‘O ta te taata hopoia e ati noa ˈˈe’
“O te Atua [mau] te mǎtaˈu atu, e haapao hoi i ta ˈna [mau faaueraa]; o ta te taata atoa ïa [hopoia] e ati noa ˈˈe.”—KOHELETA 12:13; MN.
1, 2. No te aha e tano ia feruri i nia i ta tatou hopoia i mua i te Atua?
“EAHA ta Iehova hinaaro ia oe?” Na te hoê peropheta no tahito ra, i faahiti i teie nei uiraa. I muri iho, ua haapapu oia i ta Iehova i titau—ia rave i te parau-tia, ia hinaaro i te aroha, e ia haere ma te haehaa i te aro o te Atua.—Mika 6:8.
2 I teie tau o te haerea haapao noa ia ˈna iho e te tiamâ, e rave rahi o te au ore nei i te manaˈo ra e, te titau ra te Atua i te tahi mea ia ratou. Aita ratou e hinaaro ra e ia faahepohia mai ratou. Tera râ, eaha ïa no te faaotiraa a Solomona i roto i te Koheleta? “E faaroo na tatou i te faaotiraa o taua mau parau nei: o te Atua [mau] te mǎtaˈu atu, e haapao hoi i ta ˈna [mau faaueraa]; o ta te taata atoa ïa [hopoia] e ati noa ˈˈe.”—Koheleta 12:13; MN.
3. No te aha tatou e feruri maitai ai i nia i te buka Koheleta?
3 Noa ˈtu eaha to tatou huru tupuraa e to tatou manaˈo no nia i te oraraa, e nehenehe tatou e faufaa-rahi-hia, mai te peu e e feruri tatou i nia i te tumu o teie faaotiraa. Ua feruri te Arii ra o Solomona, te taata papai i teie buka i faauruahia, i te tahi o te mau mea o ta tatou i matau i te rave i te mau mahana atoa. E faaoti oioi noa paha vetahi e, e mea faahapa roa teie tuatapaparaa ta ˈna. Teie râ, ua faauruahia mai oia e te Atua, e e nehenehe oia e tauturu ia tatou ia hiˈopoa i ta tatou mau ohipa e ta tatou mau fa matamua, e ia rahi atu to tatou oaoa i te pae hopea.
Te faarururaa i te mau tapitapiraa matamua o te oraraa
4. Eaha ta Solomona i tuatapapa e i haapapu i roto i te Koheleta?
4 Ua tuatapapa hohonu o Solomona i ‘te ohipa a te taata nei.’ “Ua titau maite tau aau i te imi, e te paheru ma te ite hoi i te mau mea atoa i ravehia i raro aˈe i teie nei raˈi.” Na roto i te parau ra “ohipa,” aita o Solomona e faahiti noa ra i te ohipa aufauhia, aore ra i te toroa, tera râ, te taatoaraa o te mau ohipa e ravehia e te mau tane e te mau vahine i te roaraa o to ratou oraraa. (Koheleta 1:13) E hiˈo anaˈe na tatou i te tahi o taua mau tapitapiraa aore ra ohipa matamua ra, e e faaau anaˈe na i ta tatou iho mau ohipa e mau fa matamua.
5. Eaha hoê o te mau ohipa matamua a te taata nei?
5 Oia mau, o te moni te tumu o te mau tapitapiraa e te mau ohipa e rave rahi a te taata. Eita e tano ia parau e, eita o Solomona e tâuˈa i te moni, mai ta vetahi feia moni e tâuˈa ore nei. Ua farii ohie oia e e mea faufaa ia noaa te tahi moni; e mea hau aˈe hoi ia navai maitai i te moni maoti i te huti i te hatua aore ra i te ora i roto i te veve. (Koheleta 7:11, 12) Tera râ, ua ite paha outou e e nehenehe te moni, e te mau taoˈa atoa e hoohia mai e te moni, e riro ei fa matamua roa i roto i te oraraa—o te taata moni e o te taata veve atoa.
6. Eaha ta tatou e nehenehe e haapii mai no nia i te moni na roto i te hoê parabole a Iesu e na roto i ta Solomona iho i rave?
