E haapaari anaˈe i to tatou tiaturiraa i roto i te parau-tia a te Atua

“Ia tiaturi â oe ia Iehova [iho], i [horoa ˈtu] ai au ia oe i [te ite].”—MASELI 22:19; MN.

1, 2. (a) No te aha te mau Ite no Iehova e tiaturi ai ia Iehova? (Maseli 22:19) (b) Na te aha e faaite ra e e tia i te tahi mau taata ia haapaari i to ratou tiaturiraa ia Iehova?

UA HAAMAITAIHIA te mau Kerisetiano mau e te hoê ite papu o Iehova e o ta ˈna mau opuaraa. Te horoa nei te hoê “tavini haapao maitai e te paari” na ratou ma te here i te “maa [pae varua] i te hora mau ra.” (Mataio 24:45) Ua horoa te ite i noaa mai ia ratou i te hoê niu papu i reira e patu ai i te tiaturiraa i te Atua. No reira, ei pǔpǔ, te faaite nei te mau Ite no Iehova i te tiaturiraa faahiahia ia Iehova e i ta ˈna parau-tia.

² E au ra râ e ei taata taitahi, e tia i te tahi mau Ite ia haapaari i teie huru tiaturiraa. I te tahi mau taime, e faataehia na te mau rata i te Taiete ra o te faaite ra i te feaa no nia i te tahi mau faataaraa i roto i ta ˈna mau papai. No roto mai paha teie mau feaaraa i te hoê huru au ore i te mau tauiraa i ravehia i te paeau haamaramaramaraa, aore ra te mau tumu parau e faahuru ê ra i te taata uiui i te pae o te mau manaˈo horuhoru.—A faaau e te Ioane 6:60, 61.

3. Eaha te nehenehe e roo-atoa-hia e te mau tavini haapao maitai a Iehova, e no te aha?

³ Te ite atoa nei te mau tavini mau a Iehova i te tanoraa mau o te Koheleta 9:11 (MN) e na ô ra e: “Ua hoˈi atura vau no te hiˈo i raro aˈe i te mahana e, e ere tei te feia vitiviti te hororaa, e ere tei te feia puai te aroraa, e ere atoa tei te feia paari te maa, e ere atoa tei te feia maramarama te taoˈa, e ere tei te feia tei noaa i te ite te farii maitai; no te mea e e roo-paatoa-hia ratou e te taime e te tupuraa manaˈo-ore-hia.” Nafea te reira e tano ai i roto i te hoê auraa rahi, aore ra i te pae varua? Ua matau paha tatou i te tahi mau Kerisetiano o te faaohipa oioi ra i te mau aˈoraa a te Bibilia, e mea puai ratou i te paruru i te parau mau, e mea paari i te faaohipa i te mau faaueraa tumu a te Bibilia, e mea itoito i te titau i te ite papu. Teie râ, no “te taime e te tupuraa manaˈo-ore-hia,” ua taotiahia paha vetahi ei faahopearaa o te hoê ati aore ra o te ruhiruhiaraa. Te uiui ra paha ratou e e ô anei ratou i roto i te ao apî a te Atua ma te ore e faaruru i te pohe.

4, 5. No te aha aita e tumu no te mau Kerisetiano ia ore e tiaturi i te parau-tia a Iehova?

⁴ Ia pohe anaˈe te hoa faaipoipo o te hoê Kerisetiano, e mea mauiui roa e mea puai te moemoe. Ua tavini na paha raua toopiti ei feia faaipoipo ia Iehova tau matahiti aore ra tau ahuru matahiti i te maoro. Ua ite te hoa faaipoipo e ora noa ra e e tâpû te pohe i te taatiraa o te faaipoiporaa.a (Korinetia 1, 7:39) I teie nei, e tia ia ˈna ia haavî i to ˈna mau manaˈo horuhoru ia ore to ˈna tiaturiraa ia paruparu.—A faaau e te Mareko 16:8.

