Te faaearaa e te pororaa na pihai iho i te hoê mouˈa auahi

“E AAMU riaria mau teie. E au maitai oia i te hopea o te ao nei o ta te Bibilia e parau ra. E tia ia tatou ia vai ara noa e ia tia ˈtu ma te au i mua i te Atua ra o Iehova i te mau taime atoa.” O ta Víctor ïa, te hoê Ite no Iehova, i parau i to ˈna faatiaraa i to ˈna faaearaa i pihai iho roa i te mouˈa auahi Popocatépetl, tei matau-noa-hia i te pii Popo, i Mexiko.

Ua faahitihia te parau o teie mouˈa auahi e haruru ra i roto i te mau parau apî na te mau nunaa atoa mai te matahiti 1994 mai â.a Ua faaoti atura te mau faatereraa e te mau mea atoa i roto i te hoê aanoraa e 30 kilometera i te atea ati noa ˈˈe te auvaha o te mouˈa auahi, e vahi atâta ïa. E mea atâta iho â râ te pae apatoa o te mouˈa auahi, no te mea e mea hipa te auvaha i taua pae ra e mea rahi atoa te mau apoo hohonu e na reira te vari auahi e te repo e nehenehe ai e tahe na roto mai i te auvaha.

Parau mau, e rave rahi o te uiui ra e eaha te tupu i nia i te oire no Mexiko ia paaina rahi mai te mouˈa auahi. E fifihia anei taua oire ra? Te vai atoa ra hoi taua mau taata e faaea ra i roto i te hau no Morelos i te pae apatoa o te mouˈa auahi. E fifi-atoa-hia anei te taatoaraa o taua vahi ra? E eaha te huru ia faaea na pihai iho i te mouˈa auahi, ma te ite ore i te mea e nehenehe e tupu i te hoê mahana?

Te fifi atâta o te mouˈa auahi

Te vai ra te oire pu no Mexiko tau 70 kilometera i te atea i te pae apatoerau tooa o te râ no Popocatépetl, area vetahi mau oire tapiri ra, e 40 kilometera ïa i te atea. Ia au i te mau haamaramaramaraa haamanahia, tei rapaeau te oire taatoa, e to ˈna e 20 mirioni huiraatira, i te vahi atâta. Ia hiˈohia râ te tereraa o te mataˈi, e nehenehe teie vahi e fifihia mai te peu e e tutuha mai te mouˈa auahi e rave rahi rehu.

E mea ino aˈe te mau faahopearaa o te rehu i te pae hitia o te râ o te mouˈa auahi. I taua vahi ra, te vai ra te oire no Puebla e e rave rahi mau oire iti, tau 200 000 taata e faaea ra i taua vahi atâta ra. I te Sabati 11 no Me 1997, ua tutuha mai te mouˈa auahi e tǎne rehu e ua purara ˈtura na taua vahi taatoa ra, ua tae roa i te hau no Veracruz, e 300 tiahapa hoi kilometera i te atea i te pae hitia o te râ. I te vahi apatoa o te mouˈa auahi, i te hau no Morelos, e mea rahi te mau oire tau 40 000 taata taatoa o te nehenehe atoa e fifihia.

Te faaea ra e te ohipa ra te mau Ite no Iehova i roto i teie mau mea atoa. I te oire no Mexiko, ua hau atu ratou i te 90 000 i roto tau 1 700 amuiraa. Tei rapaeau mai te amaa a te Taiete Watch Tower i te oire no Mexiko i te pae apatoerau hitia o te râ, tau 100 kilometera i te atea i te mouˈa auahi. Hau atu i te 800 taata e rave ra i te ohipa i te amaa, e tau 500 rima tauturu e ohipa ra i te vahi paturaa. Tei rapaeau ratou pauroa i te vahi atâta.

I te hau no Morelos, te vai ra tau 50 amuiraa a te mau Ite no Iehova e 2 000 tiahapa feia poro i te Basileia. Vetahi o teie mau amuiraa, e vai ra i Tetela del Volcán e i Hueyapan, tau 20 kilometera ïa i te atea i te auvaha. Hau atu, i te pae hitia o te râ i te hau no Puebla, te vai ra te mau amuiraa tau 600 feia poro e noho ra e 20-30 kilometera i te atea i te mouˈa auahi. Parau mau, e nehenehe ratou e fifihia.

Te ohipa noa ra te mau Ite no Iehova

Noa ˈtu te fifi atâta tamau, aita te mau Ite no Iehova i faaea i ta ratou ohipa pororaa i taua vahi ra. Ua tamau noa atoa ratou i te rave i ta ratou porotarama no te mau putuputuraa kerisetiano, o te horoa ra hoi i te manaˈo tahoê e te tiaturi i roto i teie mau huru tupuraa atâta. (Hebera 10:24, 25) Te na ô ra te hoê tabula a te hoê o te mau amuiraa e: “Ua itehia te hoê tauiraa rahi i roto i te huru o te taata i nia i te parau apî maitai o te Basileia. Ei hiˈoraa, i roto i te hoê oire iti, ua farii iho nei 18 taata i te haapii i te Bibilia i ǒ ratou ra.”