6 A haamanaˈo na i te parabole a Iesu no nia i te taata moni, o tei ore i mâha, e ua rave â oia i te ohipa ia rahi atu â ta ˈna taoˈa. Ua faariro te Atua ia ˈna ei taata maamaa. No te aha? No te mea, ‘e ere i ta tatou mau taoˈa ra to tatou ora.’ (Luka 12:15-21) Te turu ra te mau ohipa i ravehia e Solomona—tei hau atu paha i ta tatou iho—i te mau parau a Iesu. A taio na i te faatiaraa i roto i te Koheleta 2:4-9. No te tahi area taime, ua tutava o Solomona i te haaputu i te taoˈa. Ua patu oia i te mau fare e te mau aua haviti mau. E moni hoi ta ˈna no te fanaˈo i te mau hoa vahine purotu. Noa ˈtu ta ˈna mau faufaa atoa e te mau ohipa o ta ˈna i nehenehe e rave, ua noaa anei ia ˈna i te mauruuru hohonu, te manuïa mau, e te tahi aveia i roto i to ˈna oraraa? Ua pahono oia ma te huna ore e: “Ia manaˈo râ vau i taua mau ohipa i ravehia e tau rima ra, i te mau ohipa atoa i ravehia e au ra, inaha! e mea faufaa ore anaˈe, i amu noa na vau i te mataˈi! aore roa hoi e faufaa i raro aˈe i te mahana nei.”—Koheleta 2:11; 4:8.
7. (a) Eaha ta te mau tupuraa e faaite ra no nia i te faufaa o te moni? (b) Eaha ta outou iho i ite o te turu ra i te faaotiraa a Solomona?
7 E manaˈo papu teie, e parau mau e tupu mau nei i roto i te oraraa o te mau taata e rave rahi. E tia hoi ia tatou ia farii e, eita te moni e faatitiaifaro i te mau fifi atoa. E nehenehe vetahi e titiaifaro, mai te faaohieraa i te hooraa mai i te maa e te ahu. Tera râ, hoê anaˈe ahu ta te hoê taata e nehenehe e oomo i te taime hoê, e te tahi maa e te tahi inu iti noa, e ua paia oia. E ua taio outou no nia i te feia moni, ua huehue to ratou oraraa na roto i te faataaraa, te ava aore ra te raau taero, e te mau peapea e to ratou fetii. Ua parau te taata ona mirioni ra o J. P. Getty e: “Aita e tuatiraa to te moni e to te oaoa. E tuatiraa paha to te reira e to te oaoa ore.” Ma te tano roa, ua faatuea o Solomona i te nounou i te ario, i te faufaa ore. A faaau na râ i teie manaˈo e te faahitiraa a Solomona: “E maitai te taoto o te taata rave ohipa ra, ia amu rahi i te maa ra e ia iti noa ˈtu te amu; no te î ra o te opu o te feia taoˈa rahi ra i ere ai ratou i te taoto.”—Koheleta 5:10-12.
8. Eaha te tumu e ore ai tatou e haafaufaa rahi roa i te moni?
8 Eita atoa te moni e te taoˈa rahi e hopoi mai i te mauruuru no te tau a muri aˈe. Ahiri e mea rahi ta outou moni e ta outou taoˈa, e rahi atoa ˈtu ïa to outou haapeapearaa no te paruru i te reira, e eita noâ outou e ite e eaha te ohipa e tupu ananahi. E ere-pauroa-hia anei outou i ta outou faufaa, e peneiaˈe i to outou atoa ora? (Koheleta 5:13-17; 9:11, 12) No teie tumu, e mea ohie ïa ia ite e no te aha e tia ˈi i to outou oraraa, aore ra ta outou ohipa, ia haamauhia i nia i te hoê niu teitei aˈe e te vai maoro aˈe, i te moni e te mau taoˈa.
Te utuafare, te roo, e te mana
9. No te aha e tano ai ia tuatapapa atoa o Solomona i te parau no te oraraa utuafare?
9 I roto i te tuatapaparaa a Solomona no nia i te oraraa, te vai atoa ra te parau no te utuafare. Te haafaufaa nei te Bibilia i te oraraa utuafare, e oia atoa i te oaoa ia fanau e ia aupuru i te tamarii. (Genese 2:22-24; Salamo 127:3-5; Maseli 5:15, 18-20; 6:20; Mareko 10:6-9; Ephesia 5:22-33) Te reira anei râ te tumu faufaa roa ˈˈe o te oraraa? E au ra e, oia no te mau taata e rave rahi, ia hiˈohia i te faufaaraa ta vetahi mau nunaa e horoa ra no te faaipoiporaa, te mau tamarii, e te mau auraa fetii. Teie râ, te faaite ra te Koheleta 6:3 e, noa ˈtu e hoê hanere tamarii ta tatou, e ere te reira te taviri e mauruuru ai tatou i roto i te oraraa. A feruri na i te rahiraa metua o tei rave i te mau haapaeraa no ta ratou mau tamarii, ia fanaˈo ratou i te hoê haamataraa maitai e te hoê oraraa ohie aˈe. Noa ˈtu te faahiahia o teie haerea, aita to tatou Poiete i opua e, te tapao matamua o to tatou oraraa, o te fanau-noa-raa ïa i te tamarii, mai ta te animala e fanau noa nei i te fanauˈa.