⁵ Auê hoi te paari e ia hiˈo i te pohe o te hoê hoa faaipoipo, te hoê metua, te hoê tamarii, aore ra te hoê hoa rahi kerisetiano, ei ravea no te faaite i te tiaturiraa i roto i te parau-tia a Iehova! Noa ˈtu e e erehia tatou iho, e nehenehe tatou e tiaturi e e ere o Iehova i te Atua parau-tia ore. E nehenehe tatou e tiaturi e e oaoa te feia atoa e noaa ia ratou te ora mure ore na roto anei i te oraraa ˈtu i te haamouraa aore ra te tia-faahou-raa. Teie hoi ta te papai salamo i parau no nia i te Atua: “Te heheu nei oe i to rima, e te haamâha nei i te hiaai o te mau mea ora atoa nei. E parau-tia ta Iehova i tana atoa ra mau haerea, e te hamani maitai i ta ˈna atoa ra mau ohipa. Te fatata maira Iehova i te feia atoa e tiaoro atu ia ˈna, i te feia atoa i tiaoro atu ia ˈna ma te haavare ore. E faatia oia i te hinaaro o te feia i mǎtaˈu ia ˈna, e faaroo mai oia i ta ratou tiaoro, e e faaora hoi ia ratou.”—Salamo 145:16-19.

Ia manaˈo tatou e ua mauiui faufaa ore noa tatou

6, 7. (a) No te aha paha vetahi mau Ite, tei mauiui na i mutaa iho, i maramarama taa ê ai i teie nei? (b) No te aha eiaha tatou e manaˈo e ua hape o Iehova i te faatiaraa i teie mau mauiui i mutaa ihora?

⁶ I mutaa ihora, ua mauiui na vetahi mau Ite no to ratou patoiraa i te rave i te hoê ohipa o ta to ratou haava manaˈo e faatia ra i teie nei. Ei hiˈoraa, ua maiti paha ratou a tau matahiti i teie nei i te patoi i te tahi huru taviniraa tivila. I teie nei râ, te manaˈo ra paha te hoê taeae e e nehenehe ta ˈna e rave i teie huru ohipa, ia au i to ˈna haava manaˈo, ma te ore e haafifihia to ˈna tiaraa amui ore kerisetiano i mua i teie faanahoraa o te mau mea.

⁷ Ua hape anei o Iehova i te vaiihoraa ia ˈna ia mauiui no to ˈna patoiraa i te mea o ta ˈna hoi e nehenehe e rave i teie nei ma te fifi ore? Eita te feia i faaruru na i te reira e manaˈo mai te reira. Te oaoa nei râ ratou e ua nehenehe ratou e faaite maitai i mua i te taata e ua faaoti ratou i te tapea i te hoê tiaraa papu i nia i te uiraa o te mana arii o te ao nei. (A faaau e te Ioba 27:5.) No te aha te hoê taata e tatarahapa ˈi no to ˈna peeraa i to ˈna haava manaˈo e turu papu ia Iehova? Na roto i te tururaa ma te taiva ore i te mau faaueraa tumu kerisetiano no te mea e ua taa ia ratou i te reira aore ra na roto i te fariiraa i te mau faaitoitoraa a te haava manaˈo, ua tia mau â ïa ia ratou ia riro ei hoa no Iehova. Papu maitai, e mea paari ia ape te hoê taata i te hoê haerea o te haapeapea i to ˈna haava manaˈo aore ra o te faaturori atoa paha ia vetahi ê. E nehenehe tatou e feruri i roto i teie tuhaa i te hiˈoraa ta te aposetolo Paulo i vaiiho mai.—Korinetia 1, 8:12, 13; 10:31-33.

8. No te aha aita e tumu no te mau Kerisetiano ati Iuda, i haapao na i te Ture na mua ˈˈe, ia feaa i te parau-tia a Iehova?

