Mau uiraa a te feia taio

Ua haapii mai nei tatou i te mau parau tohu a Daniela tuatapapahia i roto i “Te Pare Tiairaa.” No te aha i taa ê ai te mau taio mahana o na toru tau e te afa i roto i te Apokalupo 11:3 i to te buka “Te Apokalupo—Ua fatata roa to ˈna tatararaa rahi hopea nei”?

Oia mau, ua horoa Te Pare Tiairaa o te 1 no novema 1993 i te hoê faaafaroraa iti no te tapaoraa tau o te tupuraa a te Apokalupo 11:3 i teie mahana. No te aha?

E hiˈo na tatou na mua roa i te Apokalupo 11:2, te faahiti ra te tuhaa hopea e ‘e maha ahuru ma piti avaˈe.’ Te faaite ra te irava 3 e: “Na ˈu e poroi i na faaite toopiti na ˈu ra, ia tohu raua ma te ahu i te ahu paau, e ia hoê aˈe tausani, ia piti hanere, e ia ono hoi ahuru i te mahana.” I teihea tau te reira e tano ai?

Inaha, ua farii maoro te mau Ite no Iehova e ua tupu teie parau tohu i nia i te mau kerisetiano faatavaihia i muri aˈe i te hopea o te ‘tau faataahia o te mau nunaa’ (Tau o te mau Etene) i te matahiti 1914. (Luka 21:24; Korinetia 2, 1:21, 22) No nia i te reira, te faahiti ra te buka Te Apokalupo—Ua fatata roa to ˈna tatararaa rahi hopea nei!a (1992) i te api 164 e: “Ua iteahia mai te hoê tau taotiahia e toru matahiti e te afa tei tuea maite i te mau ohipa peapea i tupu i nia i te mau tavini a te Atua e o tei tohuhia i ǒ nei to ratou tupuraa—ua haamata taua tau ra i te omuaraa o te Tamaˈi rahi Matamua o te ao nei i te hopea o te matahiti 1914 e tae roa ˈtu i te omuaraa o te matahiti 1918.”

A tapao e te tapaoraa tau i horoahia na oia hoi “te omuaraa o te Tamaˈi rahi Matamua o te ao nei i te hopea o te matahiti 1914 e tae roa ˈtu i te omuaraa o te matahiti 1918.” E tano te reira i te tapaoraa tau faaite-pinepine-hia, mai tei itehia i roto i te buka “Alors sera consommé le mystère de Dieu,” i te mau api 281-3, (1972).*

Teie râ, ua tuu Te Pare Tiairaa i te tapao i nia i te mau parau tohu a Daniela, te hoê buka o te faahiti tataipiti ra i te hoê anotau faaauhia i tei faahitihia i muri aˈe i roto i te Apokalupo—3 matahiti e te afa, aore ra e 42 avaˈe. No te haapapu, te parau ra te Daniela 7:25 e e faahuehuehia te feia moˈa no ‘te hoê tau e na tau hoi e te hoê tau vaehaa,’ aore ra e 3 tau e te afa. I muri iho, te tohu ra te Daniela 12:7 i te “hoê â tau, e na tau e piti hoi, e te tau vaehaa,” aore ra e 3 tau e te afa, o tei naea i to ˈna faito puai roa ˈˈe e “te haapurararaa i te feia moˈa.”

No reira te vai ra te tahi taairaa i rotopu i te mau parau tohu no nia i te hoê â tau faahitihia i roto i te Daniela 7:25, Daniela 12:7, e Apokalupo 11:2, 3, e to te Apokalupo 13:5 atoa. Ua faaitehia i roto i ta tatou mau buka e ua tupu teie mau parau atoa i roto i te area matahiti 1914-18. Na roto râ i te tuatapaparaa i teie mau parau tohu tataitahi ma te faataa ê, e taui rii te mau taio mahana no te haamataraa e no te hopearaa.

Teie râ, ua faahiti Te Pare Tiairaa o te 1 no novema 1993 i teie uiraa e: “Nafea hoi teie mau parau taatoa e tupu ai?” Oia mau, ua faarirohia te mau parau tohu no nia i na toru tau e te afa faahitihia i roto i te Daniela 7:25, Daniela 12:7, e Apokalupo 11:3 mai te mau ‘parau e hoê â faaauraa.’ No reira, e tuea to ratou haamataraa e to ratou hopearaa.

I te pae hopea, ua faaite te vea e mea nafea te faahuehueraa i nia i tei faatavaihia e te Atua (Daniela 7:25) i te naearaa i to ˈna faito puai roa ˈˈe i te avaˈe tiunu 1918 to J. F. Rutherford e te tahi atu feia faatere o te Watch Tower Bible and Tract Society ‘faautuaraahia i te mau pariraa hape no te hoê tau maoro i roto i te fare tapearaa.’ Eita e ore ua riro taua ohipa ra e “haapurararaa i te feia moˈa,” mai tei faahitihia i roto i te Daniela 12:7.

Ia taiohia mai te avaˈe tiunu 1918 e haere atu i muri e tapae ïa tatou i te avaˈe titema 1914 no te haamataraa o na 3 tau e te afa. I te hopea o taua avaˈe ra i te matahiti 1914, ua rave te feia i faatavaihia e te Atua i nia i te fenua nei te upoo parau no te matahiti e haere mai ra: “‘E nehenehe anei ta outou e inu i ta ˈu nei auˈa?’—Mataio 20:22, King James Version.” Ua faaara te tumu parau o tei faaite i te reira e: “O vai tei ite e peneiaˈe e tupu te tahi mau tamataraa, te tahi haamauiuiraa aore ra haama rahi, i nia i te mau pǐpǐ taiva ore o te Arenio i te matahiti 1915!” Mai ta Daniela 7:25 i tohu no teie anotau o na 3 tau e te afa, “e pau hoi te feia moˈa no Tei Teitei ra ia ˈna.” Ua ô te mau nunaa i roto i te Tamaˈi Rahi Matamua, ei faaohieraa ia ratou no te hamani ino ma te tano ore. Teie ïa te faaotiraa: Ua tupu na parau tohu taatoa e toru—Daniela 7:25, 12:7, e Apokalupo 11:3—i roto i na 3 matahiti e te afa, aore ra 42 avaˈe, mai te avaˈe titema 1914 tae atu i te avaˈe tiunu 1918.

Te tatara ra te reira i te faaafaroraa iti i roto i te tapaoraa tau o te tupuraa o te Apokalupo 11:3. E nehenehe tatou e haamanaˈo noa i teie faaafaroraa ia tuatapapa e ia faaohipa tatou i te buka Te Apokalupo—Ua fatata roa to ˈna tatararaa rahi hopea nei! i te tau no a muri aˈe.

[Nota i raro i te api]