Mau uiraa a te feia taio

I roto i teihea faito e tia ˈi i te mau kerisetiano ia haapeapea no te mau taoˈa toto, mai te plasma mǎrô, o te anoihia i roto i te maa?

Mai te peu e mea papu e ua faaohipahia te toto animala (aore ra te tahi taoˈa toto) i roto i te maa i to outou vahi, e tia i te mau kerisetiano ia haapao maitai. Area ra, eita e tano ia haapeapea rahi roa no nia i te tahi noa manaˈoraa aore ra ia ora ma te tapitapiraa tumu ore.

I te omuaraa o te aamu taata nei, ua faaue to tatou Poiete e ia ore te taata e amu i te toto. (Genese 9:3, 4) Ua haapapu oia e te toto, o te ora ïa, oia hoi te hoê ô no ǒ mai ia ˈna ra. E nehenehe noa te toto no roto mai i te hoê mea ora e faaohipahia i roto i te tusia, ei hiˈoraa i nia i te fata. Ahiri aita ra, e tia ia niniihia te toto no roto mai i te hoê mea ora i nia i te repo, oia hoi te auraa, te faahoˈihia ra i te Atua ra. E tia i to ˈna nunaa ia ape i te paruru i te ora na roto i te raveraa i te toto. Teie hoi ta ˈna ture: “Eiaha outou e amu i te toto o te mau mea atoa nei; no te mea, o te ora ïa o te mau mea atoa nei, o te toto ra; o tei amu i te reira ra, e tâpû-ê-hia ïa.” (Levitiko 17:11-14) Ua faahiti-faahou-hia te opaniraa a te Atua no nia i te amuraa i te toto no te mau kerisetiano. (Ohipa 15:28, 29) No reira, mea titauhia i te mau kerisetiano matamua ia haapae i te amu i te maa e toto to roto, mai te iˈo o te animala i uumihia aore ra te haavari.

I roto râ i te faaohiparaa, nafea te mau kerisetiano ia ohipa ia au i ta ratou opuaraa ‘e haapae i te oto’? (Ohipa 21:25) E tia anei ia ratou ia haapao noa i te mau parau a Paulo: “O tei hoohia i te [matete] hooraa [iˈo] ra, e amu ïa, eiaha roa e uiui i te manaˈo aau ra”?

Eita. E tano teie mau parau i roto i te Korinetia 1, 10:25 i te iˈo no roto mai i te hoê animala tei pûpûhia ei tusia na te hoê idolo i roto i te hiero. I taua tau ra, e horoahia na te iˈo i toe mai i roto i te mau hiero ia hoohia i te feia hoo, o tei anoi atu i roto i te iˈo animala o ta ratou e hoo ra i roto i ta ratou mau fare toa. Te manaˈo o Paulo, oia hoi e ere te iˈo iho no ǒ mai i te hoê hiero ra i te mea ino aore ra i te mea viivii. Inaha, e peu matauhia ia iriti e ia faaohipa i te toto o te mau animala i pûpûhia i nia i te mau fata etene. No reira, mai te peu e e hoohia te iˈo i toe mai i te matete, i te mea e aita e taairaa ite-papu-hia e te hiero aore ra e te mau tiaturiraa etene hape, e nehenehe te mau kerisetiano e hoo noa mai i te reira ei iˈo mâ e tei iritihia te toto.

E ere râ hoê â huru mai te peu e ua ite teie mau kerisetiano e te vai atoa ra te iˈo o te mau animala i uumihia (aore ra te haavari) i rotopu i te iˈo e hoohia ra i te fare toa. E tia ïa ia ratou ia ara maitai i te iˈo o ta ratou e hoo mai. E tia ia ratou ia ite e eaha te iˈo e toto to roto na nia i te huru o to ˈna peni (i teie mahana, e ite-papu-hia te haavari i roto i te mau fenua i reira e maa matauhia teie). Aore ra e tia i te mau kerisetiano ia ani i te hoê taata tupai animala matauhia aore ra te hoê taata hoo iˈo. Mai te peu e aita e tumu no te tiaturi e te vai ra te toto i roto i te tahi iˈo, e nehenehe ïa ratou e hoo mai e e amu.

Ua papai atoa o Paulo e: “Ia itea to outou [manaˈo aifaito] e te taata atoa ra.” (Philipi 4:5) E tano atoa te reira no te hooraa mai i te iˈo. Aita te Ture a Iseraela aore ra te faaueraa a te tino aratai kerisetiano o te senekele matamua, e faaite ra e e tia i te nunaa o te Atua ia horoa rahi i te taime e te tutavaraa no te uiui haere no nia i te iˈo, e ia riro roa mai ei feia amu pota anaˈe mai te peu e te vai ra te tahi feaaraa no nia i te toto e vai ra i roto i te iˈo.

