O vai te ora mai i “te mahana o Iehova”?

“Mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai [te] mahana o [Iehova] ra.”—PETERO 2, 3:11, 12; MN.

1. O vai tei rave i te ohipa ma te aau itoito e te mana o Elia?

UA MAITI te Atua ra o Iehova i rotopu i te huitaata nei, i te feia o te riro ei feia aiˈa apiti e ta ˈna Tamaiti, o Iesu Mesia, i roto i te Basileia o te raˈi. (Roma 8:16, 17) A vai noa ˈi ratou i nia i te fenua nei, ua rave te mau Kerisetiano faatavaihia i te ohipa ma te aau itoito e te mana o Elia. (Luka 1:17) I roto i te tumu parau na mua ˈtu, ua tapao mai tatou i te tahi mau tuearaa i rotopu i ta ratou mau ohipa e ta te peropheta ra o Elia i rave. Eaha râ ïa no nia i te ohipa a te peropheta ra o Elisaia, o tei mono ia Elia?—Te mau arii 1, 19:15, 16.

2. (a) Eaha te semeio hopea a Elia, e te semeio matamua a Elisaia? (b) Na te aha e haapapu ra e aita o Elia i haere i nia i te raˈi?

² Te semeio hopea i faatupuhia e Elia, o to ˈna ïa faataa-ê-raa i te pape o te Anavai Ioridana na roto i te tairiraa i to ˈna ahu toroa i nia i te pape. Ua nehenehe ïa o Elia raua o Elisaia e haere i te tahi pae na nia i te repo mǎrô. A haere noa ˈi raua na te pae hitia o te râ o te anavai, ua afai ê atura te puâhiˈohiˈo ia Elia i te tahi atu vahi i nia i te fenua. (A hiˈo i te tumu parau tarenihia “Ua reva o Elia i nia i teihea raˈi?” i te api 15.) Ua mairi mai te ahu toroa o Elia. I to Elisaia raveraa i taua ahu toroa ra no te tairi i te Anavai Ioridana, ua taa ê faahou atura te pape, e ua haere atura oia i te tahi pae na nia i te repo mǎrô. Ua faaite maitai teie semeio e na Elisaia e mono ia Elia no te turu i te haamoriraa mau i Iseraela.—Te mau arii 2, 2:6-15.

Te mau huru maitatai paieti e titauhia

3. Eaha ta Paulo e ta Petero i parau no nia i te vairaa mai o Iesu e “te mahana o Iehova”?

³ E mau senekele i muri iho i te tau o Elia raua o Elisaia, ua faatuati na aposetolo o Paulo e o Petero i “te mahana o Iehova” i mua nei e te vairaa mai o Iesu Mesia e e “te raˈi apî e te fenua apî” a muri aˈe. (Tesalonia 2, 2:1, 2; Petero 2, 3:10-13) No te ora mai i te mahana rahi o Iehova—ia haamou anaˈe te Atua i to ˈna mau enemi e ia faaora oia i to ˈna nunaa—e tia ia tatou ia imi ia Iehova e ia faaite i te haehaa e te parau-tia. (Zephania 2:1-3) Te fa maira râ te tahi atu â mau huru maitatai ia hiˈopoa anaˈe tatou i te mau ohipa i ravehia e te peropheta Elisaia.

4. Eaha te tiaraa ta te itoito e hauti ra i roto i te taviniraa a Iehova?

⁴ Te itoito no te taviniraa a te Atua, e mea faufaa ïa no te ora mai i “te mahana o Iehova.” E mea itoito o Elia raua o Elisaia i roto i te taviniraa a Iehova. Ma te hoê â itoito, te pûpû ra te toea o te mau Kerisetiano faatavaihia i teie nei tau na Iehova i te taviniraa moˈa, e te rave ra ratou i te upoo i roto i te pororaa o te parau apî maitai.a Mai te afaraa o te mau matahiti 1930 mai â, ua faaitoito ratou i te feia atoa e farii ra i te poroi o te Basileia e e tiaturi ra e ora e a muri noa ˈtu i nia i te fenua nei, ia pûpû ia ratou no Iehova e ia bapetizo ia ratou. (Mareko 8:34; Petero 1, 3:21) E mau mirioni taata o tei farii maitai i teie faaitoitoraa. Tei roto na hoi ratou i te pouri pae varua e e feia pohe ratou i roto i te hara, i teie nei râ, ua haapii ratou i te parau mau a te Atua, ua farii ratou i te tiaturiraa o te ora mure ore i roto i te hoê paradaiso i nia i te fenua nei, e te faaite nei ratou i te itoito i roto i te taviniraa a Iehova. (Salamo 37:29; Apokalupo 21:3-5) Na roto i to ratou itoito, to ratou ohipa-amui-raa, to ratou farii maitai, e i te tahi atu â mau ohipa maitatai, te horoa ra ratou i te tamǎrûraa rahi i te mau taeae pae varua o te Mesia i nia noâ i te fenua nei.—Mataio 25:31-46.