⁸ No te faaoaoa ia Iehova, ua titauhia te mau ati Iuda ia auraro i na Ture Ahuru e na ture e rave rau ê atu e 600. I muri iho, i raro aˈe i te faanahoraa kerisetiano, aita i titau-faahou-hia ia auraro i teie mau ture no te tavini ia Iehova, aita atoa i te mau ati Iuda i te pae tino. E ere faahou te mau ture i te mau titauraa, tae noa ˈtu i te mau ture no nia i te peritomeraa, te haapaoraa i te Sabati, te pûpûraa i te mau tusia animala, e te haapaoraa i te tahi mau faatureraa i te pae maa. (Korinetia 1, 7:19; 10:25; Kolosa 2:16, 17; Hebera 10:1, 11-14) Ua tiamâ te mau ati Iuda—tae noa ˈtu te mau aposetolo—o tei riro mai ei mau Kerisetiano, i te titauraa e haapao i te mau ture te tia hoi ia ratou ia auraro a vai ai ratou i raro aˈe i te faufaa a te Ture. Ua amuamu anei ratou e mea hape te faanahoraa a te Atua i te faaueraa ia ratou na mua ˈˈe ia rave i te tahi mau mea aita hoi e faufaa faahou i muri iho? Aita, ua oaoa ratou i to ratou maramarama-maitai-raa i te mau opuaraa a Iehova.—Ohipa 16:4, 5.

9. Eaha tei tupu na i nia i te tahi mau Ite, e no te aha râ eiaha ratou e tatarahapa?

⁹ I teie nei tau, ua faaite na vetahi mau Ite i te hoê manaˈo etaeta no nia i ta ratou e nehenehe e rave aore ra eita. No reira ïa ratou i mauiui rahi aˈe ai ia vetahi. I muri iho, ua tauturu te ite rahi atu â ia ratou ia faaaano i ta ratou hiˈoraa i te mau mea. Aita râ e tumu ia tatarahapa ratou i to ratou ohiparaa na mua ˈtu ia au i to ratou haava manaˈo, noa ˈtu e ua mauiui rahi ratou. E mea maitai mau â to ratou faaiteraa i to ratou ineine e mauiui no te ore e taiva ia Iehova, e “no te [“parau apî maitai,” MN] i na reira ˈi” ratou. Te haamaitai ra o Iehova i teie huru paieti. (Korinetia 1, 9:23; Hebera 6:10) Ua papai te aposetolo Petero ma te aravihi e: “Ia [“mauiui,” MN] . . . outou ma te haapao maitai, a faaoromai ai outou, e mea au ïa i te Atua.”—Petero 1, 2:20.

E huti mai i te haapiiraa i roto i te hiˈoraa o Iona

10, 11. Nafea to Iona faaiteraa e aita oia i tiaturi ia Iehova (a) i to ˈna faaueraahia ia haere i Nineve? (b) i to te Atua oreraa e haamou i to Nineve?

¹⁰ I to ˈna faaueraahia e haere i Nineve, aita o Iona i haafaufaa e te tiaturi ra o Iehova ia ˈna. I muri aˈe i te hoê ohipa riaria i tupu no to ˈna haamarirauraa i te faaroo, ua taa ˈtura ia Iona e ua hape oia, ua farii oia i ta ˈna hopoia na te ara, e ua faaara ˈtura i to Nineve e ua fatata te haamouraa. I muri iho, ua tupu atura te hoê ohipa manaˈo-ore-hia: No te mea hoi e ua tatarahapa to Nineve, ua faaoti atura o Iehova eiaha e haamou faahou ia ratou.—Iona 1:1–3:10.

