Te tiairaa i te mamoe e to tatou Poiete Rahi
“O Iehova to ˈu tiai, e ore roa vau e ere. E faahoˈi oia i tau [nephe], e aratai oia ia ˈu na te eˈa titiaifaro, no to ˈna ra iˈoa.”—SALAMO 23:1, 3.
1. Eaha te tamǎrûraa î i te here ta Iehova e horoa maira?
UA HOPOI mai te Salamo 23, “e salamo na Davida,” i te tamǎrûraa i te mau taata e rave rahi o tei rohirohi roa. Ua faaitoito oia ia ratou ia tiaturi ia au i ta te irava 6 e faaite ra: “E riro â te maitai e te aroha i te pee mai ia ˈu i te mau mahana atoa o to ˈu nei oraraa: e parahi â vau i roto i te fare o Iehova e maoro noa ˈtu o ˈu pue mahana.” Te reira anei to outou hinaaro, e parahi e a muri noa ˈtu i roto i te fare haamoriraa a Iehova, ma te tahoêhia e to ˈna nunaa o te haaputuputuhia ra mai roto mai i te mau nunaa atoa o te fenua nei? Na ‘te Tiai, e te tiaau o to outou nephe,’ to tatou Poiete Rahi, te Atua ra o Iehova, e tauturu ia outou ia naeahia teie tapao.—Petero 1, 2:25.
2, 3. (a) Nafea Iehova ia tiai i to ˈna nunaa ma te here? (b) Mea nafea te “nǎnǎ” a Iehova i te maraa-taue-raa?
2 Ua riro atoa te Poiete o “te raˈi apî e te fenua apî” ei Taata faanaho e te Tiaau Hau aˈe o te amuiraa kerisetiano, “te fare o te Atua.” (Petero 2, 3:13; Timoteo 1, 3:15) Te anaanatae hohonu nei oia i te tiairaa i to ˈna nunaa, mai ta te Isaia 40:10, 11 e faaite papu ra: “Inaha, te haere maira te Fatu ra o Iehova ma te puai, e na to ˈna iho rima e faatupu i ta ˈna. Inaha, tei ia ˈna iho te utua ta ˈna e hopoi, e te hoo ta ˈna e horoa ra, tei mua ïa i tana aro. E faaamu oia i ta ˈna nǎnǎ mai te tiai mamoe ra; e haaputu oia i te mau fanauˈa rii i roto i tana rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.”
3 I roto i te hoê auraa rahi atu â, te amuihia ra i roto i teie “nǎnǎ” te feia o tei haere mea maoro i teie nei i roto i te parau mau kerisetiano e te mau “fanauˈa rii” o tei haaputuputuhia mai i te mau taime hopea nei—mai te mau nahoa rahi o te bapetizohia nei i Afirika e i Europa Hitia o te râ. Te haaputu nei te rima puai e te paruru o Iehova ia ratou i roto i to ˈna ra ouma. Noa ˈtu e ua riro ratou mai te mau mamoe o tei atea ê, tei roto ratou i teie nei i te hoê taairaa piri roa e to ratou Atua e to ratou Tiai mamoe here ra.
Te Tiai mamoe apiti a Iehova
4, 5. (a) O vai te “tiai mamoe maitai,” e mea nafea te parau tohu i te faahitiraa ia ˈna? (b) Eaha te ohipa faataa-ê-raa ta Iesu e aratai ra, e eaha te faahopearaa faahiahia?
4 Ma te tavini i te pae atau o to ˈna Metua i te raˈi ra, te horoa atoa ra te “tiai mamoe maitai,” o Iesu Mesia, i to ˈna ara-maite-raa aroha i te mau “mamoe.” Ua pûpû oia i to ˈna ora no te haamaitai na mua i te “nǎnǎ iti” o te feia faatavaihia e i muri iho, i teie mahana, i te feia rahi roa o ta ˈna mau “mamoe ê atu.” (Luka 12:32; Ioane 10:14, 16) Te faatae atu nei te Tiai mamoe Rahi, te Atua ra o Iehova, i teie parau i taua mau mamoe atoa ra: “Inaha, o vau, o vau nei â, . . . e na ˈu e [haava] i te [mamoe], i te tahi e te tahi. E na ˈu e tuu i te tiai hoê i nia ia ratou, e na ˈna ratou e faaamu, o tau tavini nei o Davida; na ˈna ratou e faaamu, e oia to ratou tiai. O vau hoi o to ratou Atua o Iehova, e tau tavini o Davida, ei arii ïa i roto ia ratou; o vau teie o Iehova e parau nei.”—Ezekiela 34:20-24.