5. No te aha e mea faufaa roa ia rave i te mau ohipa maitatai no te “mau taeae” o Iesu, e eaha te hiˈoraa e vai ra i te tau o Elisaia?

⁵ Te feia e rave ra i te mau ohipa maitatai no te “mau taeae” o Iesu, no te mea e pǐpǐ na ˈna teie feia faatavaihia, te tiaturi ra ïa ratou e e ora mai ratou i “te mahana o Iehova.” Ua haamaitai-rahi-hia e piti nau taata faaipoipo i roto i te oire no Sunema, no to raua maitai e to raua farii-maitai-raa ia Elisaia e to ˈna tavini. Aita ta raua e tamaiti, e ua paari roa te tane. Tera râ, ua tǎpǔ o Elisaia i te vahine no Sunema e e fanau mai oia i te hoê tamaiti, e ua tupu te reira. I te poheraa teie tamaiti otahi tau matahiti i muri iho, ua haere atura o Elisaia i Sunema e ua faatia maira ia ˈna. (Te mau arii 2, 4:8-17, 32-37) Auê ïa mau haamaitairaa rahi i to raua farii-maitai-raa ia Elisaia!

6, 7. Eaha te hiˈoraa ta Naamana i vaiiho mai, e eaha te taairaa o te reira e te oraraa mai i “te mahana o Iehova”?

⁶ E titauhia te haehaa no te farii i te aratairaa niuhia i nia i te Bibilia no ǒ mai i te “mau taeae” o te Mesia ia hinaaro tatou e ora mai i te mahana o Iehova. Ua tia i te raatira lepera o te nuu Arama ra o Naamana ia faaite i te haehaa no te pee i te parau a te hoê potii Iseraela i tapea-tîtî-hia, e no te faaora ia ˈna na roto i te haereraa i Iseraela e farerei ia Elisaia. Aita râ o Elisaia i haere mai i rapaeau i to ˈna fare no te farerei ia Naamana, ua afai oia ia ˈna ra teie poroi: “Ia hitu hopuraa i Ioridana, e hoˈi faahou mai to oe huru mau, e mâ oe i reira.” (Te mau arii 2, 5:10) Ua inoino aˈera o Naamana, e riri atura, i muri iho râ, ua haere oia ma te haehaa e hopu i Ioridana e hitu taime, “riro atura to ˈna iˈo mai to te tamarii apî ra, mâ ˈtura oia.” (Te mau arii 2, 5:14) Hou oia i hoˈi ai i te fare, ua haere roa o Naamana i Samaria no te haamauruuru i te peropheta a Iehova. Ma te faaoti e eiaha e faaohipa i te mana no ǒ mai i te Atua ra no te titau i te mau taoˈa materia, ua haere maira o Elisaia e farerei ia Naamana, aita râ oia i rave i ta ˈna mau ô. Ua na ô atura o Naamana ma te haehaa ia Elisaia e: “E ore hoi to tavini e hopoi faahou i te tusia taauahi e te tusia atoa i te mau atua ěê maori râ ia Iehova anaˈe.”—Te mau arii 2, 5:17.

⁷ Na roto i te faaohiparaa ma te haehaa i te mau aˈoraa a te mau Papai o ta te feia faatavaihia e horoa ra, te haamaitai-rahi-hia ra te mau mirioni taata i teie mahana. Hau atu, na roto i te faatupuraa i te faaroo i roto i te tusia o te hoo o Iesu, ua tamâhia teie feia aau haavare ore i te pae varua. Te fanaˈo ra ratou i teie nei i te haamaitairaa taa ê e riro ei hoa no te Atua ra o Iehova e no Iesu Mesia. (Salamo 15:1, 2; Luka 16:9) E haamauruuruhia to ratou pûpûraa ia ratou no te Atua e no ta ˈna taviniraa ia paruruhia ratou i te haamouraa mure ore o te tairi i te feia hara teoteo o te ore e tatarahapa ra, i roto i “te mahana o Iehova” e fatata oioi maira.—Luka 13:24; Ioane 1, 1:7.