¹¹ Eaha ïa te huru o Iona? No to ˈna inoino, ua amuamu atura oia i te Atua na roto i te pure. Teie te tumu i oto ai oia: ‘Ua manaˈo vau e e tupu te mau mea mai teie te huru. No reira ïa vau i ore ai e hinaaro e haere oioi i Nineve. I teie nei, noa ˈtu te mau mea atoa ta ˈu i faaruru, tae noa ˈtu i te riaria e te haama i to ˈu horomiiraahia e te hoê iˈa rahi, e to ˈu rohiraa no te faaara i to Nineve e te fatata maira te haamouraa, tera ïa te faahopearaa! Ua faufaa ore ïa ta ˈu mau ohipa e to ˈu mau mauiui atoa! Mea maitai aˈe ïa no ˈu ia pohe!’—Iona 4:1-3.

12. Eaha ta tatou e nehenehe e haapii i roto i te hiˈoraa o Iona?

¹² E tumu papu anei ta Iona no te amuamu? Ua hape anei o Iehova i te aroharaa i te feia rave hara i tatarahapa? E tia hoi ia Iona ia oaoa; e tau ahuru tausani taata tei ore i haamouhia! (Iona 4:11) Ua faaite râ to ˈna haerea faatura ore e te amuamu e aita oia e tiaturi roa ra i te parau-tia a Iehova. Ua manaˈo rahi roa oia ia ˈna iho e maa vahi iti noa ia vetahi ê. E huti mai ïa tatou i te haapiiraa i roto i te hiˈoraa o Iona, na roto i te tuuraa ia tatou e i to tatou iho mau manaˈo hohonu i muri. Ia papu ia tatou e te mau ohipa maitatai e rave, o te auraroraa ïa ia Iehova, te peeraa i te aratairaa e horoahia ra na roto i ta ˈna faanahonahoraa e te fariiraa i ta ˈna mau faaotiraa. E tiaturi ïa tatou e ‘e maitaihia te feia i mǎtaˈu i te Atua.’—Koheleta 8:12.

Teie te taime no te haapaari i to tatou tiaturiraa!

13. Nafea tatou paatoa e nehenehe ai e haapaari i to tatou tiaturiraa ia Iehova?

¹³ Te haapaariraa i to tatou tiaturiraa ia Iehova, e haerea paari ïa. (Maseli 3:5-8) Parau mau, eita e navai ia pure noa tatou ia Iehova ia tauturu mai ia rahi atu â to tatou tiaturiraa. E rahi mai te tiaturiraa i niuhia i nia i te ite papu, no reira, e tia ia tatou ia faariro i te haapiiraa Bibilia tataitahi, te taioraa i te Bibilia e te mau papai o te faataa ra i te Bibilia atoa, ei peu matauhia e tatou i te mau mahana atoa. E mea faufaa roa te haere-tamau-raa i te mau putuputuraa kerisetiano, oia atoa te faaineineraa e te apiti-rahi-raa ˈtu. Na roto i te haamatauraa i te tufa i te mau parau mau Bibilia na vetahi ê, i te pahono ma te aravihi i te mau patoiraa, e puai atoa ïa to tatou tiaturiraa ia Iehova e i ta ˈna Parau. E piri roa ˈtu â ïa to tatou taairaa e o ˈna i te mau mahana atoa.

14. No te aha e fatata te nunaa o te Atua i te titauhia ia faaite i to ratou tiaturiraa ia Iehova mai tei ore i itehia aˈenei?

¹⁴ I te tau piri i mua nei, e fatata te taime rahi roa ˈˈe o te ati i ore i tupu aˈenei i nia i te huitaata nei, i te tupu taue. (Mataio 24:21) Ia tae anaˈe i taua taime ra, e tia i te mau tavini a te Atua, mai tei ore i titauhia aˈenei, ia faaite i to ratou tiaturiraa i roto i te parau-tia a Iehova e i roto i te aratairaa ta ˈna e horoa ra na roto i ta ˈna faanahonahoraa. Ma te hoê raveraa taipe, e auraro ïa ratou ma te tiaturi i te faaueraa a te Atua e: “Haere mai, e au mau taata e; a tomo i roto i to mau piha ra, a opani mai i to mau uputa ia oe ra; a faatapuni ai ia oe iho e vahi iti aˈe, ia hoê aˈe amoraa mata, e ia pee ê atu taua tahoo nei.” (Isaia 26:20) Ua tomo aˈena ratou i roto i te huru tupuraa paruruhia o na amuiraa e 85 000 tiahapa i roto e 232 fenua. Noa ˈtu eaha te mau mea e nehenehe e faaôhia mai i roto i te faaueraa ia “tomo i roto i to mau piha ra,” e nehenehe tatou e tiaturi e e tauturu mai o Iehova ia tatou ia na reira.