Te faaite ra te tahi atu amuiraa, e 20 kilometera i te atea i te mouˈa auahi, e: “E mea faahiahia te maraaraa. Ua haamauhia teie amuiraa i te avaˈe Novema 1996. I roto i na avaˈe e ono i muri iho, 10 taata tei fariihia no te apiti i roto i te aua taviniraa. Te faaea ra vetahi feia poro tau 20 kilometera i te atea i te auvaha. Te faatupuhia ra te mau putuputuraa kerisetiano i reira, tau 40 taata te tae mai.”

Ua tamau noa o Magdalena, o te faaea ra i San Agustín Ixtahuixtla, i Puebla, e 25 kilometera noa i te mouˈa auahi, i te faatere i te mau haapiiraa Bibilia. Te faatia ra oia i te ohipa i tupu i te paaina-rahi-raa te mouˈa auahi.

“Ua faaarahia mai matou ia faarue i to matou fare, o ta matou ïa i rave—na roto i te rehu. Noa ˈtu te ru o te tupuraa, ua manaˈo vau ia Dorado ma o ta ˈu hoi i haapii na i te Bibilia. Ua haere atura matou te tahi mau taeae i te fare o Dorado ma no te tauturu ia ratou ia haere i te hoê vahi maitai aˈe. I te oire tapiri no Puebla, ua haamata aˈena te ohipa a te tomite tauturu a te mau Ite no Iehova. Ua putapû roa o Dorado ma i te huru i faaitehia i nia ia matou pauroa i reira. Ua faaineine aˈena to matou mau taeae kerisetiano i te tahi mau faaearaa no matou i te mau vahi taa ê. Aita matou i erehia i te tahi mea, noa ˈtu e mea atea matou i to matou fare. Ua haere teie utuafare i te tahi mau putuputuraa i te Piha no te Basileia, ua maere râ ratou i te here i faaitehia i nia ia ratou e te mau taeae o ta ratou hoi i ore i matau. Tau hebedoma i muri aˈe i te hoˈiraa i te fare, ua haamata ˈtura teie utuafare i te haere tamau i te mau putuputuraa atoa. Ua riro oioi atura ratou ei feia poro i te parau apî maitai. Ua bapetizohia e piti o ratou i teie nei. Ua tavini raua ei pionie tauturu tau avaˈe i te maoro e te opua ra e rave i te taviniraa pionie tamau.”

Aita o Martha, te hoê potii e 20 matahiti, e faaea ra e 21 kilometera i te atea i te auvaha, i vaiiho i to ˈna hapepa ia haafifi ia ˈna i te faaohipa i te mau taime atoa no te poro. Ua ite oia i te parau mau e toru matahiti i teie nei i te paaina-faahou-raa te mouˈa auahi. Eita oia e rave i te hoê parahiraa huira, e mea fifi hoi ia faatere i nia i te vahi titapou i reira oia e faaea ˈi, e haere râ oia i roto i te pororaa na nia i te hoê asini. E haere atoa oia i te mau putuputuraa na nia i teie asini. Te mauruuru rahi nei o Martha ia Iehova no to ˈna riroraa ei melo no te fetii taeae here, i te mea hoi e e tiaturi na oia i te tauturu a te mau tuahine o te amuiraa no te paiuma i nia i te asini e no te pou mai. I te mau avaˈe atoa, te rave nei oia hau atu i te 15 hora i roto i te taviniraa.

I teie mau vahi moemoe, te faaruru pinepine nei te mau Ite no Iehova i te faaheporaa a te feia tapiri ia apiti mai i roto i ta ratou mau oroa faaroo. I te oire iti no Tulcingo, e vai ra tau 20 kilometera i te atea i te mouˈa auahi, ua maitihia te hoê taata no te haere e farerei i te mau Ite no te ani i te moni no te mau oroa. Ua faataa ˈtura te mau taeae ma te faaoromai e no te aha eita ratou e nehenehe e apiti i roto i taua mau oroa faaroo ra. No to ˈna onoono e ia horoa mai te mau taeae i te moni, ua haamata ˈtura oia i te amuimui ia ratou, e ite atura oia i te tahi o ta ratou mau tiaturiraa. Ua oaoa oia i te iteraa i te mau pahonoraa o ta ˈna mau uiraa i roto i ta ˈna iho Bibilia Katolika. Ua haere tamau atura oia e ta ˈna vahine e ta ˈna tamahine, i te mau putuputuraa hoê matahiti i te maoro, e ua faaite atura i to ˈna hinaaro e riro ei taata poro i te parau apî maitai.

