Te hoê papai bibilia Hebera tei riro ei hohoˈa

HOU te iteraahia mai te mau Otaro o te Miti Pohe i te matahiti 1947 ra, te mau papai bibilia Hebera tahito roa ˈˈe i itehia mai—taa ê atu i te tahi mau tuhaa—no ǒ mai ïa i te pae hopea o te senekele 9 tae atu i te senekele 11 o to tatou nei tau. O te area noa ïa e hoê tausani matahiti i teie nei. Te auraa anei ïa e na mua ˈˈe i te matahiti 1947, e ere te papai Hebera a te Bibilia i te mea papu? E no te aha e mea iti roa te mau papai Hebera tahito?

No te pahono na mua i teie uiraa hopea, i raro aˈe i te faanahoraa ati Iuda tumu, ia ore anaˈe te hoê papai bibilia hebera e nehenehe faahou e faaohipahia no te mea ua ino roa, e tuuhia oia i roto i te hoê genizah, te hoê piha vaiihoraa tauihaa i roto i te sunago. I muri aˈe, e ravehia te mau papai tei ino i haapuehia no te tutui i te auahi. Ua na reira te mau ati Iuda ia ore ta ratou mau Papai ia haavahavahahia aore ra ia faaohipa-hape-hia. No te aha? No te mea tei roto na leta Hebera o te iˈoa moˈa o te Atua, o tei matauhia i te parau na roto i te reo tahiti o “Iehova.”

Te “Korona”

I roto i to ˈna tuhaa rahi, ua faaherehere-maitai-hia te papai Hebera tahito mai te mau tau tahito mai â. Ei hiˈoraa, te vai ra te hoê papai Hebera faufaa roa, tei piihia te Keter, oia hoi te “Korona,” te vai ra i roto i te matamua ra te taatoaraa o te mau Papai Hebera, aore ra te “Faufaa Tahito.” Ua tapeahia oia i roto i te sunago tahito roa ˈˈe o te hoê pǔpǔ iti ati Iuda tahito e ora ra i Aleppo, i Suria, te hoê oire mea puai te faaroo Mahometa. Na mua ˈtu, ua vaiihohia teie papai i te mau ati Iuda Karaite i Ierusalema, ua haruhia râ e te feia Aro moˈa i te matahiti 1099. I muri aˈe, ua noaa faahou mai teie papai e ua afaihia ˈtura i te oire tahito no Caire, i Aiphiti. Ua tapae atu oia i Aleppo i te area o te senekele 15 e ua piihia ˈtura oia i muri iho te Codex no Aleppo. Ua faarirohia teie papai, tei parauhia e no ǒ mai oia i te area o te matahiti 930 o to tatou nei tau, mai te korona o te ite aravihi a te pǔpǔ papai parau Massorètes, mai ta to ˈna iˈoa e faaite ra. E hiˈoraa maitai roa teie no te faaite i te haapao maitai i faaohipahia i roto i te faaherehereraa i te papai a te Bibilia e no reira, e papai hebera teie tei riro mau â ei hohoˈa.

I te mau tau apî, aita te feia tiai i teie papai faahiahia rahi, no to ratou mǎtaˈu e ia faaorehia te huru moˈa o teie taoˈa, i farii e ia hiˈopoahia oia e te feia ite. Hau atu, i te mea e hoê anaˈe api o tei patahia i te hohoˈa, eita ïa e nehenehe e piahia te hoê hohoˈa neneiraa ia tuatapapahia oia.

I to te mau Beretane faarueraa ia Paletetina i te matahiti 1948, ua tupu aˈera te mau ohipa patoiraa i te mau ati Iuda i Aleppo. Ua tutuihia ta ratou sunago i te auahi; ua moe ihora te papai codex faufaa roa e ua manaˈohia ˈtura e ua papaa atoa oia. Auê ïa te maere e, i te mea e tau ahuru matahiti i muri aˈe, ua itehia mai e toru tuhaa i nia i te maha tei ora mai e ua afai-omoe-hia mai Suria mai i Ierusalema! I te matahiti 1976, ua matara mai nei te hoê neneiraa e 500 hohoˈa peni taatoa.

