Tau fifi no te feia ruhiruhia

TE ORA nei o Mama Oniyan, e 68 matahiti to ˈna, i roto i te hoê oire rahi no Afirika Tooa o te râ. I to ˈna apîraa ra, ua moemoeâ na oia e, ia ruhiruhia anaˈe oia, e fanaˈo oia i ta ˈna tau tatuhaaraa ma te peapea ore, haaatihia e ta ˈna mau tamarii e ta ˈna mau mootua. Maoti râ hoi, te rohi nei oia i te mahana taatoa i te hooraa i te pape inu toetoe i nia i te mahana veavea. Te ora noa ra oia e te moni iti haihai roa e noaa mai. Tei te fenua atea ta ˈna e piti tamaroa. Mea maoro to raua oreraa i hapono mai i te tahi moni na ˈna.

I te matamua ra, e haafaufaa-rahi-hia na te feia ruhiruhia i Afirika. E faaturahia na ratou no to ratou aravihi e to ratou ite, apiti-pinepine-hia e te paari e te maramarama. E tauturu na ratou i te raveraa i te mau mootua. E haere mai na te feia apî e uiui ia ratou e e ani i ta ratou parau faatia. E ora na hoi te taata ia au i teie aˈoraa a te Bibilia: “E tia oe i nia i mua i te aro o te upoo teatea, e faatura oe i te taata [aore ra, vahine] tahito.”—Levitiko 19:32.

Ua taui râ te tau. No te veve, te maraaraa o te hoo, te ereraa i te ohipa, e te revaraa te huiraatira i te oire, e rave rahi feia ruhiruhia o tei titauhia ia imi i te oraraa no ratou iho. Te na ô ra te raatira o te taatiraa ra HelpAge Kenya (Tauturu i te Feia ruhiruhia no Kenya), o Camillus Were, e: “Te ore noa ˈtura te peu tumu o te faaamuraa e te aupururaa i te feia ruhiruhia.”

Parau mau, aita te paruparuraa o te mau taairaa fetii i ite-noa-hia i Afirika. No nia ia Tapone, te faatia ra te vea ra Guardian Weekly e: “I mutaa iho, o te poihereraa i te fetii te niu o te mau faufaa Tapone i tufahia mai e te haapaoraa a Confucius, ua moe râ te reira na roto i te oraraa oire e te paruparuraa o te mau taairaa fetii: i teie nei mahana, e 85 % o te mau Tapone teie e pohe nei i roto i te mau fare maˈi aore ra i te mau fare ruau.”

Noa ˈtu eaha te tupuraa, te tutava nei te feia e hinaaro mau ra e faaoaoa i te Atua i te faatura i to ratou mau metua. Te pee nei ratou i teie aˈoraa a te Bibilia: “E faatura ˈtu i to metua tane e to metua vahine . . . Ia maitai hoi oe, e ia maoro to parahiraa i te ao nei.” (Ephesia 6:2, 3) Noa ˈtu e e ere noa i te mea ohie ia faatura e ia aupuru i te mau metua ruhiruhia, e nehenehe te reira e horoa mai i te mau haamauruururaa rahi.