15. Nafea te haamataraahia te faufaaraa o te tiaturiraa i te matahiti 1998, e no te aha e mea tano te reira?

¹⁵ E mea titauhia ia haapaari tatou i to tatou tiaturiraa i teie nei. Ia ore tatou e tiaturi i to tatou mau taeae kerisetiano, i te faanahonahoraa a Iehova, e hau atu, ia Iehova iho, eita ïa e noaa mai te ora. Ua tano maitai ïa, i te matahiti 1998, ua faahaamanaˈo-noa-hia te mau Ite no Iehova ati aˈe te ao nei, e ta ratou irava matahiti, oia hoi “te taata atoa e tiaoro i te iˈoa o Iehova ra, e ora ïa”! (Roma 10:13, MN) No reira, e tia ia tatou ia tamau noa i te tiaturi. Ia ite noa ˈtu tatou i te tahi noa ˈˈe feaaraa iti i roto i teie tiaturiraa, e tia ïa ia tatou ia faaafaro i te reira i teie nei, oia mau, i teie mahana.

E haavaraa tia ta Iehova

16. Eaha te nehenehe e tupu i nia i te tiaturiraa ia ore oia e atuatuhia, e nafea tatou e nehenehe ai e arai i te reira?

¹⁶ I roto i te Hebera 3:14, ua faaarahia i te mau Kerisetiano faatavaihia e: “E faufaa hoi ta tatou i te Mesia ra, ia tamau maite â tatou i to tatou tiaturi matamua ra ma te itoito e tae noa ˈtu i te hopea ra.” E tano atoa teie mau parau no te mau Kerisetiano e tiaturi nei e ora i nia i te fenua nei. E nehenehe te tiaturiraa matamua e inohia ia ore oia ia atuatuhia. E mea faufaa roa ïa ia tamau noa tatou i te titau i te ite papu, o te haapaari hoi i te niu o to tatou tiaturiraa!

17. No te aha tatou e nehenehe ai e tiaturi e no nia i te faaoraraa e haava o Iesu ma te tia?

¹⁷ E fatata te mau nunaa atoa i te hiˈopoahia e te Mesia, ia nehenehe hoi oia e “faataa ia ratou mai te tiai mamoe e faataa i te mamoe i te puaaniho ra.” (Mataio 25:31-33) E nehenehe tatou e tiaturi e e haava te Mesia ma te parau-tia i te feia e tia iho â ia ratou ia ora mai. Ua horoa hoi o Iehova ia ˈna ra te paari, te aravihi, e vetahi atu mau huru maitatai e titauhia ra no te ‘haava i to te ao atoa nei ma te parau-tia.’ (Ohipa 17:30, 31) Ia riro ïa to tatou tiaturi mai to Aberahama, o tei parau e: “Eiaha roa hoi oe [e Iehova] e na reira, eiaha ia taparahi-atoa-hia te feia parau-tia, e te paieti ore; eiaha ia hoê atoa huru ta oe e rave i te feia parau-tia, e te feia paieti ore. [“E ere anei,” MN] ei parau-tia ta te Haava i to te ao atoa nei ia rave?”—Genese 18:25.