5 Te tohu ra teie parau “o tau tavini nei o Davida” i te Mesia ra ia Iesu, te “huaai” o te parahi i nia i te terono o Davida. (Salamo 89:35, 36) I teie mahana haavaraa i te mau nunaa, te tamau noa nei te Tiai mamoe apiti a Iehova e te Arii ra o Iesu Mesia, te Tamaiti a Davida, i te faataa ê i te mau “mamoe” o te huitaata nei i rotopu i te feia o te parau nei e e “mamoe” ratou, i te parau mau râ, e “puaaniho” ïa ratou. (Mataio 25:31-33) E tia atoa mai teie “tiai hoê” no te faaamu i te mamoe. Auê ïa tupuraa hanahana mau o teie parau tohu o ta tatou e ite nei i teie mahana! A paraparau noa ˈi te feia politita no te tahoêraa i te huitaata nei i roto i te hoê faanahoraa o te ao apî, te tahoê mau nei teie Tiai hoê i te mau mamoe o te mau nunaa atoa maoti te hoê ohipa pororaa na roto i te mau reo huru rau, e aita ˈtu faanahonahoraa i nia i te fenua maoti râ ta te Atua anaˈe e nehenehe e rave.
6, 7. Mea nafea “te tavini haapao maitai e te paari” ia haapao e ia tufahia te “maa i te hora mau ra” na te mau mamoe?
6 A parare tamau ai te poroi o te Basileia i roto i te mau tuhaa fenua apî, te haapao ra “te tavini haapao maitai e te paari” o te mau kerisetiano faatavaihia, ia au i te faauehia mai e te Tiai hoê ra, e ia ravehia te mau faanahoraa atoa no te opere i te “maa i te hora mau ra.” (Mataio 24:45) E rave rahi o na amaa neneiraa e 33 a te Taiete Watch Tower na te fenua nei o te faarahi nei i ta ratou ohipa no te pahono i te mau aniraa ru i te mau buka e te mau vea bibilia hau atu e te maitai aˈe.
7 Te imi nei te Tino Aratai a te mau Ite no Iehova i te mau ravea atoa no te haamaitai i te ohipa huriraa na roto i tau 200 reo e no te haamata i te huriraa na roto i te mau reo ê atu e titauhia ra no te parare na te ao atoa nei. E te reira no te auraro ïa i te faaueraa ta Iesu i horoa i ta ˈna mau pǐpǐ i roto i te Ohipa 1:8: “E noaa râ to outou mana i te [varua moˈa] ia haere mai i nia iho ia outou: e ei ite hoi outou no ˈu . . . e tae noa ˈtu i te hopea o te fenua ra.” Hau atu, te hurihia nei te Tatararaa a te ao apî o te mau Papai Moˈa, tei nenei-ê-na-hia te taatoaraa aore ra te tahi tuhaa na roto e 14 reo, na roto e 16 reo ê atu no Europa, no Afirika, e no te pae Hitia o te râ ma.
Te fanaˈoraa i “te hau a te Atua”
8. Mea nafea te mau mamoe i te haamaitai-rahi-raahia na roto i te faufaa o te hau ta Iehova i fafau e o ratou?
8 Na roto i ta ˈna Tiai hoê, o Iesu Mesia, te fafau nei Iehova i te hoê ‘faufaa no te hau’ e Ta ˈna mau mamoe faaamu-maitai-hia. (Isaia 54:10) Ia faatupu ratou i te faaroo i roto i te toto o Iesu, e nehenehe te mau mamoe e haere i roto i te maramarama. (Ioane 1, 1:7) Te fanaˈo nei ratou i ‘te hau a te Atua, o tei hau ê atu i te ite taata nei e o te paruru i to ratou mafatu e to ratou feruriraa na roto i te arai o te Mesia nei ia Iesu.’ (Philipi 4:7) Mai ta te Ezekiela 34:25-28 e faataa râ, te faaamu nei Iehova i ta ˈna mau mamoe i roto i te hoê paradaiso i te pae varua, te hoê vahi paruru-maitai-hia, te ruperupe haumǎrû, e te hotu rahi. Te na ô ra teie Tiai mamoe here ra no ta ˈna mau mamoe e: “E ite hoi [ratou] e, o vau o Iehova, ia ofatihia e au te tapea ra i to ratou zugo, e ia faaorahia ratou e au i te rima o te feia i titau mai ia ratou ei tavini. E ore atura ratou e riro ei taoˈa pau na te mau fenua, . . . e parahi râ ratou ma te [paruruhia], e aore roa e haamataˈutaˈu ia ratou.”