“O vai, o vai, tei to ˈu nei pae au?”

8. (a) Eaha te huru feruriraa o te feia e ora mai i “te mahana o Iehova” i nia i te raveraa i te hinaaro o te Atua? (b) Eaha te ohipa i faauehia ia Iehu ia rave? (c) Eaha te tupu i nia ia Iezebela?

⁸ E tia atoa i te feia e tiaturi ra e ora mai i “te mahana o Iehova” ia opua maite i te rave i te hinaaro o te Atua. Ua tohu o Elia ma te taiâ ore e e haamouhia te utuafare taparahi taata, e te haamori ia Baala, o te Arii ra o Ahaba. (Te mau arii 1, 21:17-26) Tera râ, hou teie haamouraa i tupu ai, e tia ia Elisaia, o tei mono ia Elia, ia faaoti roa i te tahi mau ohipa e toe ra. (Te mau arii 1, 19:15-17) Ia tae i te taime i faataahia e Iehova, ua faaue atura o Elisaia i te hoê tavini ia haere e faatahinu i te raatira o te nuu ra o Iehu, ei arii apî no Iseraela. I muri aˈe i te niniiraa i te hinu i nia i te upoo o Iehu, ua na ô atura te vea ia ˈna e: “Te na ô maira te Atua o Iseraela o Iehova, te faatahinu nei au ia oe ei arii no te taata o Iehova no Iseraela. E na oe e rave i te utuafare o to fatu ra o Ahaba, e tahoo vau i te toto o to ˈu ra mau tavini, to te mau peropheta, e te toto o te mau tavini atoa o Iehova i te rima o Iezebela. E hope roa hoi te utuafare o Ahaba i te mou.” E hurihia mai te Arii vahine ino ra o Iezebela i raro na te urî e eita o ˈna e tanuhia ma te tura.—Te mau arii 2, 9:1-10.

9, 10. Mea nafea te tupuraa te parau a Elia i nia ia Iezebela?

⁹ Ua farii te mau taata o Iehu i te faufaaraa o to ˈna faatahinuraahia, e ua faaite ratou e o ˈna te arii apî o Iseraela. Ma te ohipa papu, ua haere oioi atura o Iehu i Iezereela no te haamata i ta ˈna ohipa e taparahi i te mau aratai apotata o te haamoriraa a Baala. Te taata matamua i haapohehia i te teˈa a Iehu, o te Arii ra o Iehorama ïa, te tamaiti a Ahaba. Ua haere atura oia i rapaeau i te oire no te ani e e tere hau anei to Iehu. “Eaha tena hau, te rahi roa ra te faaturi e te mau peu tahutahu o to metua vahine ra [“o Iezebela,” MN]?” o ta Iehu ïa i pahono atu. I reira, puta ihora te mafatu o Iehorama i te teˈa a Iehu.—Te mau arii 2, 9:22-24.

¹⁰ Te ape nei te mau vahine paieti i te riro mai ia Iezebela aore ra i te tahi atu vahine mai ia ˈna te huru. (Apokalupo 2:18-23) I to Iehu taeraa ˈtu i Iezereela, ua tamata o Iezebela i te faanehenehe ia ˈna. Ma te hiˈo na roto i te haamaramarama, ua aroha maira oia ia Iehu ma te hoê haamǎtaˈuraa huna. Ua ani atura o Iehu i to ˈna mau tavini e: “O vai, o vai, tei to ˈu nei pae au?” I reira iho, ua hiˈo maira e piti aore ra e toru taata toroa. Tei te pae anei ratou o Iehu? “A huri mai na [“ia ˈna,” MN] i raro nei,” o ta ˈna ïa i faaue. I reira, ua ohipa papu atura ratou, na roto i te huriraa mai i te vahine ino ra o Iezebela i raro na roto i te haamaramarama. Ua taataahihia paha oia e te mau puaarehenua. I to te taata haereraa mai e tanu ia ˈna, ‘aore roa mea i itea ia ratou, maori râ to ˈna apu upoo, e na avae, e na apu rima.’ Ua tupu mau â te mau parau a Elia e: “E amu ai te urî ia Iezebela”!—Te mau arii 2, 9:30-37.

