“Mai te liona uuru ra”

TE TIATURI ra anei outou e te vai mau ra o Satani? E rave rahi i teie mahana, aita e tiaturi nei ia ˈna. Te manaˈo nei hoi ratou e eita teie tiaturiaa e tuea e te “ite aivanaa.” I te matahiti 1911 ra, ua parau te Buka parau paari Britannica (beretane) e: “I te mea e ua tatara mai te ite aivanaa e rave rahi o te mau tereraa o te natura e te ora i roto mai i te taata, aita ˈtura e parahiraa faahou no te tiaturiraa ia Satani.” Te feruri nei te feia tuatapapa faaroo e e taipe noa o Satani, te hoê aai. Te na ô ra te Buka parau paari a te ao (beretane) e: “E rave rahi feia tuatapapa faaroo no teie nei tau o te faariro nei i te Diabolo mai te hoê taipe o te mana ino, o te mau huru iino roa ˈˈe o te natura taata nei.”

Eaha mau na râ te itehia ra? Mai te peu e mea tiaturi na outou i te Bibilia, e tia ïa ia outou ia tiaturi e e taata mau o Satani. Ua tiaturi o Iesu ia ˈna, hau atu râ, ua pii oia ia ˈna “te arii o teie nei ao.” (Ioane 14:30) Ua pii te aposetolo Paulo ia Satani “te atua o teie nei ao.” (Korinetia 2, 4:4) E ua parau te aposetolo paari ra o Ioane e: “Te vai noa nei to te ao atoa i raro aˈe i taua varua ino ra.”—Ioane 1, 5:19.

Mai te peu e aita outou e farii ra i te parau a Ioane, a feruri na i te aamu i mairi iho nei. A hiˈo na i te mau pǔpǔ o te pohe e te hamani-ino-raa i faaohipahia e te mau hau faatere. A haamanaˈo i te mau tamaˈi e te mau taparahiraa taata rahi ta to tatou ui i ite. E eaha ïa no te mau ohipa taparahiraa taata hairiiri i faahiti-rahi-hia i roto i te mau vea—te mau haapoheraa nahoa, te mau haruraa vahine, te mau tapahiraa te tahi i muri aˈe i te tahi, te hamani-ino-raa i te tamarii i te pae taatiraa, e eita hoi e pau ia faahiti? E nehenehe anei te tahi taata taa ê atu ia Satani e riro ei atua no teie nei ao?

Ua faaara te aposetolo kerisetiano ra o Petero e: “E haapao maitai, e faaitoito, te hahaere nei hoi to outou enemi o te diabolo, mai te liona uuru ra, i te imiraa i te taata e pau ia ˈna ra.” (Petero 1, 5:8) Mai te peu e e tuuhia te hoê liona i roto i to outou vaehaa faaearaa, e tuatapapa anei outou mai te peu e te vai mau ra oia aore ra eita? Aore ra e imi anei outou i te parururaa?

Ia papu ia outou, te vai mau ra o Satani. Aita to ˈna e aroha e mea taehae oia, e mea puai aˈe oia ia tatou. No reira a imi i te parururaa i pihai iho i Tei hau aˈe i te puai. “Te iˈoa o Iehova ra, e pare etaeta ïa; te horo nei te parau-tia i reira e ua ora ihora.” (Maseli 18:10) A imi i te haapuraa i pihai iho i te Atua ra o Iehova, e ia ite outou e fatata roa te huitaata nei i te faatiamâhia i te mana o taua varua ino ra, o Satani. Auê ïa tamǎrûraa oaoa mau e!—Apokalupo 20:1-3.