9. Eaha te mau ravea o tei matara i mua i te nunaa o te Atua na roto i te ‘ofatiraa i te mau tapea’?
9 I te mau matahiti i mairi aˈenei, ua tamata ê na te mau Ite no Iehova i roto e rave rahi mau fenua, i te ofatiraahia “te tapea ra i to ratou zugo.” E tiamâraa to ratou no te poro mai ta ratou i ore i fanaˈo aˈenei. E ia faaohipa maitai na tatou paatoa, i roto i te mau fenua atoa, i te parururaa ta Iehova e horoa maira a rohi ai tatou no te faaoti i te ohipa. Auê ïa haapapuraa ta Iehova e horoa maira a piri atu ai tatou i te tau o te ati rahi roa ˈˈe ta te huitaata i ite aˈenei!—Daniela 12:1; Mataio 24:21, 22.
10. O vai ta Iehova i faataa no te turu i te Tiai mamoe Maitai, o Iesu Mesia, e eaha ta te aposetolo Paulo i parau atu i te tahi o ratou?
10 Ei faaineineraa no taua mahana o ta ˈna tahooraa i te feia iino ra, ua horoa mai Iehova i te tahi mau tiai mamoe tauturu no te apiti i te Tiai mamoe Maitai, o Iesu Mesia, i te haapaoraa i te nǎnǎ. Te faataahia ra ratou i roto i te Apokalupo 1:16 ia au i te numera hope ra o na “fetia e hitu” i roto i te rima atau o Iesu. I te senekele matamua, ua parau atu te aposetolo Paulo i te hoê tino o teie mau tiai mamoe ra: “E ara ia outou iho, e te nǎnǎ atoa i faarirohia ˈi outou e te [varua moˈa] ei [tiaau] i nia ihora, ia faaamu hoi outou i te [amuiraa] o te Atua, o ta ˈna i hoo i [te toto o ta ˈna iho Tamaiti].” (Ohipa 20:28) I teie mahana, te vai ra e mau ahuru tausani tiai mamoe e tavini ra i roto e 69 557 amuiraa na te fenua nei.
Te tia maira te mau tiai mamoe
11. Nafea vetahi mau tiai mamoe i te manuïaraa i te raveraa i te upoo i roto i te mau tuhaa fenua e poro-pinepine-hia nei?
11 I roto e rave rahi mau vahi, e tia i teie mau tiai mamoe ia rave i te upoo i roto i te mau tuhaa fenua o te poro-pinepine-hia ra i teie mau mahana hopea. Nafea ratou ia vai uˈana noa te aau tae o te nǎnǎ? E nehenehe te mau tiai mamoe e haapopouhia, e hoê o te mau ravea i manuïa ˈi ratou, o te faaitoitoraa ïa i te taviniraa pionie tauturu e tamau. E rave rahi mau tiai mamoe o tei apiti atoa i roto i teie taviniraa, e tae noa ˈtu te feia poro eita e maraa ia ratou, ua faaite atoa ratou i te feruriraa pionie, ma te tavini maoti te oaoa e titauhia no te faaruru i te haerea tâuˈa ore o te taata i roto i te tuhaa fenua. (Salamo 100:2; 104:33, 34; Philipi 4:4, 5) No reira ˈtura, a paremo ai te ao nei i roto i te ino e te huanane, e rave rahi mau taata e au i te mamoe o te faaarahia nei i mua i te tiaturiraa o te Basileia.—Mataio 12:18, 21; Roma 15:12.
12. Eaha te fifi rahi e itehia ra i roto i te mau vahi e maraa oioi ra, e mea nafea teie huru tupuraa e araihia ˈi i te tahi mau taime?