18. No te aha eiaha tatou e tapitapi rahi roa no nia i te mea ta tatou i ore i ite i teie nei?

¹⁸ Ma te tiaturi taatoa i te parau-tia a Iehova, eiaha tatou e haapeapea no nia i te iteraa i te mau pahonoraa i te mau uiraa mai teie: ‘Nafea te mau aiû e te mau tamarii nainai ia haavahia? Mea rahi anei te taata e ore e naeahia e te parau apî maitai ia tae mai o Aramagedo? Eaha ïa no nia i te feia maˈi i te pae feruriraa? Eaha ïa no nia . . . ?’ Parau mau, aita paha tatou i ite i teie nei e nafea o Iehova ia haapao i teie mau tupuraa. E na reira râ oia ma te parau-tia e te aroha. Eiaha tatou e feaa i te reira. Inaha, e maere e e oaoa paha tatou ia ite ia ˈna ia haapao i te reira ma te hoê raveraa o ta tatou i ore i manaˈo aˈenei.—A faaau e te Ioba 42:3; Salamo 78:11-16; 136:4-9; Mataio 15:31; Luka 2:47.

19, 20. (a) No te aha e ere i te mea ino ia ui i te mau uiraa e au? (b) Afea o Iehova e horoa ˈi i te mau pahonoraa e hinaarohia?

¹⁹ Aita te faanahonahoraa a Iehova e haaparuparu ra i te ui i te mau uiraa haavare ore e tano, mai ta vetahi feia patoi hoi i parau hape na. (Petero 1, 1:10-12) Teie râ, te aˈo maira te Bibilia ia tatou ia ape i te mau uiraa maamaa e te papu ore. (Tito 3:9) E nehenehe te uiraa i te mau uiraa e au e te imiraa i roto i te Parau a te Atua e te mau papai kerisetiano i te mau pahonoraa a te mau Papai, e faarahi i to tatou ite papu e e haapaari atu ai i to tatou tiaturiraa ia Iehova. Te pee ra te faanahonahoraa i te hiˈoraa o Iesu. Aita oia i tuatapapa i te mau uiraa aita hoi i tae atura i te taime au no te pahono. Ua faataa oia e: “E rave rahi â ta ˈu parau ia parau atu ia outou, eita râ e tia ia outou i teie nei.” (Ioane 16:12) Ua faˈi atoa oia i te tahi mau mea o ta ˈna iho i ore i ite i taua taime ra.—Mataio 24:36.

²⁰ E mea rahi â te mau mea ta Iehova e faaite mai. Auê hoi te paari ia turui i nia ia ˈna, ma te tiaturi e e faaite mai oia i ta ˈna mau opuaraa i te taime au. E nehenehe tatou e tiaturi e ia tae i te taime i faataahia e Iehova, e oaoa ïa tatou i te ite-hau-atu-â-raa i to ˈna mau eˈa. Oia, e haamaitaihia mai e e fanaˈohia tatou i te mea e ua tiaturi taatoa tatou ia Iehova e i te faanahonahoraa ta ˈna e faaohipa ra. Te haapapu maira te Maseli 14:26 ia tatou e: “Tei te mǎtaˈu ia Iehova te [“tiaturiraa puai,” MN]; e e haapuraa hoi to ta ˈna ra mau tamarii.”

[Nota i raro i te api]

Eaha to outou manaˈo?

◻ No te aha e ere i te haerea paari ia vaiiho i te mau manaˈo horuhoru ia faaino i to tatou tiaturiraa ia Iehova?

◻ Eaha ta tatou e nehenehe e haapii i roto i te hiˈoraa o Iona?

◻ No te aha e mea faufaa roa te haapiiraa Bibilia e te haereraa i te mau putuputuraa?

[Hohoˈa i te api 16]

Noa ˈtu e e erehia tatou iho, e nehenehe tatou e tiaturi e e Atua parau-tia o Iehova

[Hohoˈa i te api 18]

Ua papu anei ia outou e tei nia ia Iehova to outou tiaturiraa?