10. No te aha te haafaufaa-rahi-roa-raa i te utuafare e riro ai ei mea faufaa ore?
10 Ua haamatara maitai o Solomona i te tahi mau tupuraa o te oraraa utuafare. Ei hiˈoraa, e tutava paha te hoê tane e ia fanaˈo ta ˈna mau tamarii e ta ˈna mau mootua i te mau mea atoa. E riro anei râ ratou ei mau taata manaˈo paari? Aore ra e haamâuˈa anei ratou ma te maamaa i te mau mea atoa o ta ˈna i tutava i te haaputu na ratou? Ahiri e te reira mau te ohipa e tupu, auê ïa ‘te faufaa ore e te ino rahi’ e!—Koheleta 2:18-21; Te mau arii 1, 12:8; Paraleipomeno 2, 12:1-4, 9.
11, 12. (a) Eaha te mau tapao o te oraraa ta vetahi i tapapa? (b) No te aha e parauhia ˈi e, te imiraa i te roo, e ohipa “amu i te mataˈi” ïa?
11 I te tahi aˈe pae, e rave rahi o tei tuu i to ratou oraraa utuafare i te hiti, no te tutava ia noaa mai i te roo aore ra i te mana i nia ia vetahi ê. E mea pinepine aˈe teie hape i te itehia i rotopu i te mau tane. Ua ite anei outou i teie huru i nia i to outou mau hoa haapiiraa, to outou mau hoa ohipa, aore ra i to outou feia tapiri? E rave rahi o te imi nei i te mau ravea atoa e ia itehia mai ratou, ia tui to ratou roo, aore ra ia mana ratou i nia ia vetahi ê. Eaha mau na râ te faufaa?
12 A feruri na e mea nafea vetahi ia tutava no te riro mai ei feia tuiroo, i roto i te hoê faito nainai aore ra te hoê faito rahi. Te ite nei tatou i teie peu i te fare haapiiraa, i to tatou vahi faaearaa, e i roto i te mau pǔpǔ totiale huru rau. E hiaai puai atoa te reira i roto i te feia e hinaaro nei e ia tui to ratou roo i te pae no te mau peu aravihi, no te mau faaanaanataeraa, e te ohipa politita. E ere anei râ i te tutavaraa faufaa ore? Ua tano o Solomona i te parauraa e, e ohipa “amu i te mataˈi.” (Koheleta 4:4) Noa ˈtu e e riro mai te hoê taurearea ei taata tuiroo i roto i te hoê taatiraa, i te hoê pǔpǔ tuaro, aore ra i te hoê pǔpǔ faataˈi upaupa—aore ra ia tui te roo o te hoê tane aore ra o te hoê vahine i roto i te hoê taiete tapihoo aore ra i te hoê pǔpǔ huiraatira—ehia rahiraa taata o tei ite mau i to ratou roo? Ua ite anei te rahiraa o te taata i te tahi aˈe pae o te fenua nei (aore ra i roto noa iho i to ˈna fenua) e o vai oia? Aore ra e tamau noa anei ratou i te ora i to ratou oraraa ma te ore e ite aˈe i te roo iti haihai o teie taata? E hoê â huru no te puai aore ra no te mana e noaa mai i te hoê taata i ta ˈna anei ohipa, i roto i te hoê oire, aore ra i roto i te hoê pǔpǔ.
13. (a) Nafea te Koheleta 9:4, 5 ia tauturu ia tatou ia faatano i to tatou manaˈo no nia i te imiraa i te roo aore ra i te mana? (b) Eaha te mau tupuraa mau o te tia ia tatou ia farii, ahiri e teie oraraa anaˈe e aita ˈtu? (A hiˈo i te nota i raro i te api.)