12 Te tahi atu fifi, oia hoi mea pinepine eita e navai te mau tiai mamoe aravihi no te haapao i te nǎnǎ. I te vahi te itehia ra te maraaraa oioi, mai i Europa Hitia o te râ, e rave rahi mau amuiraa apî e aita hoê aˈe matahiapo. Te amo nei te mau mamoe aau tae i te hopoia, teie râ, aita ratou i aravihi maitai, e te titauhia ra te tauturu no te haamataro i te mau mamoe o te haaputuputu maira i roto i te mau amuiraa. I te mau fenua mai ia Beresilia, Mexico, e Zaire, i reira te maraa oioi ra te ohipa, e mau Ite apî o te faaohipahia nei no te faanahoraa i te taviniraa e no te haamataroraa i te feia e haere apî mai nei. Te horoa nei te mau pionie i te tauturu faahiahia mau, e teie te hoê tuhaa i reira te mau tuahine e nehenehe ai e haamataro i te mau tuahine apî. Na roto i to ˈna varua, te haamaitai maira Iehova i te mau faahopearaa. Te haere noa ra te maraaraa i mua.—Isaia 54:2, 3.
13. (a) No te rahi o te auhune, eaha te pure te tia i te mau Ite atoa ia faatae? (b) Mea nafea te mau pure a te nunaa a te Atua i te pahonoraahia na mua ˈˈe e i roto i te piti o te tamaˈi rahi?
13 I roto i te mau fenua i reira ua haamau-papu-hia te ohipa pororaa, i te mau fenua i reira ua iritihia te mau opaniraa aita i maoro aˈenei, e i roto i te mau tuhaa fenua o tei matara apî mai, ua tano roa teie mau parau a Iesu i roto i te Mataio 9:37, 38: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.” E tia atoa ia tatou ia pure e ia horoa faahou mai Iehova i te mau tiai mamoe apî. Ua faaite mai oia e e nehenehe oia e na reira. Na mua ˈˈe e i roto i te tau o te Piti o te Tamaˈi rahi, ua tamata te mau faatere haavî e au i to Asura ra, i te haamou roa i te mau Ite no Iehova. Teie râ, ei pahonoraa i ta ratou mau pure, ua tamâ Iehova i ta ratou faanahonahoraa, ma te faariro ia ˈna ei faanahonahoraa teotaratia mau, e ua horoa mai oia i te mau “tiai mamoe” e titau-ru-hia ra.a Ua tuea ïa te reira e te parau tohu: “Ua tae anaˈe mai to Asura i to tatou nei fenua, e ua taataahi anaˈe oia i to tatou mau aorai, e faatupuhia tatou i reira ei patoi ia ˈna na [tiai mamoe] toohitu, e na taata arii toovau ra”—e mau matahiapo hau atu no te rave i te upoo.—Mika 5:5.
14. Eaha te titauraa ru e itehia ra i roto i te faanahonahoraa, e eaha te faaitoitoraa te horoahia ra i te mau taeae?
14 Te titau-ru-hia nei te mau Ite tane bapetizohia atoa ia haa ia noaa mai te mau hopoia rahi aˈe. (Timoteo 1, 3:1) E tau ru teie. Te fatata oioi maira te hopea o teie faanahoraa. Te na ô ra o Habakuka 2:3 e: “No te taime i haapaohia ra taua orama nei, ia tae râ i te hopea ra e faaite papu mai ai e ore e haavare: . . . e tae mau mai ïa, e ore e haamaoro hua.” E te mau taeae, e nehenehe anei outou e haa ia noaa mai te aravihi no te amo i te mau hopoia rahi atu â i roto i te ohipa tiai mamoe—hou te hopea e tae mai ai?—Tito 1:6-9.
Te ohipa tiai mamoe teotaratia
15. Mea nafea te nunaa o Iehova i te riroraa ei hau teotaratia?
15 No te tahoê maite i roto i te parareraa o te faanahonahoraa a Iehova, e tia i to ˈna nunaa ia faatupu i te hoê huru feruriraa teotaratia. Nafea ratou ia faatupu i te reira? Inaha, eaha te auraa o te parau “teotaratia”? Te tatara ra te hoê titionare (Webster’s New Twentieth Century Dictionary) i te parau “hau teotaratia” mai te “faatereraa o te hoê hau na te Atua.” Ua riro te “nunaa moˈa” o te mau tavini a Iehova ei hau teotaratia ia au i teie tatararaa. (Petero 1, 2:9; Isaia 33:22) Ei mau melo aore ra ei mau hoa no taua nunaa teotaratia ra, e tia i te mau kerisetiano mau ia ora e ia tavini ma te auraro i te Parau a te Atua e ta ˈna mau faaueraa tumu.
