Te faatia ra te feia poro i te Basileia

“Te mau parau atoa na oe ra, e parau mau ïa”

NA MUA iti noa ˈˈe i to ˈna poheraa, ua faaitoito Mose i te nunaa o Iseraela ia auraro i te mau faaueraa atoa a Iehova. Ua parau oia e: “Haamanaˈo papu maite i te mau parau atoa ta ˈu e parau atu ia outou i teie nei mahana; e na outou e parau atu i ta outou mau tamarii, ia haapao e ia rave i te mau parau atoa i teie nei ture: e ere hoi teie i te parau faufaa ore ia outou; o to outou ïa ora.”—Deuteronomi 32:46, 47.

E mau senekele i muri iho, ua haamatara te papai salamo i te faufaaraa o te mau haapiiraa atoa a te Atua, ia ˈna i parau e: “Te fatata atoa maira hoi oe, e Iehova; e te mau parau atoa na oe ra, e parau mau ïa.” (Salamo 119:151) I te senekele matamua ra, ua faahiti Iesu iho i te faufaa o “te mau parau atoa no roto mai i te vaha o Iehova ra.” (Mataio 4:4, MN) Ma te arataihia e te Atua, ua papai te aposetolo Paulo e “te mau parau moˈa atoa i papaihia ra e mea faaurua mai ïa e te Atua, e e mea maitai.”—Timoteo 2, 3:16.

Oia mau, te hinaaro nei te Atua ra o Iehova e ia haapao maitai te feia haamori ia ˈna i te taatoaraa o te poroi i faataehia mai ia tatou ra i roto i te mau api o ta ˈna Parau. Aita hoê aˈe irava i roto i te Bibilia aita to ˈna e faufaa. O te manaˈo ïa o te mau Ite no Iehova no nia i te Parau a te Atua, e te faaite ra te aamu i muri nei no te motu Maurice mai, i te reira.

E faaea na o D—— Tane i te hoê oire iti moemoe, e e tiai fare ta ˈna ohipa i te po. Mea maoro to ˈna imi-noa-raa ma te aau rotahi, nafea ia haamori i te Atua ma te tia. I te hoê po tiairaa ta ˈna, ua haamata ˈtura oia i te taio i te Bibilia. E inaha, ua oti roa ˈˈera ia ˈna i te taio. Ua haapii ïa oia e o Iehova te iˈoa o te Atua—e rave rahi hoi taime teie iˈoa i te faahitiraahia i roto i ta ˈna Bibilia Hindi. Ua anaanatae roa oia i te buka Apokalupo.

Ua aniani ihora oia ahiri e te vai ra te hoê haapaoraa o tei pee i te Bibilia taatoa. Ua tapao hoi oia e ua pee noa te mau haapaoraa o ta ˈna i matau i te tahi mau tuhaa o te Bibilia. Ua farii te tahi mau haapaoraa i te mau Papai Hebera, a patoi ai i te mau Papai Heleni Kerisetiano. Area vetahi ra, ua tuu ïa i te mau Papai Hebera i te hiti, ma te haafaufaa i te mau Papai Heleni Kerisetiano anaˈe.

I te hoê mahana, ua ite aˈera o D—— Tane i te hoê tane e ta ˈna vahine e rari ra i te ûa e ua pii atura oia ia raua ia haere mai e paruru ia raua i to ˈna fare. E Ite no Iehova raua. Te tapea ra te vahine i te buka Apokalupo—Ua fatata roa to ˈna tatararaa hopea nei!a I reira iho, ua ani aˈera D—— Tane ia raua i teie buka. Ua manaˈo hoi na Ite e mea hohonu roa te mau tatararaa no nia i te parau tohu a te Apokalupo no ˈna, no reira, ua pûpû atura raua i te tahi atu buka. Tera râ, ua hinaaro iho â o D—— Tane i te buka Apokalupo.

I te noaaraa mai ta ˈna buka, ua taio oioi atura oia. Ua farii ihora oia i te hoê haapiiraa bibilia e te mau Ite no Iehova. Aita i maoro, ua putapû roa ˈˈera oia i te mea e te faatura nei te mau Ite i te Bibilia taatoa. Ua haamata ˈtura oia i te haere tamau i te mau putuputuraa i te Piha no te Basileia a te mau Ite no Iehova, i reira te mau Papai Hebera e te mau Papai Heleni Kerisetiano atoa e tuatapapa-maite-hia ˈi. Ua riro oia i teie nei ei taata poro no te Basileia e ei melo bapetizohia no te amuiraa kerisetiano.

[Nota i raro i te api]