13 E i te pae hopea, eaha ta teie roo aore ra ta teie mana e hopoi mai? E tia mai tera ui e e haere atu te tahi, mai te reira atoa, e pohe te feia tuiroo aore ra te feia mana e e moehia to ratou parau. E parau mau teie no te feia patu fare, te feia faataˈi upaupa e vetahi atu feia aravihi, te feia faataui i te pae totiale, e vetahi atu, mai te rahiraa atoa o te feia politita e te mau raatira a te nuu. I roto i teie mau ohipa, ehia taata taa ê o ta outou e haamanaˈo ra o tei ora i rotopu i te mau matahiti 1700 e 1800? Ua tano roa te faaotiraa a Solomona, i to ˈna na ôraa e: “Maitai aˈe to te urî ia ora ra i to te liona ia pohe, ua ite te feia e ora nei, e pohe ratou, aita râ a te feia i pohe ra e parau itea. . . . ua aramoina hoi ratou.” (Koheleta 9:4, 5) E mai te peu e teie oraraa anaˈe e aita ˈtu, e mea faufaa ore mau ïa te tutavaraa ia imi i te roo aore ra te mana.a
Ta tatou tapao e ta tatou hopoia
14. No te aha te buka Koheleta e tauturu ai ia tatou tataitahi?
14 Aita o Solomona i tatara pauroa mai i te mau ohipa, te mau fa, e te mau oaoaraa e tapapahia nei e te taata i roto i to ratou oraraa. Teie râ, ua navai te mau mea o ta ˈna i papai. Eiaha e manaˈo e e tuatapaparaa haaparuparu aore ra faahapa teie, no te mea ua hiˈopoa mai tatou ma te papu i te hoê buka a te Bibilia o ta te Atua ra o Iehova i opua e faaurua no to tatou maitai. E nehenehe oia e tauturu ia tatou tataitahi ia faaafaro i to tatou hiˈoraa no nia i te oraraa e te mea o te riro ei tapao na tatou. (Koheleta 7:2; Timoteo 2, 3:16, 17) E te reira, ia au iho â râ i te mau faaotiraa o ta Iehova i tauturu ia Solomona ia huti mai.
15, 16. (a) Eaha te manaˈo o Solomona no nia i te oaoaraa i te oraraa? (b) Ma te tano roa, eaha ta Solomona i parau e mea titauhia ia oaoa tatou i te oraraa?
15 Hoê parau o ta Solomona i faahiti pinepine oia ïa, e tia i te mau tavini a te Atua mau, ia oaoa i ta ratou mau ohipa e rave i mua Ia ˈna. “Ite aˈera vau e aita ˈtu e maitai i taua mau mea ra, maori râ ia oaoa te taata e ia hamani maitai i te oraraa nei. O te reira ra, ua amu anaˈe te taata i te maa e ua inu i te pape, e ua rave oia i te maitai no ta ˈna ra ohipa, e mea ho-mai-hia mai ïa e te Atua.” (Koheleta 2:24; 3:12, 13; 5:18; 8:15) A tapao na e aita o Solomona e faaitoito ra i te arearearaa maamaa; aita atoa oia i faaitoito i te haerea ra ‘E amu tatou, e inu, e e oaoa, ananahi hoi tatou e pohe ai.’ (Korinetia 1, 15:14, 32-34) Ua parau râ oia e, e tia ia tatou ia oaoa i te mau ohipa au mau i matauhia, mai te amuraa i te maa e te inuraa, ‘ia hamani maitai tatou i te oraraa nei.’ Te haamau papu ra ïa te reira i te tapao o to tatou oraraa, i nia i te hinaaro o te Poiete, na ˈna hoi e faataa eaha mau te mea maitai.—Salamo 25:8; Koheleta 9:1; Mareko 10:17, 18; Roma 12:2.
16 Ua papai o Solomona e: “A haere a amu i ta oe maa ma te oaoa; a inu ai i ta oe uaina ma te rearea o te aau; ua tiahia hoi ta oe ohipa e te Atua i tena na.” (Koheleta 9:7-9) Oia, te tane aore ra te vahine o te fanaˈo ra i te hoê oraraa hoona e te faufaa rahi, o tei rohi ïa i te raveraa i te mau ohipa o ta Iehova e oaoa nei. E titau te reira e ia feruri tamau noa tatou ia ˈna. E hiˈoraa taa ê roa ïa te reira e to te rahiraa o te taata, o te niu noa nei i to ratou oraraa i nia i te mau manaˈo taata!
17, 18. (a) Eaha te huru o te mau taata e rave rahi i mua i te mau tupuraa mau o te oraraa? (b) Eaha te faahopearaa te tia ia tatou ia haamanaˈo noa?
