Atua, mea iti roa to ratou ite i te Bibilia. Peneiaˈe ua farerei outou i te tahi mau taata aita i ite e ua ora anei Mose na mua ˈˈe aore ra i muri aˈe ia Mataio e aita i ite maitai i te mau ohipa aore ra te mau haapiiraa a Iesu. Mea peapea roa te reira no te mea e nehenehe te hoê taata e haapii rahi no nia i te Poiete maoti te Orometua Rahi, o Iesu. Maoti to ˈna taairaa piri roa e te Atua, e nehenehe oia e faaite mai mai te aha te huru o to tatou Poiete. (Ioane 1:18; Korinetia 2, 4:6; Hebera 1:3) E ua na reira oia. Inaha, ua parau oia i te hoê taime e: “O tei hiˈo mai ia ˈu ra, ua hiˈo ïa i te Metua.”—Ioane 14:9.
16. Eaha ta te aparauraa a Iesu i te hoê vahine Samaria e faataa ra?
16 A hiˈo na i teie hiˈoraa. I te hoê taime ua rohirohi hoi Iesu i to ˈna tere, ua paraparau oia i te hoê vahine Samaria i pihai iho ia Sikara. Ua faaite oia i te mau parau mau hohonu, ma te haapapu i te faufaaraa ia ‘haamori i te Metua ma te varua e te parau mau.’ E ape te mau ati Iuda i taua tau ra i to Samaria. Area o Iesu ra, ua faaite oia i te ineineraa o Iehova e farii i te mau tane e te mau vahine aau rotahi no te mau nunaa atoa, mai ta tatou atoa i ite i roto i te aamu o Elisaia e o Naamana. Te haapapu maira te reira e eita Iehova e farii i te au ore etaeta i te pae faaroo e itehia i roto i te ao i teie mahana. E nehenehe atoa tatou e ite e ua ineine Iesu i te haapii i te hoê vahine e faaea faaturi noa ra e te hoê tane. Aita oia i faahapa ia ˈna, ua faatura oia ia ˈna ma te hoê huru o te nehenehe e tauturu mau ia ˈna. I muri iho, ua faaroo aˈera vetahi atu no Samaria ia Iesu e ua parau ratou e: “Ua ite atura matou e, o te Ora mau teie o to te ao, o te Mesia.”—Ioane 4:2-30, 39-42; Te mau arii 1, 8:41-43; Mataio 9:10-13.
17. Eaha te faaotiraa ta te aamu o te tia-faahou-raa o Lazaro e horoa ra?
17 E hiˈo atoa tatou i te tahi atu faahohoˈaraa e nehenehe ai tatou e haapii no nia i te Poiete, na roto i te haamatauraa i te mau ohipa e te mau haapiiraa a Iesu. A feruri na i te taime a pohe ai o Lazaro, te hoa o Iesu. Ua faaite Iesu na mua ˈtu i to ˈna mana e faahoˈi mai i tei pohe i te ora. (Luka 7:11-17; 8:40-56) Eaha râ to ˈna huru i to ˈna iteraa ia Maria, te tuahine o Lazaro, i te otoraa? Ua “uuru ihora [Iesu] e horuhoru atura tana varua.” Aita oia i faaite i te tâuˈa ore; ua “oto” oia. (Ioane 11:33-35) E ere te reira i te hoê noâ faaiteraa i te horuhoru. Ua turaihia Iesu ia rave i te hoê ohipa maitai—ua faatia mai oia ia Lazaro. A feruri na nafea te reira i te tautururaa i te mau aposetolo ia taa i te mau manaˈo hohonu e te mau ohipa a te Poiete. E tia atoa i te reira ia tauturu ia tatou e ia vetahi ê ia taa i te huru e te mau eˈa o te Poiete.
18. Eaha te manaˈo o te taata no nia i te haapiiraa i te Bibilia?
18 Aita e tumu ia haama tatou i te tuatapapa i te Bibilia e i te haapii hau atu â no nia i to tatou Poiete. E ere te Bibilia i te hoê buka tahito. Ua tuatapapa atoa Ioane i te Bibilia e ua riro oia ei apiti piri roa no Iesu. Ua papai oia i muri aˈe e: “Ua ite ra tatou e, ua tae mai te Tamaiti a te Atua, e ua horoa mai i te [“maramarama,” MN] no tatou ia ite tatou ia ˈna ra i te mea mau: e tei roto tatou ia ˈna i taua mea mau ra, tei roto i ta ˈna Tamaiti ra ia Iesu Mesia. Oia te Atua mau e te ora mure ore.” (Ioane 1, 5:20) A hiˈo na e nehenehe te faaohiparaa i te “maramarama” no te ite i “te mea mau,” te Poiete, e aratai i “te ora mure ore.”
Nafea outou e tauturu ai ia vetahi ê ia haapii no nia ia ˈna?
