Eaha te oraraa no a muri aˈe no ta tatou ui apî?

TE FAARIARIA nei te haamǎtaˈuraa atomi—na roto anei i te mau paura a te feia totova aore ra i te mau ati o te mau pu atomi—i te mau taata atoa. Te haapeapea rahi ra paha outou no te feia apî iho â râ, tae noa ˈtu ta outou iho mau tamarii aore ra mau mootua. Auê ïa te oto ia manaˈo e te faaatâta ra te haamǎtaˈuraa atomi i te oraora-maitai-raa e te oraraa no a muri aˈe o te mau tamarii atoa.

Eiaha râ e haaparuparu. E tumu ta tatou no te tapea i te hoê manaˈo maitai no nia i te oraraa no a muri aˈe o te feia apî. Ua niuhia te pu o to tatou mau tiaturiraa, e ere i nia i te mau tutavaraa a te taata no te paruru i ta tatou nei ui apî, i nia râ i te hoê oraraa no a muri aˈe haapaohia e to tatou Poiete.

I to te Tamaiti a te Atua, o Iesu, haapiiraa ˈtu i te pae Hitia o te râ i Ropu, ua faaite oia i to ˈna tapitapi no te feia apî. (Mareko 9:36, 37, 42; 10:13-16) Te faaite ra te Bibilia e e tupu hoê â huru tapitapiraa ia faahope roa te Atua i te haamǎtaˈuraa atomi e ia haamau oia i te hoê paradaiso i nia i te fenua taatoa. E nehenehe ta tatou nei ui apî e fanaˈo i te reira, e o outou atoa.

Mai te peu e te hinaaro nei outou e ite hau atu â aore ra ia haere mai te hoê taata no te aratai i te hoê haapiiraa bibilia tamoni ore i to outou fare, a papai atu ïa i te amaa a te Taiete Watchtower, B.P. 518, Papeete, TAHITI, aore ra i te hoê o te mau vahi nohoraa i faataahia i te api 2.