17 Noa ˈtu e te haapii nei vetahi mau haapaoraa e te vai ra te hoê oraraa i muri aˈe i te pohe, e rave rahi taata e tiaturi nei e, o teie oraraa anaˈe ta ratou e nehenehe e tiaturi. Ua ite paha outou i to ratou huru, o tei tuea noa e i ta Solomona i faataa: “No te mea aore te utua no te parau ino ra i tuu-vave-hia ˈtu, i haapapuhia ˈi te aau o te taata nei i te rave i te parau ino ra.” (Koheleta 8:11) Te feia atoa e ore e rave hua i te mau ohipa iino, te faaite nei râ ratou e te tapitapi noa nei ratou no te tau e vai nei. Tera hoi te tumu ratou i haafaufaa rahi roa ˈi i te moni, te taoˈa, te roo, te mana i nia ia vetahi ê, te utuafare, aore ra i te tahi atu mau anaanataeraa. Aita râ o Solomona i faaea noa i reira. Te na ô râ oia e: “Rave noâ te rave hara e ia hanere noa ˈtu i te raveraa, e maoro noa ˈtu â o ˈna pue mahana; ua ite râ vau e maitai to te feia i mǎtaˈu i te Atua, tei haamori i mua i tana aro: aita râ o te paieti ore e maitai, e ore hoi o ˈna pue mahana e haamaorohia maori râ mai to te ata ra, oia aore i haamori i mua i te aro o te Atua ra.” (Koheleta 8:12, 13) Oia mau, ua tiaturi papu o Solomona e e maitaihia tatou ‘ia mǎtaˈu tatou i te Atua mau.’ I roto i teihea faito? E ite tatou i te pahonoraa i roto i taua faaauraa ra o ta ˈna i rave. E nehenehe o Iehova ‘e haamaoro i to tatou pue mahana.’
18 Te feia e vai apî noa râ, e tia ia ratou ia feruri i teie parau mau hape ore e, e maitaihia ratou ia mǎtaˈu ratou i te Atua. Mai ta outou iho paha i ite, e nehenehe te taata horo vitiviti aˈe e topa e e erehia i te re. E nehenehe te hoê nuu puai e pau. E nehenehe te hoê taata tapihoo aravihi e topa i roto i te veve. E rave rahi atu â opuaraa papu ore o te nehenehe e faataui i te oraraa ma te manaˈo-ore-hia. Tera râ, e nehenehe outou e papu i te hoê mea: Te haerea paari aˈe e te papu aˈe, o te fanaˈoraa ïa i te oraraa a rave ai outou i te maitai ia au i te mau ture morare a te Atua e ia au i to ˈna hinaaro. (Koheleta 9:11) Oia ïa te auraa, te haapiiraa i roto i te Bibilia eaha te hinaaro o te Atua, te pûpûraa i to ˈna oraraa no ˈna, e te riroraa mai ei Kerisetiano bapetizohia.—Mataio 28:19, 20.
19. Nafea te mau taurearea e nehenehe ai e faaohipa i to ratou oraraa, tera râ, eaha te haerea paari?
19 Eita te Poiete e faahepo i te mau taurearea aore ra ia vetahi atu, ia pee i ta ˈna aratairaa. E nehenehe ratou e rohi i te haereraa i te haapiiraa, peneiaˈe e tuatapapa i te mau buka atoa a te ite taata nei i to ratou oraraa taatoa. I te pae hopea, e rohirohi te tino. Aore ra e nehenehe ratou e pee i to ratou mafatu taata tia ore aore ra e pee i te mea e huti ra i to ratou mata. E tatarahapa râ ratou, e i te pae hopea, e ite ratou i te faufaa ore o taua huru oraraa ra. (Koheleta 11:9–12:12; Ioane 1, 2:15-17) No reira o Solomona e tiaoro ai i te mau taurearea—e tiaororaa o te tia ia tatou ia feruri maitai, noa ˈtu eaha to tatou faito matahiti: “E tena na, e haamanaˈo i tei Hamani ia oe i to apîraa ra, aita i tae i te mau mahana ino ra, e aita i tae i te mau matahiti e parau ai oe ra e, Aita roa o ˈu e maitairaa.”—Koheleta 12:1.
20. Eaha te hiˈoraa aifaito o te poroi a te Koheleta?
20 Eaha ïa ta tatou e faaoti? Oia, eaha ta Solomona i faaoti? Ua ite oia, aore ra ua tuatapapa oia, i “te mau ohipa atoa i ravehia i raro aˈe i te mahana nei; e inaha, e mea faufaa ore, e mai te mea e te amu ra i te mataˈi.” (Koheleta 1:14) E ere te mau parau i roto i te Koheleta, no ǒ mai i te hoê taata faahapahapa aore ra i te hoê taata mauruuru ore ra. E mau parau râ no roto i te Parau faauruahia a te Atua o te tia mau hoi ia tatou ia hiˈopoa.
