Koheleta 3:11: “Ua faanehenehe oia i te mau mea atoa i to ratou tau mau”

“Ua faanehenehe oia i te mau mea atoa i to ratou tau mau. Ua tuu atoa oia i te manaˈo e ora e a muri noa ˈtu i roto i to ratou aau. Eita atoa râ te huitaata e ite mai i te ohipa ta te Atua mau i rave mai te haamataraa e tae roa i te hopea.”—Koheleta 3:11, Huriraa o te ao apî.

Auraa o te Koheleta 3:11

“Ua faanehenehe oia i te mau mea atoa i to ratou tau mau.” I roto i te reo Hebera, te auraa o te taˈo “nehenehe,” e ere noa i te nehenehe i te pae tino. E nehenehe atoa e hurihia “faanahonaho” aore ra “faanaho-maitai-hia.” (Koheleta 3:11, nota) Te mau ohipa nehenehe a te Atua, e ere noa te mau mea atoa ta ˈna i poiete, oia atoa râ te mau mea atoa ta ˈna e rave no te faatupu i to ˈna hinaaro.—Daniela 2:21; Petero 2, 3:8; Apokalupo 4:11.

“Ua tuu atoa oia i te manaˈo e ora e a muri noa ˈtu i roto i to ratou aau.” Ua poiete te Atua i te taata no te ora e a muri noa ˈtu. (Salamo 37:29) Te tumu ïa oia i tuu ai i roto i te aau o te taata tera hinaaro. Tera râ, ua faaroo ore na taata matamua, Adamu raua Eva, i te Atua e roohia ˈtura raua i te pohe e tae noa ˈtu to raua huaai. (Genese 3:17-19; Roma 5:12) Ua tǎpǔ râ te Atua i te haamâha i “te hinaaro o te mau mea ora atoa” mai te hinaaro o te taata ia ora e a muri noa ˈtu. (Salamo 145:16) Te faataa ra te Bibilia i te ohipa ta Iehovaa i rave ia nehenehe te taata e tiaturi faahou e ora e a muri noa ˈtu.—Roma 6:23.

“Eita atoa râ te huitaata e ite mai i te ohipa ta te Atua mau i rave mai te haamataraa e tae roa i te hopea.” Ia au i te Bibilia, “eita e noaa ia tatou ia taa” i te paari o te Atua, mea rahi e mea hohonu mau hoi te reira. (Roma 11:33) Tera râ, ua ineine te Atua i te faaite i ta ˈna mau opuaraa i te taata o te hinaaro e faaoaoa ia ˈna.—Amosa 3:7.

Irava tapiri o te Koheleta 3:11

Ua papaihia te buka Koheleta e te arii Solomona no Iseraela tei matauhia no to ˈna paari no ǒ mai i te Atua. E itehia i roto i tera buka te mau aˈoraa papu no nia i te mau mea faufaa o te oraraa e te mau mea faufaa ore. (Koheleta 1:2, 3; 2:1, 17; 7:1; 12:1, 13) I roto i te pene 3, te faataa ra Solomona i te mau mea ta te taata i matau i te rave. Te faahitihia ra e rave rau huru ohipa a te taata. (Koheleta 3:1-8, 10) Ua horoa te Atua i te taata te tiamâraa ia maiti i te ohipa ta ratou e hinaaro e rave e afea e rave ai. (Deuteronomi 30:19, 20; Iosua 24:15) Te faataa ra Solomona mai te peu e haa te taata ia au i te opuaraa a te Atua ma te faatura i te “taime faataahia” e ana, e oaoa te taata no ta ratou ohipa. Te parau ra Solomona o “te ô tera a te Atua.”—Koheleta 3:1, 12, 13.

A mataitai i teie video poto o te faaite mai i te tahi mau tuhaa o te buka Koheleta.