Te tururaa i te haamoriraa mau ma te aau rotahi

11. O vai o Iehonadaba, e mea nafea to ˈna faaiteraa i ta ˈna turu i te haamoriraa mau?

¹¹ E tia i te feia e tiaturi ra e ora mai i “te mahana o Iehova” e e ora e a muri noa ˈtu i nia i te fenua nei, ia turu i te haamoriraa mau ma te aau taatoa. E tia ia ratou ia riro mai ia Iehonadaba, aore ra o Ionadaba, e ere hoi oia i te ati Iseraela o tei haamori na ia Iehova. A tamau noa ˈi o Iehu i te rave i ta ˈna hopoia i faauehia mai ma te itoito, ua hinaaro o Iehonadaba e faaite i to ˈna farii maitai e ta ˈna turu. No reira, ua haere atura oia e farerei i te arii apî o Iseraela, o te haere ra i Samaria no te taparahi i te toea o te utuafare o Ahaba. I to ˈna iteraa ˈtu ia Iehonadaba, ua ani atura o Iehu e: “Te au ra anei to oe ra aau i to ˈu mai to ˈu nei aau e au i to oe ra?” No te mea ua pahono mai o Iehonadaba e oia, ho maira o Iehu i to ˈna rima e ua tuu maira ia Iehonadaba i nia i to ˈna pereoo tamaˈi, ma te parau e: “A haere mai na ia ite oe i to ˈu nei itoito ia Iehova.” Ma te haamarirau ore, ua farii o Iehonadaba i te haamaitairaa e faaite e te turu ra oia i te taata tei faatahinuhia e Iehova no te faaoti i ta ˈna faautuaraa.—Te mau arii 2, 10:15-17.

12. No te aha o Iehova e titau ai ma te tia e ia haamori tatou ia ˈna anaˈe ra?

¹² E mea tano mau ia turu i te haamoriraa mau ma te aau rotahi, no te mea o Iehova te Poiete e te Arii Mana hope, o te titau ra ma te tia e ia haamori tatou ia ˈna anaˈe ra. Ua faaue oia i te mau ati Iseraela e: “Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei, e no te hoê mea o te moana i raro aˈe i te fenua ra: eiaha roa oe e piˈo i raro ia ratou, eiaha hoi e tavini ia ratou; e Atua [“o te titau ra ia haamori ia ˈu anaˈe,” MN] hoi au o te Atua no oe nei o Iehova.” (Exodo 20:4, 5) E tia i te feia e tiaturi ra e ora mai i “te mahana o Iehova” ia haamori ia ˈna anaˈe ra “ma te varua e te parau mau.” (Ioane 4:23, 24) E tia ia ratou ia turu maite i te haamoriraa mau, mai ia Elia, ia Elisaia, e ia Iehonadaba.

13. Mai te aau o Iehonadaba tei au e to Iehu, o vai te feia e farii ra i te Arii Mesia, e nafea ratou ia faaite i te reira?

¹³ I muri aˈe i te taparahiraahia te utuafare o Ahaba, ua rave te Arii ra o Iehu i te tahi atu â mau ohipa no te ite e o vai te feia haamori ia Baala, e no te faaore i teie haapaoraa hape i roto ia Iseraela. (Te mau arii 2, 10:18-28) I teie tau, ua nominohia te Arii ra o Iesu Mesia i nia i te raˈi no te haamou i te mau enemi o Iehova e no te faatia i To ˈna tiaraa arii. Mai te aau o Iehonadaba tei au e to Iehu, te farii atoa nei te “feia rahi” o te “mamoe ê atu” a Iesu i teie nei tau ma te aau taatoa i te Mesia ei Arii, e te ohipa amui nei ratou e to ˈna mau taeae pae varua i nia i te fenua nei. (Apokalupo 7:9, 10; Ioane 10:16) Te faaite ra ratou i te reira na roto i to ratou faatupuraa i te haapaoraa mau, te apitiraa ma te itoito i roto i te taviniraa kerisetiano, e te faaararaa i te mau enemi o te Atua e te fatata maira “te mahana o Iehova.”—Mataio 10:32, 33; Roma 10:9, 10.