Nafea ia faaineine ia outou?

Te rave ra te mau aivanaa i te pae o te mouˈa auahi, i ta ratou mau maimiraa e ua horoa i te mau tabula haamanahia no nia i te mouˈa auahi Popocatépetl e fifihia ra, aita râ hoê i papu maitai e eaha te tupu aore ra afea. Ia au i te mau parau apî e te feia e faaea ra na pihai iho, e nehenehe te mouˈa auahi e paaina i te mau huru taime atoa. E fifi atâta mau â ïa teie. Parau mau, te tapitapi rahi nei te mau faatereraa e te hinaaro nei e rave i te mau mea atoa ta ratou e nehenehe no te vai ineine ia tupu noa mai te fifi. Papu maitai râ, e tia ia ratou ia haapao maitai ia faaara anaˈe ratou, i te mea hoi e aita ratou e hinaaro e faahaere ê i te rahiraa taata mai te peu e e aita e fifi atâta oioi. Eaha ïa ta te taata tataitahi e tia ia rave?

“E ite te taata haapao i te ino, e ua ape ihora; te haere noa ra râ te ite ore e pohe atura,” o ta te hoê maseli ïa a te Bibilia e parau ra. (Maseli 22:3) E haerea paari ïa ia rave i te mau taahiraa e titauhia no te paruru ia ˈna iho a vai noa ˈi te taime, eiaha ma te “haere noa” ma te tâuˈa ore, mai te mea ra e eita te fifi e tupu mai, a hauti noa ˈi e teie mau puai natura maere. Teie ïa te manaˈo o te mau Ite no Iehova i taua vahi ra.

Ua farerei iho nei te mau tia a te amaa a te Taiete Watch Tower i te mau tiaau ratere i te hau no Puebla, o te haapao rahi nei i te mau amuiraa i te vahi atâta. Ua faanahohia ˈtura e ia haere te mau tiaau ratere e te mau melo o te tomite tauturu, e farerei i te utuafare tataitahi e faaea ra e 25 kilometera i te atea i te auvaha. Ua tauturuhia taua mau utuafare ra ia feruri i te faarue i te vahi atâta hou a paaina ˈi te mouˈa auahi. Ua faaineinehia te mau faurao e te mau faaearaa no te farii mai 1 500 taata i te oire no Puebla. Ua haere te tahi mau utuafare e faaea i ǒ te mau fetii ra i te tahi atu mau oire.

Te faaararaa i nia i te hoê faito rahi atu

Ia itehia anaˈe te auauahi, te auahi, e te haruru i Popocatépetl, papu maitai ïa e e fatata te mouˈa i te paaina. E tia i te feia atoa e hinaaro ra e horo, ia faaroo i te mau faaararaa a te mau faatereraa e ia faaohipa ma te au. Te vai ara noa ra te mau Ite no Iehova e faaea ra i pihai iho i te mouˈa auahi, no te paruru ia ratou iho e no te tauturu atoa ia vetahi ê ia ite i te fifi atâta e ia rave i te tahi mea hou a taere roa ˈi.

I nia i te hoê faito rahi atu, te vai ara atoa ra te mau Ite no Iehova i te mau ohipa o te ao nei ia au i te haamaramaramaraa a te mau parau tohu a te Bibilia. Te mau tamaˈi, te mau aueueraa fenua, te oˈe, te mau maˈi, e te ohipa ino, e mau tupuraa rarahi ïa mai te mau ohipa atoa a te hoê mouˈa auahi. E tuhaa teie mau mea o te hoê tapao tatuhaahia o ta Iesu Mesia i tohu no nia i “te hopea o [“te faanahoraa o te mau mea,” MN].” Noa ˈtu e aita hoê taata i ite e afea mau te hopea e tae mai ai, e mea papu râ e e tae mai oia e te piri roa maira.—Mataio 24:3, 7-14, 32-39.

I teie mahana, te titau-ru-hia nei te mau taata i te mau vahi atoa ia faaroo maitai i te faaararaa a Iesu: “E ara . . . ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia.” (Luka 21:34) Tera mau â te haerea paari e rave. Mai te mau tapao faaara a te mouˈa auahi o te ore e tia ia haafaufaa-ore-hia, eiaha atoa tatou e tâuˈa ore i te haereraa mai e piri maira o te Tamaiti a te taata nei, o Iesu Mesia, o tei faaue mai e: “E teie nei, ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei.”—Mataio 24:44.

[Nota i raro i te api]

[Hohoˈa i te api 23]

O Martha (i nia i te asini) e te tahi atu mau ite i pihai iho i te mouˈa auahi Popocatépetl