Te ohipa a te hoê taata aravihi

Eaha te faufaaraa rahi o teie papai? No te mea ua faatitiaifarohia e ua tapaohia te tomaraa o te papai matamua e te mau piri vauera, i te area o te matahiti 930 o to tatou nei tau, na Aaron ben Asher, hoê o te mau taata ite tuiroo roa ˈˈe tei aravihi i te papai-faahou-raa e te faaherehereraa i te Bibilia Hebera. E codex ïa teie tei riro ei hohoˈa, e ei taoˈa hiˈopoaraa atoa i te mau papai-faahou-raa no muri iho mai i ravehia e te mau papai parau mea iti aˈe to ratou aravihi.

I te omuaraa ra, e 380 pǔpǔ api (760 api) to roto e ua papaihia na nia e toru anairaa tia i nia i te mau api parau tahito. I teie nei te vai ra e 294 pǔpǔ api e te erehia ra te rahiraa o na Buka e pae a Mose e te pae hopea, oia hoi te mau Oto a Ieremia, te Sire a Solomona, Daniela, Esetera, Ezera, e Nehemia. Ua faahitihia oia e te mau reta “Al” i roto i Te mau Papairaa Moˈa—Tatararaa a te ao apî—Bibilia e te mau faahororaa (Iosua 21:37, nota i raro i te api). Ua parau o Moses Maimonides (te vai ra to ˈna hohoˈa i ǒ nei), te hoê taata ite ati Iuda tuiroo no te Anotau no Ropu no te senekele 12 o to tatou nei tau, e o te Codex no Aleppo te mea faahiahia roa ˈˈe o ta ˈna i ite aˈenei.a

Te papai Hebera i papai-faahou-hia e te rima mai te senekele 13 e tae atu i te senekele 15, o te hoê ïa anoiraa no roto mai e piti pǔpǔ papai Massorètes tumu, ta Ben Asher e ta Ben Naphatali. I te senekele 16, ua faaineine aˈera o Jacob ben Hayyim i te hoê papai ia neneihia te hoê Bibilia Hebera no roto mai i teie papai tutuu anoihia, e ua riro maira te reira ei niu no te mau Bibilia Hebera atoa i neneihia i roto i na matahiti e 400 i muri aˈe.

Maoti te toruraa o te neneiraa i te matahiti 1937 o te Biblia Hebraica (te papai Hebera neneihia), ua faaohipahia te tutuu a Ben Asher i te mea e ua paruruhia oia i roto i te hoê papai tahito i tapeahia i Rusia, tei parauhia te Leningrad B 19^A. No ǒ mai te Leningrad B 19^A i te matahiti 1008 o to tatou nei tau. Te opua nei te Fare Haapiiraa Tuatoru Hebera no Ierusalema e pia i te taatoaraa o te papai Hebera no Aleppo i roto i te hoê area taime, e te mau taioraa no te mau papai tahito e te mau tatararaa faufaa atoa, mai te mau Otaro o te Miti Pohe.

E nehenehe e tiaturihia te papai bibilia ta tatou e faaohipa nei i teie mahana. Ua faauruahia mai e te Atua e ua faahereherehia i te roaraa o te mau senekele na te mau papai parau o tei ohipa ma te aravihi e te haapao maitai. Te itehia ra te ara-maite-raa o teie mau papai parau na roto i te mau faaauraa i ravehia i rotopu i te otaro a Isaia i itehia mai na te hiti o te Miti Pohe i te matahiti 1947 e te papai a te mau Massorètes, e te itehia ra e mea iti roa te mau taa-ê-raa, noa ˈtu e hau atu i te hoê tausani matahiti tahito aˈe te Otaro o te Miti Pohe i te Bibilia tahito roa ˈˈe a te mau Massorètes e vai nei. Hau atu, i te mea e e nehenehe ta te feia ite e tuatapapa i te Codex no Aleppo i teie nei, e horoa mai oia i te mau tumu hau atu â no te tiaturi i te parau mau o te mau Papai Hebera. Oia mau, “area te parau a to tatou Atua, e tia ïa i te vai-maite-raa.”—Isaia 40:8.

[Nota i raro i te api]

[Faaiteraa i te fatu o te hohoˈa i te api 28]

Bibelmuseum, Münster

[Faaiteraa i te fatu o te hohoˈa i te api 29]

Jewish Division / The New York Public Library / Astor, Lenox, and Tilden Foundations