Te mau ohipa riaria e tupu i mua nei!

14. Eaha te tupu i mua nei i nia i te haapaoraa hape?

¹⁴ Ua ohipa o Iehu no te faaore i te haamoriraa a Baala i Iseraela. I to tatou nei tau, na roto i te Iehu Rahi ra o Iesu Mesia, e haamou te Atua ia Babulonia Rahi, te hau emepera o te haapaoraa hape na te ao nei. E fatata tatou i te ite i te tupuraa o te mau parau a te melahi i te aposetolo Ioane ra e: “E na tara hoê ahuru ta oe i hiˈo ra, e te puaa ra, e faufau ïa i taua faaturi ra [o Babulonia Rahi], e e pau oia ia ratou i te haru, e e veve roa, e e amu i to ˈna tino, e e tutui ia ˈna i te auahi. Ua tuu hoi te Atua i te manaˈo i roto i to ratou aau ia rave ratou i to ˈna hinaaro, e ia au ratou, e ia horoa i to ratou mana arii i te puaa ra, e ia hope te parau a te Atua i te tupu.” (Apokalupo 17:16, 17; 18:2-5) Te faahohoˈa ra “na tara hoê ahuru” i te mau mana faehau politita e faatere ra i nia i te fenua nei. Noa ˈtu râ e te faaturi nei ratou i te pae varua ia Babulonia Rahi, e taime poto to ˈna e toe ra. Na teie tuhaa politita o te ao nei e haamou i te haapaoraa hape, e e tiaraa rahi ta “te puaa”—te mau Nunaa Amui—e hauti e “na tara hoê ahuru” no te haamou ia ˈna.b Auê ïa taime no te arueraa ia Iehova e!—Apokalupo 19:1-6.

15. Eaha te tupu ia tamatahia i te faaore i te faanahoraa a te Atua i nia i te fenua nei?

¹⁵ I muri aˈe i to te Arii ra o Iehu faaoreraa i te haamoriraa a Baala, ua huri tia ˈtura to ˈna utuafare huiarii i nia i te mau enemi politita o Iseraela. E rave atoa te Arii ra o Iesu Mesia i te hoê â ohipa. E vai mai te mau mana politita i muri aˈe i te haamouraa o te haapaoraa hape mai ta Baala. I raro aˈe i te mana o te Diabolo ra o Satani, e aro teie mau enemi o te tiaraa arii o Iehova, no te tamata i te faaore i te faanahonahoraa a te Atua i nia i te fenua nei. (Ezekiela 38:14-16) Tera râ, e faaohipa o Iehova i te Arii ra o Iesu Mesia no te tairi ia ratou, na roto i te haamouraa ia ratou i Aramagedo, “te tamaˈi i taua mahana rahi o te Atua Puai hope ra,” o te faatia roa ïa i te tiaraa arii o Iehova.—Apokalupo 16:14, 16; 19:11-21; Ezekiela 38:18-23.

Te taviniraa ma te hoê itoito mai to Elisaia

16, 17. (a) Mea nafea tatou i te iteraa e ua faaitoito o Elisaia e tae noa ˈtu i te hopea o to ˈna oraraa? (b) Eaha te tia ia tatou ia rave e te mau ohe o te parau mau?

¹⁶ Na mua ˈˈe “te mahana o Iehova” e haamou ai i te faanahoraa ino taatoa o te mau mea a Satani, e riro te mau tavini o te Atua i te rohi e i te faaitoito mai ia Elisaia. Taa ê atu i ta ˈna ohipa ei apiti no Elia, ua tavini o Elisaia o ˈna anaˈe ei peropheta a Iehova hau atu i te 50 matahiti! E ua faaitoito o Elisaia e tae noa ˈtu i te hopea o to ˈna oraraa roa. Na mua noa ˈˈe i to ˈna poheraa, ua haere mai te mootua a Iehu, te Arii ra o Ioasa, e farerei ia ˈna. Ua parau atura o Elisaia ia ˈna ia teˈa na roto i te haamaramarama. Puta atura te ohe i te vahi i teˈahia, e ua na ô atura o Elisaia e: “E ohe faaora ïa na Iehova! Ohe ora ïa ia Arama ra! e tairi hoi oe i to Arama i Apheka, e pau atura ia oe.” Ia au i te faaueraa a Elisaia, ua tairi atura o Ioasa i ta ˈna mau ohe i raro i te repo. Ua tairi râ oia ma te itoito ore, e toru noa taime. Ua na ô atura o Elisaia e, ei faahopearaa, e horoahia na Ioasa e toru noa upootiaraa i nia ia Arama, e o te reira iho â te ohipa i tupu. (Te mau arii 2, 13:14-19, 25) Aita te Arii ra o Ioasa i tairi roa i to Arama ia “pau.”