16. Mea nafea tatou e nehenehe ai e riro ei feia teotaratia?
16 Te faataa papu ra te aposetolo Paulo e mea nafea te mau kerisetiano ia riro ei feia teotaratia. A tahi, te na ô ra oia e e tia ia ratou ia ‘ahu i te huru taata apî . . . o tei hamanihia ia au i te hinaaro o te Atua ra, i te parau-tia e te taiva ore mau ra.’ E tia i te huru taata kerisetiano ia taraihia ia au i te mau faaueraa tumu parau-tia a te Atua o tei haamauhia i roto i ta ˈna Parau. E tia ia ˈna ia ore e taiva ia Iehova e i Ta ˈna mau ture. I muri aˈe i to ˈna faahohoˈaraa e nafea ia rave i te reira, te faaitoito ra o Paulo e: “Ei pee outou i te Atua mai te tamarii herehia ra.” (Ephesia 4:24–5:1) Mai te mau tamarii auraro ra, e tia ia tatou ia pee i te hiˈoraa o te Atua. Te reira te hau teotaratia mau e ohipa ra, ma te faaite e te faatere-mau-hia ra tatou e te Atua!—Hiˈo atoa Kolosa 3:10, 12-14.
17, 18. (a) Eaha te huru hau aˈe o te Atua te tia i te mau kerisetiano teotaratia ia pee? (b) I roto i ta ˈna parau ia Mose, mea nafea to Iehova haafaufaaraa i To ˈna huru matamua, teie râ, eaha te faaararaa o Ta ˈna i horoa atoa?
17 Eaha te huru matamua o te Atua te tia ia tatou ia pee? Te pahono ra te aposetolo Ioane i roto i te Ioane 1, 4:8 i te na ôraa e: “E [here] te Atua.” E vau irava i muri iho, i te irava 16, te faahiti faahou ra oia i teie faaueraa tumu faufaa roa: “E [here] te Atua; e o tei parahi i roto i te [here] ra, te parahi ra ïa i roto i te Atua, e te parahi ra te Atua i roto ia ˈna ra.” O Iehova, te Tiai mamoe Rahi, te hiˈoraa tia roa o te here. Te pee nei te mau tiai teotaratia ia ˈna na roto i te faaiteraa i te here hohonu no te mau mamoe a Iehova.—A faaau e te Ioane 1, 3:16, 18; 4:7-11.
18 Ua faaite te Faatere teotaratia Rahi ia ˈna iho i mua ia Mose i te na ôraa ˈtu e, “O Iehova, o Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara, e te ino; e e ore e parau i te taata ino e e taata ino ore; i te tahooraa i te hara a te feia metua i nia i te tamarii, e i nia atoa i te tamarii a taua mau tamarii ra, e tae noa ˈtu i te toru e te maha o te ui ra.” (Exodo 34:6, 7) Te haapapu ra ïa Iehova i te mau tuhaa taa ê o to ˈna huru teotaratia faahiahia, oia hoi te here, ma te faaara atoa râ e e faautua oia i te hapa mai te peu e e titauhia.
19. Taa ê atu i te mau Pharisea, mea nafea te mau tiai mamoe kerisetiano ia ohipa ia au i te hoê ravea teotaratia?
19 No te feia e amo nei i te mau hopoia i roto i te faanahonahoraa, eaha ïa te auraa o te riroraa ei taata teotaratia? Ua parau o Iesu no nia i te mau papai parau e te mau Pharisea o to ˈna ra tau e: “Te taamu nei hoi ratou i te hopoia teimaha e te maraa ore, e te tuu nei i nia i to vetahi ê tapono; e ore râ te hoê rima o ratou e faatiaia noa ˈtu i taua mau hopoia ra.” (Mataio 23:4) Auê ïa haerea haavî e te aroha ore e! E titau te hau teotaratia mau, oia hoi te faatereraa a te Atua, e ia tiaihia te nǎnǎ na roto i te faaohiparaa i te mau faaueraa tumu here a te Bibilia, eiaha râ na roto i te faateimaharaa i te mau mamoe e te mau ture hopea ore tei haamauhia e te taata. (Faaau e te Mataio 15:1-9.) I te hoê â taime, e tia i te mau tiai mamoe teotaratia ia pee i te hiˈoraa o te Atua na roto i te apitiraa ˈtu i to ratou here, te hoê hinaaro aueue ore e tapea i te viivii-ore-raa o te amuiraa.—Faaau e te Roma 2:11; Petero 1, 1:17.