E tia i te hoê Iseraela aˈuaˈu animala o te taparahi i te hoê animala ia faatahe i to ˈna toto. (A faaau e te Deuteronomi 12:15, 16.) Mai te peu e eita to ˈna utuafare e nehenehe e amu i te iˈo taatoa, e nehenehe ïa oia e hoo i te tahi tuhaa. I roto atoa i te hoê tino iˈo tei faatahehia te toto ma te au, e toe noa mai te tahi toto i roto i te iˈo, aita râ hoê mea i roto i te Bibilia e faaite ra e e tia i te hoê ati Iuda o te hoo mai i te iˈo ia maimi haere i te mau parau mai te rahiraa minuti i mairi i rotopu i te taime i taparahihia ˈi te animala e te taime i faatahehia ˈi te toto, eaha te uaua tei tâpûhia no te faatahe i te toto, e mea nafea te animala i te faatautauraahia e eaha te maororaa. Hau atu, aita te tino aratai i papai e e tia i te mau kerisetiano ia faaohipa rahi roa i roto i teie tuhaa, mai te mea ra e e tia ia noaa ia ratou i te mau pahonoraa huˈahuˈa roa hou ratou e amu ai i te iˈo.

I roto e rave rahi mau fenua i teie mahana, te titau nei te ture, te peu matauhia, aore ra te peu faaroo, e te maa iˈo (taa ê atu i te mau maa taa ê, mai te haavari) no roto mai ïa i te mau animala o tei faatahehia te toto ia tupaihia. No reira, eita ïa e titauhia ia haapeapea rahi roa te mau kerisetiano no taua mau vahi ra, no nia i te tupairaa aore ra te mau ravea faaineineraa. I roto i te hoê auraa rahi, e riro ratou ‘i te amu i te iˈo e hoohia ra, ma te ore e aniani haere,’ e e fanaˈo ratou i te hoê haava manaˈo tia i te mea e ua haapae ratou i te toto.

Ua matara mai râ vetahi mau tabula parau aravihi no nia i te faaohiparaa i te toto no te hooraa, e ua haapeapea te reira i te tahi mau kerisetiano. Te manaˈo nei vetahi feia i roto i te pae faaineineraa i te iˈo e e rave rahi mau haapueraa toto no roto mai i te mau animala tupaihia o te nehenehe e ravehia no te tahi mau faaohiparaa e ia noaa mai te moni, mai te mau raau faahotu aore ra te maa animala. Ua tuatapapa vetahi feia maimi mai te peu e e nehenehe anei teie toto (aore ra taoˈa toto) e faaohipahia i roto i te iˈo faaineinehia. Ua hamani atoa vetahi mau pu ohiparaa i te mau faito iti plasma tei haapapehia, tei haapaarihia, aore ra tei faarirohia ei puehu (aore ra te mau toropuro uteute tei tatarahia te peni) o tei anoihia i roto i te tahi faito iˈo i roto i te mau maa mai te iˈo taviri aore ra te pâté. Ua tuatapapa te tahi atu mau maimiraa i te faaohiparaa i te toto puehu ei faaî aore ra no te tuati i te pape e te mii i roto i te iˈo faararerarehia, i roto i te mau taoˈa faahopue, aore ra i te tahi atu mau maa aore ra mau inu no te anoi i te mau poroteina aore ra te auri.

Mea faufaa atoa râ ia tapao e e rave rahi mau matahiti teie mau maimiraa i te raveraahia. Teie râ, e au ra e mea taotiahia te faaohiparaa o teie mau taoˈa, e aita roa ˈtu, i roto i te rahiraa o te mau fenua. Te faaite ra vetahi mau tabula parau e eaha te tumu:

“Ua riro te toto ei pu horoa i te mau poroteina no te maa e te tere-maitai-raa. Teie râ, ua faaohipa-noa-hia te mau faito haihai o te toto puaatoro i roto i te mau maa e amuhia e te taata no te puai o te peni e to ˈna tamata taa ê.”—Journal of Food Science, Buka 55, Numera 2, 1990.