¹⁷ Area te toea faatavaihia ra, te tamau noa ra ratou i te aro i te haamoriraa hape ma te hoê itoito mai to Elisaia. Te na reira atoa ra to ratou mau hoa e tiaturi ra e ora i nia i te fenua nei. Hau atu, e mea maitai e ia haamanaˈo te feia atoa e tiaturi ra e ora mai i “te mahana o Iehova” i te mau parau a te peropheta itoito ra o Elisaia, no nia i te tairiraa i raro i te repo. E rave anaˈe ïa i te mau ohe o te parau mau e e tairi anaˈe ma te itoito—e e tairi â—oia, e tae noa ˈtu i te taime o Iehova e parau ai e ua oti ta tatou ohipa.

18. Nafea tatou ia faaohipa i te mau parau i roto i te Petero 2, 3:11, 12?

¹⁸ E fatata “te mahana o Iehova” i te haamou i teie faanahoraa ino o te mau mea. No reira, e vaiiho anaˈe ia tatou ia turaihia e te mau parau faaitoito a te aposetolo Petero ia ohipa. Ua parau o Petero e: “E teie nei, e mou anaˈe taua mau mea atoa nei, mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai [te] mahana o [Iehova] ra.” (Petero 2, 3:11, 12; MN) Ia pau roa anaˈe te mau tuhaa atoa o teie faanahoraa i roto i te auahi o te riri o te Atua na roto ia Iesu Mesia, o te feia haapao maitai e te paieti anaˈe te ora mai. E mea titauhia te viivii-ore-raa i te pae morare e i te pae varua. No reira, a here i te mau taata-tupu, na roto i te haamâharaa i to ratou mau hinaaro i te pae varua iho â râ, na roto i ta tatou taviniraa kerisetiano.

19. Eaha te tia ia tatou ia rave no te ora mai i “te mahana o Iehova”?

¹⁹ Te faataa ra anei ta outou mau parau e ta outou mau ohipa e e tavini haapao maitai outou e te itoito o te Atua? Mai te peu e e, e nehenehe ïa outou e atuatu i te tiaturiraa e ora ˈtu i “te mahana o Iehova” i roto i te ao apî i tǎpǔhia e te Atua. Oia, e nehenehe outou e ora mai, ia rave outou i te maitai i nia i te mau taeae pae varua o te Mesia, no te mea e pǐpǐ ratou na ˈna, mai nau hoa faaipoipo no Sunema o tei farii maitai ia Elisaia. No te ora mai, e tia atoa ia outou ia riro mai ia Naamana, o tei farii ma te haehaa i te faaueraa no ǒ mai i te Atua ra, e o tei haamori ia Iehova. Mai te peu e te hiaai ra outou e ora e a muri noa ˈtu i roto i te paradaiso i nia i te fenua nei, e tia ia outou ia turu i te haamoriraa mau ma te aau rotahi, mai ia Iehonadaba. E nehenehe ïa outou e riro ei mau tavini haapao maitai o Iehova, o te fatata i te ite i te tupuraa o te mau parau a Iesu e: “A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra.”—Mataio 25:34.

[Nota i raro i te api]

Nafea outou ia pahono?

◻ Eaha te tahi mau huru maitatai e titauhia no te ora mai i “te mahana o Iehova”?

◻ Eaha te hiˈoraa i vaiihohia mai e nau taata faaipoipo no Sunema i te tau o Elisaia?

◻ Eaha te haapiiraa e huti mai i roto i te hiˈoraa o Naamana?

◻ Nafea tatou ia pee i te hiˈoraa o Iehonadaba?

◻ Nafea te Petero 2, 3:11, 12 ia ohipa i nia ia tatou?