21, 22. (a) Eaha te mau tuhaa o te oraraa o ta Solomona i hiˈopoa? (b) Eaha te faaotiraa paari o ta ˈna i huti mai? (c) Mea nafea te tuatapaparaa i te mau parau a te Koheleta i te tautururaa ia outou?
21 Ua titorotoro o Solomona i te rohiraa, i te mau fifi, e i te mau hiaai, o te taata. Ua feruri maite oia i te hopearaa o te mau mea i roto i te tereraa matauhia o te mau ohipa, te faahopearaa peapea e te faufaa ore e itehia nei e te mau taata e rave rahi. Ua hiˈopoa oia i te vai-mau-raa o te huru tia ore o te taata e te pohe e noaa mai. E ua faahiti atoa oia i te ite no ǒ mai i te Atua ra, no nia i te huru o te feia pohe e te mau tiaturiraa no te hoê oraraa a muri aˈe. Ua faitohia teie mau mea atoa e te hoê taata i fanaˈo i te paari rahi no ǒ mai i te Atua ra, oia, hoê o te mau taata paari roa ˈˈe i ora aˈenei. No reira te faaotiraa o ta ˈna i huti mai, i amui-atoa-hia ˈi i roto i te mau Papai Moˈa, no te maitai o te feia atoa e hinaaro ra i te hoê oraraa faufaa mau. Eita anei tatou e farii i teie manaˈo?
22 “E faaroo na tatou i te faaotiraa o taua mau parau nei: o te Atua [mau] te mǎtaˈu atu, e haapao hoi i ta ˈna [mau faaueraa]; o ta te taata atoa ïa [hopoia] e ati noa ˈˈe; e hopoi atoa te Atua [mau] i te mau parau atoa i te haavaraa, e te mau mea moe atoa ra, te maitai e te ino atoa ra.”—Koheleta 12:13, 14; MN.
[Nota i raro i te api]
a Ua faahiti na Te Pare Tiairaa i teie parau maramarama roa: “Eiaha tatou ia haamâuˈa i teie oraraa no te tahi mau mea faufaa ore . . . Ahiri e teie oraraa anaˈe e aita ˈtu, e mea faufaa ore ïa te mau mea atoa. Ua riro teie oraraa mai te hoê popo e taorahia i nia, o te topa faahou mai i nia i te repo. E ata morohi noa, e tiare i maemae, e aihere i tâpûhia o tei pohe. . . . I nia i te faito o te mure-ore-raa, e huˈa repo nainai roa to tatou oraraa. I roto i te roaraa o te tau, aita oia i au i te hoê noa ˈˈe topata pape. Ua tano roa [o Solomona] ia ˈna i hiˈopoa i te mau tapitapiraa e te mau ohipa e rave rahi o te oraraa taata nei, e ia ˈna i parau e, e mea faufaa ore anaˈe. Eita e maoro, e pohe tatou, e mea hau aˈe ahiri e aita tatou i fanauhia mai, hoê i rotopu i te mau miria taata o te fanauhia mai e o te pohe atu, e mea iti roa o tei ite e tei reira tatou. E ere teie i te parau haaparuparu aore ra faaino, peapea aore ra haamǎtaˈu. E parau mau râ, e tupuraa mau, e hiˈoraa papu, ahiri e teie oraraa anaˈe e aita ˈtu.”—15 no Febuare 1958, api 58 (Farani).
Te haamanaˈo ra anei outou?
◻ Eaha te hiˈoraa paari no nia i te tiaraa o te mau faufaa i roto i to outou oraraa?
◻ No te aha eita e tia ia tatou ia haafaufaa rahi roa i te utuafare, te roo, aore ra i te mana i nia ia vetahi ê?
◻ Eaha te haerea e au i te Atua no nia i te oaoaraa, o ta Solomona i faaitoito?
◻ Eaha te vahi apî i noaa mai ia outou na roto i te tuatapaparaa i te buka Koheleta?
[Hohoˈa i te api 15]
Eita te moni e te mau taoˈa e hopoi mai i te mauruuru
[Hohoˈa i te api 17]
E nehenehe te mau taurearea e tiaturi e e maitaihia ratou ia mǎtaˈu ratou i te Atua