“Te vai ra to te mau poroteina o te plasma o te toto i te mau vahi faufaa mai te faito haapaperaa teitei, te faaanoiraa, e te parururaa i te pape . . . e e rave rahi mau vahi maitatai i to ratou faaohiparaahia i roto i te tuhaa faaineine maa. Teie râ, aita e ravea papu no te tamâ i te plasma, i muri aˈe iho râ i te iritiraahia te pape, o tei haamauhia i Tapone.”—Journal of Food Science, Buka 56, Numera 1, 1991.

Ua hiˈopoa vetahi mau kerisetiano i te mau puohu o te mau maa, i te mea e te titau nei te rahiraa o te mau hau faatere e ia tapaohia te mau taoˈa i anoihia i roto. E e nehenehe ratou e maiti i te hiˈopoa tamau i te mau taoˈa atoa e tumu papu to ratou no te tiaturi e peneiaˈe e toto to roto. E tia iho â ia haapae i te mau maa e te vai ra te toto i roto, te plasma o te toto, te plasma, te poroteina globine (aore ra globuline), aore ra te auri hémoglobine [taoˈa no roto i te mau toropuru uteute e faauta i te mataˈi ora] (aore ra globine). Ua farii te haamaramaramaraa no ǒ mai i te tuhaa hooraa i te taoˈa a te hoê taiete no Europa i roto i teie tuhaa e: “E tia ia tapaohia te haamaramaramaraa no nia i te faaohiparaa i te globine ei taoˈa anoihia i nia i te puohu o te maa ia ore te taata e hoo mai i te reira, ia vare no nia i te taoˈa anoihia aore ra te maitairaa o te maa.”

Teie râ, no nia atoa i te hiˈopoaraa i te mau puohu aore ra te uiuiraa i te feia tupai animala, e tia ia faaohipa i te feruriraa aifaito. Eita hoi e titauhia ra i te kerisetiano taitahi na te ao nei ia tuatapapa haere i te mau puohu e te mau taoˈa anoihia i nia te mau maa puohuhia atoa aore ra ia haere atu e uiui i te feia rave ohipa i roto i te mau fare tamaaraa aore ra te mau fare toa. E tia na mua ia aniani te kerisetiano ia ˈna iho e, ‘Te vai ra anei te haapapuraa hiˈopoahia e ua faaohipahia te toto e te taoˈa no roto mai i te toto, i roto i te maa matauhia i teie nei vahi aore ra i teie fenua?’ I roto i te rahiraa o te mau vahi, eita ïa. No reira, ua faaoti e rave rahi mau kerisetiano e eita ratou e haamâuˈa rahi roa i to ratou taime e to ratou ara-maite-raa no te hiˈopoaraa i te mau huru tupuraa varavara. Te hoê taata e ere mai te reira to ˈna manaˈo, e tia ïa ia ˈna ia ohipa ia au maite i to ˈna haava manaˈo, eiaha râ oia ia haava ˈtu ia vetahi ê mai te peu e e rave ratou i te tahi atu faaotiraa, ma te hoê haava manaˈo maitai râ i mua i te Atua.—Roma 14:2-4, 12.

Noa ˈtu e e nehenehe e hamanihia te maa e toto to roto, peneiaˈe eita te reira e ravehia na te mau vahi atoa no te moni, te ture, aore ra te tahi atu mau tumu. Ei hiˈoraa, te na ô ra te vea Food Processing (Setepa 1991) e: “No te feia faaineine maa o te fifihia nei e te faito raro mai i te 1% (i roto i te maa iˈo tei oti) o te plasma puaatoru haapapehia i roto i te anoiraa, e mono mai te tahi atu huru anoiraa e faaohipa ra i te taoˈa poroteina o te û, e e nehenehe e haapapuhia e e iˈo maitai te reira.”

E tia ia haapapu e ia au i te ture, te peu matauhia, aore ra te mea e auhia i roto e rave rahi mau fenua, te faatahehia nei te toto o te mau animala e tupaihia e aita teie toto e faaohipahia ra i roto i te tahi atu mau maa. Mai te peu e aita e niu papu no te manaˈoraa e mea taa ê te huru tupuraa i te hoê vahi aore ra ua tupu te hoê tauiraa aita i maoro iho nei, e tia i te mau kerisetiano ia ara ia ore ratou ia tapitapi rahi roa no nia i te tahi manaˈo papu ore aore ra te hoê parau tei faarooroohia. Teie râ, mai te peu e mea papu aore ra e au ra e te faaohipa-rahi-hia ra te toto—i roto anei i te maa aore ra i roto i te mau ravea rapaauraa—e tia ia tatou ia opua papu e auraro i te faaueraa a te Atua e haapae roa i te toto.