20. Eaha te mau faanahoraa ta te mau tiai mamoe teotaratia e farii nei?
20 Te farii nei te mau tiai mamoe mau e, i roto i teie mau mahana hopea, ua nomino Iesu i ta ˈna tavini haapao maitai e te paari i nia i ta ˈna mau faufaa atoa e na te varua moˈa i aratai i teie tavini i roto i te nominoraa i te mau matahiapo no te tiai i te mau mamoe. (Mataio 24:3, 47; Ohipa 20:28) No reira, e titau te riroraa ei taata teotaratia, ia faatura hohonu i teie tavini, i te mau faanahoraa ta te tavini i haamau, e i te aratairaa a te mau matahiapo i roto i te amuiraa.—Hebera 13:7, 17.
21. Eaha te hiˈoraa maitai ta Iesu i vaiiho mai na te mau tiai mamoe?
21 Ua vaiiho mai o Iesu iho i te hoê hiˈoraa maitai, ma te fariu tamau i nia ia Iehova e Ta ˈna Parau ia noaa mai te aratairaa. Ua parau oia e: “Aore e mea e tia ia ˈu iho ia rave; te faaau nei au i ta ˈu e faaroo nei; e parau-tia hoi ta ˈu; aita hoi au i imi i to ˈu iho hinaaro, o te hinaaro râ o te Metua o tei tono mai ia ˈu nei ra.” (Ioane 5:30) E tia i te mau tiai mamoe i raro aˈe i te Fatu ra o Iesu Mesia ia faatupu i te hoê â haerea haehaa. Mai te peu e e imi noa te hoê matahiapo i te aratairaa a te Parau a te Atua, mai ta Iesu i rave, i reira ïa oia e riro mau ai ei taata teotaratia.—Mataio 4:1-11; Ioane 6:38.
22. (a) Mea nafea tatou paatoa ia tutava no te riro ei feia teotaratia? (b) Eaha te titauraa mǎrû ta Iesu e faatae ra i te mau mamoe?
22 E te mau tane bapetizohia, a haa ia noaa mai te aravihi no te farii i te mau hopoia taa ê i roto i te amuiraa! E te mau mamoe herehia e, a rohi no te riro ei feia teotaratia, ma te pee i te Atua e te Mesia i te faaiteraa i te here! Ia oaoa te mau tiai mamoe e te nǎnǎ atoa i te mea e ua pahono ratou i te titauraa a Iesu: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou [nephe]. Te mǎrû nei hoi ta ˈu zugo e te mâmâ nei ta ˈu hopoia.”—Mataio 11:28-30.
[Nota i raro i te api]
a Hiˈo i te mau tumu parau “Faanahonahoraa” i roto i Te Pare Tiairaa o te 1 e te 15 no tiunu 1938 (beretane).
Nafea outou ia faataa mai?
◻ Eaha te “nǎnǎ” a Iehova, e o vai to roto?
◻ Mea nafea to Iesu ohiparaa ei “tiai mamoe maitai” i te senekele matamua, e i teie mahana?
◻ Eaha te tiaraa faufaa ta te mau tiai mamoe e hauti nei i roto i te haapaoraa i te nǎnǎ?
◻ Eaha te auraa matamua o te parau “hau teotaratia”?
◻ Nafea te hoê kerisetiano—te hoê iho â râ tiai mamoe—ia ohipa no te riro ei taata teotaratia?
[Hohoˈa i te api 20]
Mai te hoê tiai mamoe aroha ra, te haapao nei Iehova i ta ˈna nǎnǎ
[Hohoˈa i te api 23]
Te peeraa i te here o te Atua ra o Iehova, te reira te hau teotaratia e ohipa ra