Ehia roaraa e nehenehe ai outou e ora?

E FARII te rahiraa o tatou e te vai ra te mau fifi i te roaraa o te tereraa o te hoê oraraa. Teie râ, te oaoa nei tatou i te ora. Aita râ tatou e oaoa noa râ i to tatou vai tamariirii ra aore ra te faito poto o te oraraa; te hinaaro nei tatou e ora e rave rahi matahiti. Teie nei râ, eita e nehenehe e ape i te pohe. E ere anei?

E nehenehe anei e faataere te pohe? E nehenehe anei e faaroa ˈtu te faito o to outou oraraa?

Faaroaraa i te faito o te oraraa?

Ua faaite te hoê vea no te matahiti 1990 e e nehenehe e faaroa i te faito o te oraraa taata i nia i te “hanere e ahuru matahiti.” Ma te feaa ore, e faahororaa te reira i nia i teie mau parau a Mose i roto i te salamo: “To matou pue mahana i te oraraa nei e hitu ïa ahuru i te matahiti, e ia tae i te vau i te ahuru i te matahiti, i te etaeta e riro râ taua etaeta ra ei rohirohi e ei taiâraa: e ore hoi e mahia motu ê atura, maue atura matou!” (Salamo 90:10) No reira, te horoa ra te Bibilia e 70 aora ra e 80 matahiti te faito no te roaraa o te oraraa o te taata. Tera râ, eaha te numera matahiti ta te hoê taata e nehenehe e fanaˈo no te ora i teie mahana?

Ua tuu te hoê vea neneihia e te WHO (Faanahoraa o te oraora-maitai-raa i roto i te ao) i te matahiti 1992, i te faito o te roaraa o te oraraa manaˈohia no te taatoaraa e 65 matahiti ïa. Ia au i te WHO, e “nehenehe teie faito e maraa e fatata maha avaˈe i te matahiti i roto i te mau matahiti e pae no mua nei, te tumu iho â râ o te itiraa mai i te pohe o te mau tamarii.” Noa ˈtu e tupu te hoê semeio i te pae rapaauraa no te tapea te pohe na mua ˈˈe i te 50raa o te matahiti, tera râ, te parau ra te vea Time e te fenua Hau Marite, “e maraa noa te faito o te roaraa o te oraraa e 3 matahiti e te 1/2 anaˈe iho.”

No te aha hoi e mea poto te oraraa?

Te haapapu ra te taote Jan Vijg no te pu tamataraa i te pae tuatapaparaa no nia i te ruhiruhia no te fenua Pays-Bas e e taairaa to te tahi mau maˈi e faaino i te tupuraa o te mau taoˈa haihai o te tino taata, oia hoi e itehia i te faahopearaa o te mau tumu tapao tupuna, i nia i te tereraa o te ruhiruhia. Te tiaturi nei vetahi mau taata maimi e nehenehe tatou e ora maoro atu â mai te peu e e monohia “te hoê tuhaa iti o te mau tapao tupuna faufaa” ia paari anaˈe tatou. Te horoa nei vetahi i te hoê raveraa “ohie aˈe.”

I te tahi atu pae, te faaite ra te vea Time e te farii nei te mau aivanaa e “mai te huru ra e te vai ra te porotarama taotiahia no te hoê faaapîraa i te pae o te huru o te ora”. Noa ˈtu te farii nei vetahi e te turu nei e ua “porotaramahia tatou no te ora” “te vai ra hoê ohipa aita e tano ra.” Teie nei râ, ia tae anaˈe e 65, 70, aore ra 80 aore ra maa matahiti hau atu, e “tâpû-oioi-hia to tatou ora” e e pohe oia, mai ta te Bibilia e parau ra.

No reira, ua tohu te aposetolo Paulo no te senekele matamua ma te papu e: “E taua enemi hopea ra o te pohe, e haamouhia ïa.” (Korinetia 1, 15:26) Nafea te pohe e nehenehe ai e hope? Mai te peu e e tupu, nafea tatou i teie mahana e nehenehe e faaruru i te pohe o te hoê e herehia e tatou?