19. Eaha tei ravehia no te tauturu i te feia feaa?
19 E titauhia te mau haapapuraa e rave rahi e tiaturi ai te tahi mau taata e te vai ra te hoê Poiete aroha e tapitapi ra ia tatou e e taa ˈi ratou mai te aha to ˈna huru. Ehia mirioni e feaa noa râ i te Poiete aore ra aita to ratou manaˈo ia ˈna e tuea ra e to te Bibilia. Nafea outou e nehenehe ai e tauturu ia ratou? I te tairururaa mataeinaa e na te mau nunaa atoa 1998/1999 a te mau Ite no Iehova, ua matara mai te hoê mauhaa apî na roto i te mau reo e rave rahi—te buka ra Y a-t-il un Créateur qui se soucie de vous?
20, 21. (a) Nafea te buka ra Créateur e nehenehe ai e faaohipahia ma te manuïa? (b) A faatia i te tahi mau aamu nafea te buka ra Créateur i te riro-aˈena-raa ei buka aravihi.
20 E haapuai teie buka i to outou faaroo i roto i to tatou Poiete e to outou mauruuru no to ˈna huru e mau eˈa. No te aha mea papu te reira? No te mea ua faaineine-taa-ê-hia teie buka ia naeahia te tahi mau tapao. Teie te hoê tumu parau i roto i te buka “Na te aha e horoa i te auraa hau atu â i to outou oraraa?” Ua vauvauhia te mau tumu parau ma te hoê raveraa e anaanatae ai te mau taata mea ite roa ratou. E pahono atoa râ te reira i te mau hinaaro e vai ra ia tatou nei. Te vai ra te mau tumu parau anaanatae e te haapapu i te manaˈo no te feia taio e feaa ra i te vai-mau-raa o te Poiete. Aita te buka e parau ra e te tiaturi ra te taata taio i te hoê Poiete. E anaanatae te feia feaa i te mau mea i itehia e te mau manaˈo apî i te pae aivanaa. E haapaari atoa teie mau mea i te faaroo o te feia e tiaturi ra i te Atua.
21 Ia haapii tatou i teie buka apî, e ite tatou e te horoa ra te mau tumu parau i te hoê haapotoraa o te aamu Bibilia o te haamatara ra i te mau tuhaa o te huru o te Atua, e tauturu te reira i te feia taio ia ite maitai aˈe i te Atua. Ua faaite e rave rahi i taio aˈena i taua buka ra i to ratou manaˈo e e parau mau te reira i roto i to ratou tupuraa. (A hiˈo i te tumu parau i muri nei, mau api 25-26.) Ia ite atoa outou i te reira a haamatau ai outou i te buka e a faaohipa ˈi outou i te reira no te tauturu ia vetahi ê ia ite maitai aˈe i to ratou Poiete.
[Nota i raro i te api]
a Ua faaau te taata ite Jésuite ra o M. J. Gruenthaner, e taata nenei rahi i te hoê vea (The Catholic Biblical Quarterly) i teie ihoparau i ta ˈna i parau no nia i te tahi atu ihoparau hoê â huru, oia hoi “aita roa ˈtu [te reira] e horoa ra i te manaˈo o te hoê vai-mau-raa fifi ia faataa, te faahiti noa ra râ te reira i te vai-mau-raa aore ra te riroraa mai faahiahia mau, oia hoi, te faaite-papu-raa ia ˈna iho.”
b Ia faatia te mau metua i te mau aamu Bibilia i ta ratou mau tamarii, e nehenehe ratou e tauturu i ta ratou mau tamarii ma te faahiti i taua mau uiraa ra. E nehenehe ïa te feia apî e ite o vai te Atua, e e haapii atoa i te feruri maite i ta ˈna Parau.
Ua ite anei outou?
◻ Nafea to Mose ite-maitai-aˈe-raa ia Iehova i nia i te Mouˈa Sinai?
◻ No te aha te haapiiraa i te Bibilia e tauturu ai ia tatou ia ite mai te aha te huru o te Atua?
◻ A taio ai tatou i te Bibilia, eaha ta tatou e nehenehe e rave no te haafatata roa ˈtu â i to tatou Poiete?
◻ Nafea outou e faaohipa ˈi i te buka ra Créateur?
[Hohoˈa i te api 20]
Eaha ta te ravea parururaa o to tatou tino e faaite ra no nia i to tatou Poiete?
[Hohoˈa i te api 21]
Hoê tuhaa o te mau Otaro o te Miti Pohe, e na reta Hebera e maha o te iˈoa o te Atua
[Faaiteraa i te tumu]
Courtesy of the Shrine of the Book, Israel Museum, Jerusalem
[Hohoˈa i te api 23]
Eaha ta tatou e nehenehe e haapii na roto i te huru o Iesu i to Maria otoraa?