Te mau Ite no Iehova na te ao nei—Zambia
MAU vahi papu aano, e te omenemene i nia i te hoê vahi rahi teitei papu, e 1 200 metera i te teitei—o Zambia ïa teie, te hoê fenua i ropu maitai ia Afirika apatoa no ropu. I te pae apatoerau hitia o te râ, te tia ra te mau Mouˈa Muchinga e 2 100 metera i te teitei. Ua riro te Anavai Zambezi, i reira e haruru ai ma te maere mau te mau Toparaa pape tuiroo na te ao nei no Victoria, ei tuhaa rahi o te otia apatoa o teie fenua haaatihia. Ua rau te huru o te mau taata, e 70 pǔpǔ taata taa ê. Te paraparauhia ra e vau reo rahi i reira, e rave rahi atu â râ mau reo.
I te matahiti 1911 ua haamatahia i te haamau i te hoê reo ê e ua parare oia i Zambia. Ua hopoi mai te feia ratere i te mau buka Etudes des Ecritures (farani), e i nia i te reira ua tutava te mau Ite no Iehova i te haaparare i te ‘reo viivii ore’ o te parau mau bibilia i Zambia. (Zephania 3:9) Te tautooraa iho â râ e farereihia ra o te mau tiaturiraa ïa niu-ore-hia i nia i te mau Papai no nia i te huru o te taata pohe. I to te mau taata haapiiraa i te parau mau e te iteraa e ua faatîtî-rahi-hia ratou e te mau tiaturiraa pouri, ua itehia te faatiamâraa!—Ioane 8:32.
Ei hiˈoraa, te faatia ra te hoê tuahine haapao maitai e: “I to to ˈu metua tane fetii pohe-taue-raa, feaa roa aˈera to ˈu metua vahine, te hoê melo faaroo roa o te Ekalesia Tahoêhia no Zambia. I muri aˈe hoê hebedoma haapaoraa i te tutuu o te hunaraa maˈi, ua hoˈi faahou vau i te oire iti no te ite e eaha to ˈna huru. I to ˈu tapaeraa ˈtu, ua ite au i te hoê taata paari i roto i te fare, e i to ˈna hoˈiraa, ua ani au i to ˈu metua vahine tupuna e o vai o ˈna. Ua parau mai oia e e taote tahutahu oia. Ua opua to ˈu metua vahine i te rave ia ˈna no te tahoo i te pohe o to ˈna taeae ia nehenehe ïa to ˈna nephe e tamǎrûhia. Ua tiaturi oia e ‘te ori haere ra’ oia, mai ta ˈna i parau.
“Ua faataa mai to ˈu metua vahine tupuna e e haamaitairaa to ˈu tere no te mea te imi ra te utuafare fetii i te moni no te aufau i te taote tahutahu. Ua ani mai oia ia ˈu ia tauturu atu, ua faataa râ vau ma te faaherehere e ei tiaraa kerisetiano, eita vau e nehenehe e apiti atu. Ua haaferuri au ia ˈna i nia i te Salamo 146:4, o te faaite ra e aita to te taata pohe e manaˈo faahou—aita ïa e nephe o te ‘ori haere ra.’ Ua hiˈo atoa mâua i te Roma 12:19, o te haapapu ra e na Iehova e tahoo eiaha râ na tatou. I muri iho, ua paraparau vau i to ˈu mama no nia i te tiaturiraa o te tia-faahou-raa ta Iesu i faahiti, mai tei papaihia i roto i te Ioane 5:28, 29. Ua maere roa o ˈna i to ˈu faaroo puai i roto i te mau parau tǎpǔ a te Atua. Haamata ˈtura o ˈna i te haapii e te hoê tuahine e ua haere oioi oia i mua. Ua tâpû oia i te mau taairaa atoa e ta ˈna haapaoraa tahito e ua faataipe oia i ta ˈna pûpûraa no te Atua na roto i te bapetizoraa. I teie nei e Ite no Iehova atoa oia.”
Te faatia ra te tahi atu tuahine e: “Ua haere au i te hunaraa maˈi o te vahine o to ˈu metua tane fetii. I to ˈu tapaeraa ˈtu, ua pohe to ˈu metua tane fetii e to ˈu taeae fetii i te poia. Aita raua i tamaa aˈe mai te poheraa mai â o to ˈu metua vahine fetii. I to ˈu aniraa e no te aha, ua pahono mai raua e ia au i te tutuu, eita raua e nehenehe e faaama i te hoê auahi no te tunu i te maa. Ua horoa ˈtu vau i to ˈu tauturu no te tunu i te maa, ua riaria râ vetahi mau melo o te utuafare e mai te peu e e ofati au i teie tutuu etene, e upoo-ino-hia ratou paatoa!
“Ua faataa ˈtu vau e Ite no Iehova vau, te faatura nei au i ta te Bibilia e parau ra i roto i te Levitiko 18:30 e aita vau e apee ra i te mau tutuu niu-ore-hia i nia i te mau Papai. Ua faaite au i muri iho ia ratou i te vea iti Mau varua o te feia pohe. I reira ua iti roa mai te iriâ, e ua faanuu mai au i mua e ua faaineine au i te maa no to ˈu metua tane fetii e te toea o te mau taata. Ua putapû roa te mau fetii o te taata pohe i to ˈu itoito e ua farii ratou i te haapii hau atu â i te Bibilia. E feia poro bapetizo-ore-hia aˈena ratou, e te tiaturi ra te utuafare fetii taatoa e fatata ratou i te bapetizohia.”
Auê tatou i te oaoa e ia faatahuri te reo viivii ore o te parau mau i te huenane o te mau haapiiraa hape i te pae faaroo, te mau haapiiraa iho â râ o tei iriti uˈana i te mau haaferuriraa o te faatîtî ra i te mau taata hapa ore! Ma te haamaitaihia e Iehova, te parare ra te reo viivii ore i Zambia, e tae noa ˈtu na te fenua taatoa nei.—Korinetia 2, 10:4.
[Tumu parau tarenihia i te api 9]
TABULA O TE FENUA
Matahiti taviniraa 1994
NUMERA RAHI ROA ˈˈE O TE FEIA PORO: 82 926
FAITO: 1 Ite no e 107
FEIA I TAE MAI I TE OROA HAAMANAˈORAA: 363 372
NUMERA AU NOA O TE MAU PIONIE: 10 713
NUMERA AU NOA O TE MAU HAAPIIRAA BIBILIA: 108 948
RAHIRAA FEIA BAPETIZOHIA: 3 552
RAHIRAA AMUIRAA: 2 027
AMAA: LUSAKA
[Hohoˈa i te api 9]
Te mau fare o te amaa Watch Tower i te hiti o Lusaka
[Hohoˈa i te api 9]
Te pororaa i Shimabala, i te pae apatoa o Lusaka